Romanos 5

1Manak chic ka-pecado choch ri Dios ruma kacukub'an kac'u'x riq'uin ri Kajaf Jesucristo. Y ruma ri Jesucristo, ri Dios vacame otz nkojrutz'at. 2Y jo'c ruma xkacukub'a' kac'u'x riq'uin ri Jesucristo, ri Dios xu'on ri favor chika chi vacame cof ojc'o. Y nkojquicuot ruma kayo'ien ri k'ij antok junan xkojb'ac'ujie' riq'uin ri Dios ri c'o namalaj ruk'ij. 3Y nkojquicuot man jo'c ta ruma kayo'ien ri k'ij antok xkojb'ac'ujie' riq'uin ri Dios, xa nkojquicuot je' antok nakak'asaj sufrimiento, ruma kata'n chi antok naka'an sufrir, re' nu'on chika chi ojre' nic'ujie' más ka-paciencia. 4Y antok c'o chic ka-paciencia, re' nu'on chika chi más nkucover chupan ri kac'aslien choch ri Dios. Y antok cof chic ojc'o pa kac'aslien choch ri Dios, re' nu'on chi más nakayo'iej-apa ri xtiyo'x chika. 5Y ketzij xtiyo'x chika ri kayo'ien. Y xa jare' kayo'ien, manak xkuq'uix, ruma ri Dios altíra nkojrajo'. Y kata'n chi nkojrajo', ruma ruyo'n ri Espíritu Santo pa tak kánima. 6Ojre' man nkojtiquir ta nakacol-ki' kayuon, mare' antok xalka ri k'ij, ri Cristo xcon kuma ojre', mesque man otz ta kac'aslien choch ri Dios. 7Can ketzij chi man jun nrajo' nicon pa ruc'axiel jun chic, mesque rata'n chi ruc'uan jun choj c'aslien. O talvez jun nuya' rutzij chi nicon pa ruc'axiel jun chic ri otz nu'on. 8Pero ri Dios xuc'ut chakavach chi altíra nkojrajo', ruma mesque c'a oj pecadores, ri Cristo xcon pa ka-cuenta. 9Vacame, ya que manak chic ka-pecado choch ri Dios ruma ri Jesucristo xcon y x'in ruquiq'uiel kuma ojre', rumare' xkojcolotaj choch ri castigo ri xtuya' ri Dios. 10Ojier can, oj ru-enemigos ri Dios. Pero vacame, ruma ri Ruc'ajuol xcon pa kac'axiel, ri Dios xu'on ru-amigos chika. Y xa ri Dios xuya-pa ri Ruc'ajuol chi xcon pa kac'axiel antok c'a oj ru-enemigos; vacame ruma oj ru-amigos chic, can xkojcolotaj richin nojiel tiempo, ruma ri Kajaf Jesucristo c'as richin nojiel tiempo. 11Y man jo'c ta re', vacame nkojquicuot riq'uin ri Dios, ruma ja ri Kajaf Jesucristo xb'ano chi vacame oj ru-amigos ri Dios. 12Ri pecado ruma jun ache xuoc-pa choch-ulief. Ri ache re' ja ri Adán. Y ri pecado xuc'am-pa ri camic. Rumare' quinojiel vinak nca'con, ruma niqui'an pecado. 13Antok ri Dios maja' tuya-pa ri ley cha ri Moisés, ya c'o chic ri pecado choch-ulief, pero antok manak ri ley, man ni'e'x ta chi c'o pecado. 14Pero antok maja' c'o ri ley, mesque man x'e'x ta chi c'o pecado, quinojiel xa'con; desde Adán hasta Moisés; mesque man junan ta qui-pecado riq'uin ri Adán. Y ri Adán xuc'ut ri chica ri xtipa después. 15Ri xu'on ri Adán man junan ta riq'uin ri xu'on ri Jesucristo, ruma ri Jesucristo can xojrucol. Ri ru-pecado ri Adán xu'on chika konojiel chi xojuoc pa ruk'a' ri camic. Pero ri xu'on ri Jesucristo, ruyuon otz nuc'am-pa chika, y re' xa ruma ri ru-favor ri Dios. 16Y ri xuc'am-pa ri ru-pecado ri Adán, man junan ta riq'uin ri xu'on ri Cristo chi xojrucol. Ruma riq'uin ri jun oc pecado ri xu'on ri Adán choch ri Dios, can quinojiel vinak xa'uoc pecadores y rumare' xca'an juzgar chi niyo'x ri castigo pa quive'. Pero ri xu'on ri Cristo can altíra rakalien, ruma riq'uin re' ntiel chi manak chic ka-pecado choch ri Dios. 17Jo'c ruma ri ru-pecado ri Adán, quinojiel vinak xa'uoc pa ruk'a' ri camic. Pero ri xu'on ri Jesucristo más rakalien y rumare' ri nca'colotaj, can xca'c'asie' richin nojiel tiempo. Can nu'on chica chi manak chic qui-pecado choch ri Dios. Y ruma ri ru-favor ri Dios, xca'c'asie' y junan xtiqui'an reinar. 18Ruma ri pecado ri xu'on ri Adán, nika ri castigo pa quive' quinojiel vinak. Pero ruma ri xu'on ri Cristo can choj-ve, rumare' quinojiel ri vinak ri niquinimaj jaja', ntiel chi manak chic qui-pecado choch ri Dios y niquil ri c'aslien ri man niq'uis ta. 19Ruma ri Adán man xunimaj ta ri x'e'x cha ruma ri Dios, rumare' quinojiel vinak c'o qui-pecados. Pero ri Jesucristo xunimaj nojiel ri x'e'x cha ruma ri Dios, rumare' iq'uiy ri ni'an chica chi manak chic qui-pecado choch ri Dios. 20Antok ri Dios xuya' ri ley, más xa'b'ak'alajin-pa ri pecado. Y ruma xa'b'ak'alajin-pa ri pecado, más xk'alajin-pa ri ru-favor ri Dios pa quive' ri vinak. 21Y ri pecado xu'on chica quinojiel vinak chi xa'uoc pa ruk'a' ri camic. Pero ri ru-favor ri Dios nu'on chika chi manak chic ka-pecado choch y chi c'o kiq'uin ri c'aslien ri man niq'uis ta ruma ri xu'on ri Kajaf Jesucristo.

will be added

X\