Romanos 3

1Y xa quire', ¿chica nakach'ec chi oj israelitas? ¿Y chica otz nuc'am-pa chika ri circuncisión? 2Inre' ni'ej chiva chi c'o q'uiy otz nuc'am-pa chika. Ri na'ay, ja chi ri Dios pa kak'a' ojre' ruyo'n ri ruch'ab'al. 3Y xa ic'o kavanakil ri man xquinimaj ta ri ruch'ab'al ri Dios, ¿otz came naka'ej chi ri Dios man xtu'on ta ri ru'e'n? 4Man quire' ta. Ri Dios can nu'on ri nu'ej, mesque quinojiel ri vinak man quire' ta niqui'an. Inche'l ri tz'ib'an can chupan ri ruch'ab'al ri Dios: Ri vinak xtiquitz'at chi ketzij ri na'ej. Y xa ic'o vinak ri altíra itziel nca'ch'o' chavij, can xtik'alajin chi man ketzij ta ri niqui'ej. Quire' nu'ej ri tz'ib'an can. 5Y xa ruma ri man choj ta ri naka'an, más k'alaj chi ri Dios can choj, ¿chica naka'ej? ¿Man choj ta came ri Dios ruma nuya' ri castigo pa kave'? (Inre' nquich'o' inche'l chica-na vinak.) 6Man quire' ta. Ruma xa ta quire', ri Dios man ta nitiquir nca'ru'on juzgar ri vinak. 7Pero xa ruma ri man ketzij ta ri ni'ej, rumare' nik'alajin chi ketzij nojiel ri nu'ej ri Dios, y xa más niyo'x ruk'ij, ¿karruma nqui'an juzgar inche'l jun pecador? 8Man ti'an pensar chi ruma nti'an ri itziel tak kax nipa ri otz. Ruma quinojiel ri quire' niqui'ej, can otz chi nika ri castigo pa quive', pero ic'o ri nca'e'n chi ojre' jare' nakac'ut, y re' man ketzij ta. 9¿Y vacame chica nti'ej ixre'? ¿Ja came ojre' israelitas ri más oj otz choch ri Dios que ri man israelitas ta? Man quire' ta. Inche'l xin'ej yan, quinojiel vinak, israelitas o man israelitas ta, quinojiel ic'o chuxie' ri pecado. 10Quire' je' nu'ej ri ruch'ab'al ri Dios ri tz'ib'an can: Man jun vinak choj ruc'aslien. Ni xa ta jun. 11Man jun nrajo' ni'ka paro' (nu'on entender) chica ri otz y man jun je' ri nicanun ri Dios. 12Quinojiel man xcajo' ta xa'a chupan rub'iey ri Dios. Man jun vinak otz ruc'aslien. Man jun nib'ano ri otz. Ni xa ta jun. 13Ri pa quichi' can inche'l jun jul pache' mukun jun quiminak y xjak chic jun b'ay. Niqui'an maña riq'uin ri niqui'ej. I-inche'l ru-vaniena cumatz c'o pa quichi'. 14Can siempre itziel nca'ch'o' chiquij nic'aj chic. Can pakon ri tzij ri nca'qui'ej. 15Man tica'xaj jun kax, can jun-anin nca'a chi nca'quimisan. 16Xa chica-na lugar nca'k'ax-ve niquiya' can b'is y sufrimiento. 17Man cata'n ta chi chica modo niquic'uaj ri b'ay richin paz. 18Man niquixi'ij ta qui' choch ri Dios. Quire' ri tz'ib'an can. 19Y ojre' kata'n chi ri nu'ej ri ru-ley ri Dios ri tz'ib'an can, chica ri ic'o chuxie' ri ley re' nich'o-ve. Mare' man jun nitiquir ni'e'n chi manak ru-pecado. Can quinojiel ri ic'o choch-ulief xca'b'aka choch ri Dios chi nca'ru'on juzgar. 20Man jun vinak ruma rub'anun nojiel ri nu'ej ri ru-ley ri Dios, can ta rumare' ntiel chi man jun chic ru-pecado choch. Ri ley re' xa nuc'ut chakavach chi oj pecadores. 21Y vacame ri Dios nuc'ut chakavach chica modo naka'an chi ntiel chi man jun chic ka-pecado choch. Jaja' nuc'ut chakavach chi man ruma ta ri ru-ley antok choj nik'alajin ri kac'aslien choch, inche'l ri tz'ib'an can chupan ri ru-ley y inche'l ri tz'ib'an can cuma ri profetas ri xa'c'ujie' ojier can tiempo. 22Ri Dios nuc'ut chakavach chi quinojiel ri niquicukub'a' quic'u'x riq'uin ri Jesucristo y niquinimaj, ntiel chi man jun chic qui-pecado choch ri Dios. Ruma choch jaja' oj junan konojiel, 23ruma konojiel xka'an pecar, y rumare' naj xojc'ujie-ve choch ri Dios ri c'o ruk'ij. 24Pero ruma ri favor ri xu'on ri Dios chika, ntiel chi man jun chic ka-pecado choch jaja'. Y ri favor re' xa nusipaj chika, ruma ri Cristo Jesús xcon chi xutoj nojiel ri ka-pecado. 25Ri Dios xutak-pa ri Cristo chi xcon y x'in ruquiq'uiel pa qui-cuenta ri vinak. Ri nucukub'a' ruc'u'x riq'uin ri Cristo can ni'an perdonar ri ru-pecado. Ri Dios can ranun-pa pensar chi nutak-pa ri Cristo, chi nuc'ut chi c'o ru-paciencia, mare' k'alaj chi can choj-ve ri xu'on antok man xuya' yan ta pa ri castigo pa quive' ri vinak ri xa'c'ujie' ojier can tiempo. 26Y k'alaj chi choj ri nu'on chupan ri ka-tiempo ojre', antok nu'on chika chi man jun chic ka-pecado choch ruma kacukub'an kac'u'x riq'uin ri Jesús. 27Rumare' manak modo nakana' chi c'o kak'ij y naka'ej chi otz kac'aslien. Ruma man xojcolotaj ta ruma otz ri xka'an, xojcolotaj ruma xkacukub'a' kac'u'x riq'uin ri Jesús. 28Y k'alaj chi chica-na vinak ri nucukub'a' ruc'u'x riq'uin ri Jesús, ntiel chi man jun chic ru-pecado choch ri Dios, mesque man rub'anun ta pa ri nu'ej chupan ri ru-ley ri Moisés. 29¿C'o came modo naka'ej chi ri Dios jo'c kichin ojre' ri oj israelitas? Manak modo naka'ej quire', ruma ri Dios can Qui-Dios je' ri man israelitas ta. 30Jo'c jun Dios c'o, y jaja' nib'ano chica quinojiel chi man jun chic qui-pecado choch ruma niquicukub'a' quic'u'x riq'uin; xa israelitas ri b'anun ri circuncisión chica o man israelitas ta ri man b'anun ta ri circuncisión chica. 31¿Ni'ka pan ive' (nti'an entender) ixre' chi ojre' xka'ej chi ri ru-ley ri Moisés, manak chic rakalien chica ri quicukub'an quic'u'x riq'uin ri Jesús? Man quire' ta. Ri kacukub'an kac'u'x riq'uin ri Jesús, jare' ri nakanimaj chi ri ley c'o rakalien.

will be added

X\