Romanos 4

1¿Chica xtaka'ej chirij che'l xcolotaj ri Abraham, ri ojier katata' ojre' israelitas? 2Ri Abraham xiel chi man jun chic ru-pecado choch ri Dios, pero man ruma ta ri otz ri xa'ru'on. Xa ta quire', jaja' xtiquir ta xuya-ka ruk'ij ruyuon. Pero choch ri Dios man quire' ta. 3Ruma chupan ri ruch'ab'al ri Dios ri tz'ib'an can, nu'ej: Ri Abraham xunimaj ri Dios, y rumare' ri Dios xu'on cha chi xiel chi man jun chic ru-pecado choch. Quire' nu'ej ri tz'ib'an can. 4Ri nisamaj, can nituoj. Ri niyo'x cha, man choj ta nisipas cha, xa can inque akan choch. 5Pero man jun nicolotaj ruma altíra nisamaj. Mesque nu'on kax man otz ta, pero xa nunimaj ri Dios, ri Dios can nu'on cha chi man jun chic ru-pecado choch ruma nucukub'a' ruc'u'x riq'uin. 6Inche'l ru'e'n can ri David, chi can ja'al ca'quicuot ri vinak ri ni'an chica ruma ri Dios chi man jun chic qui-pecado choch ruma xquinimaj, y man ruma ta ri otz ri xa'qui'an. 7Ri David ru'e'n can: Can ja'al ca'quicuot ri vinak ri b'anun chic perdonar nojiel ri qui-pecados y xtz'apes can ruve'. 8Can ja'al ca'quicuot ri xti'e'x chica ruma ri Ajaf Dios chi manak chic pecado cakan. Quire' ru'e'n can ri David. 9¿Jo'c came quichin ri b'anun ri circuncisión chica chi can ja'al ca'quicuot, o quichin je' ri man b'anun ta ri circuncisión chica? Ri más nic'atzin naka'an ja chi kanimaj ri Dios, inche'l xu'on ri Abraham. Jaja' xucukub'a' ruc'u'x riq'uin ri Dios y rumare' ri Dios xu'on cha chi man jun chic ru-pecado choch. 10Antok ri Dios xu'on cha chi man jun chic ru-pecado choch, ¿b'anun chic came ri circuncisión cha o maja'? Ri Abraham c'a maja' ti'an ri circuncisión cha. 11Y ri circuncisión ri x'an cha, xa ratal chi jaja' manak chic ru-pecado choch ri Dios ruma xucukub'a' ruc'u'x riq'uin. Pero jaja' manak chic ru-pecado choch ri Dios antok c'a maja' ti'an ri circuncisión cha, y rumare' jaja' xuoc quitata' quinojiel ri niquinimaj ri Dios, mesque man b'anun ta ri circuncisión chica y ni'an chica chi manak chic qui-pecado choch ri Dios. 12Y ri Abraham katata' je' ojre' israelitas ri b'anun ri circuncisión chika, xa nakacukub'a' kac'u'x riq'uin ri Dios inche'l xu'on jaja', antok c'a maja' ti'an ri circuncisión cha. 13Ri Dios xu'on prometer cha ri Abraham chi xtuya' ri roch-ulief cha, y chica je' ri rumáma. Ruma ri Abraham xucukub'a' ruc'u'x riq'uin, rumare' xiel chi man jun chic ru-pecado choch, y man ruma ta xu'on ri nu'ej ri ru-ley ri Moisés. 14Ruma xa ta chica ri vinak ri nca'b'ano ri nu'ej ri ley niyo'x ri ranun prometer ri Dios; man jun nic'atzin chi ojre' kacukub'an kac'u'x riq'uin ri Dios, ruma man niyo'x ta chika ri ranun prometer ri Dios. 15Ri ley nuc'am-pa castigo. Pero xa man ta c'o ri ley re', man ta ni'e'x chika chi xa man naka'an ta ri nu'ej. 16Rumare' ri Dios jo'c chica ri niquicukub'a' quic'u'x riq'uin nuya' ri ranun prometer. Nuya' chica chi nik'alajin ri ru-favor jaja'. Y nuya' chica xa ic'o o man ic'o ta chuxie' ri ley. Ri nic'atzin niqui'an jo'c tiquicukub'a' quic'u'x riq'uin ri Dios, inche'l xu'on ri Abraham ri katata' konojiel ojre' ri kacukub'an kac'u'x riq'uin ri Dios. 17Inche'l nu'ej chupan ri tz'ib'an can antok ri Dios xu'ej cha ri Abraham: Nub'anun chava chi at quitata' q'uiy vinak. Quire' xu'ej ri Dios antok xuc'ut-ri' choch ri Abraham. Y ri Abraham can xunimaj ri Dios. Ri Dios nca'ruc'asuoj ri quiminaki', y jaja' nu'ej ri kax ri man ic'o ta, inche'l xa ic'o. 18Ri Abraham xunimaj chi nib'anataj ri x'e'x cha ruma ri Dios, mesque ri x'e'x cha xa altíra cuesta ruma jaja' xa mámix chic. Pero can xunimaj ri xu'ej ri Dios cha, chi ntuoc quitata' q'uiy vinak y nca'c'ujie' iq'uiy rumáma. 19Mesque ri Abraham c'o la'k cien rujuna', y ri Sara ri raxjayil xa aviela chic y manak ral alaxnak, jaja' xucukub'a' ruc'u'x riq'uin ri xu'ej ri Dios cha. 20Y can xroyo'iej ri xu'on prometer ri Dios cha, y man caca' ta ruc'u'x xroyo'iej, xa can xucukub'a' más ruc'u'x riq'uin ri Dios y xuya' je' ruk'ij ri Dios. 21Ri Abraham rata'n ja'al chi ri Dios c'o ru-poder chi nu'on nojiel ri ranun prometer. 22Y ruma ri Abraham xucukub'a' ruc'u'x riq'uin ri Dios, ri Dios xu'on cha chi xiel chi man jun chic ru-pecado choch. 23Y ri nu'ej chupan ri ruch'ab'al ri Dios ri tz'ib'an can, man jo'c ta nu'ej chica manera ri Abraham xiel chi man jun chic ru-pecado choch ri Dios, 24xa nu'ej chika ojre' chica manera je' ntiel chi man jun chic ka-pecado choch ri Dios, vi xa nakanimaj ri Dios ri xc'asuon-pa ri Kajaf Jesús chiquicajol ri quiminaki'. 25Ri Jesús xjach chi xquimisas ruma ka-pecados ojre', y xc'astaj-pa chi quire' ntiel chi manak chic ka-pecado choch ri Dios.

will be added

X\