Romanos 2

1Ruma c'a re', ixre' ri nti'ej chi man otz ta ri nca'jin chub'anic ri nic'aj, riq'uin ri quire' nti'an, xa pan ive' ixre' mismo ntivayuoj-ka ri castigo, ruma ixre' xa quire' je' nti'an. 2Can kata'n chi ri Dios can xtuya' ri castigo chica quinojiel vinak ruma ri pecados ri i-quib'anun. Can inche'l niqui'an, quire' xtu'on ri Dios chica. 3Y antok ixre' nti'ej chi altíra itziel quib'anun ri vinak ri niqui'an ri pecados ri inche'l re', y xa quire' je' nti'an ixre'; ¿nti'an pensar came ixre' chi ri Dios man xtuya' ta ri castigo pan ive' ruma ri i-pecados? 4¿Man ib'anun ta came entender karruma ri Dios altíra otz iviq'uin y karruma jaja' nu'on perdonar ri pecado y altíra ru-paciencia? Chivach-ka ixre' ntina' chi otz nti'an chica-na pecado ri ntivajo' y jaja' man jun chica nu'on chiva. Pero xa man quire' ta. Jaja' altíra otz iviq'uin, rumare' nrajo' chi nitzalaj-pa ivánima riq'uin y nti'an ri nrajo' jaja'. 5Pero ixre' cof ib'anun cha ri ivánima. Man ntivajo' ta ntiya' can ri pecado. Y ruma quire' nti'an, can ntimol-apa ri castigo chivij. Can xtika ri ru-castigo ri Dios pan ive' chupan ri k'ij antok jaja' xtu'on juzgar. Ruma jaja' can pa ruchojmil nu'on juzgar. 6Ruma xtuya' ruc'axiel chica chiquijunal, conforme ri xqui'an. 7Ri Dios xtuya' ri c'aslien ri man niq'uis ta chica ri man nca'tanie' ta chi niqui'an ri otz; ri niquirayij chi nca'b'ac'ujie' chicaj richin nojiel tiempo, pache' jo'c sakil c'o y chire' je' nem xti'an chica. 8Pero ri man nca'niman ta cha ri Dios, can xtika ri rayoval pa quive'. Y nem ri castigo ri xtika je' pa quive'. Quire' xtib'anataj chica ri man nca'niman ta ri ketzij, y xa ja ri man otz ta ri niquinimaj. 9Quinojiel vinak ri nca'b'ano itziel tak kax, can xtiquik'asaj pakon, y xtiquib'ana' sufrir. Na'ay xtika ri castigo pa quive' ri israelitas, y xtika je' pa quive' ri man israelitas ta. 10Pero quinojiel ri nca'b'ano ri otz, xca'b'ac'ujie' chicaj pache' jo'c sakil c'o, y nem xti'an chica; can xtic'ujie' ri paz riq'uin cánima. Y ja ri israelitas ri na'ay xti'an quire' chica, y xti'an je' chica ri man israelitas ta. 11Ruma ri Dios can junan nu'on chica quinojiel. 12Ri Dios can ruyo'n ri ru-ley chika ojre' israelitas; y xa naka'an pecado, ri Dios can ja ri ley re' ri nucusaj chi nkuru'on juzgar. Pero ri vinak ri man cata'n ta ri ley re' y niqui'an pecado, can xtika je' ri castigo pa quive', pero man xticusas ta ri ley re' chiquij chi nca'an juzgar. 13Ruma man ja ta ri nca'c'axan ri nu'ej ri ley ri ntiel chi man jun chic qui-pecados choch ri Dios, xa ja ri nca'b'ano ri nu'ej ri ley ri ntiel chi man jun chic qui-pecados choch ri Dios. 14Antok ri vinak ri man israelitas ta niqui'an ri nu'ej ri ru-ley ri Dios, mesque ijeje' man caxan ta chica nu'ej, k'alaj chi ja ri cánima ri ni'e'n chica, ri chica ri otz y ri chica ri man otz ta. Inche'l xa c'o ri ley re' riq'uin cánima. 15Inche'l xa tz'ib'an ri ru-ley ri Dios riq'uin cánima, y jare' ri ni'e'n-pa chica, ri chica ri otz y ri chica ri man otz ta. Y ijeje' otz nuna' ri quijaluon y ri cánima antok ja ri otz niqui'an, y antok man otz ta niqui'an, ri quijaluon y ri cánima can nib'isuon. 16Y antok xtalka ri k'ij chi xca'an juzgar quinojiel ri vinak, xtiyo'x ruc'axiel chica ri xqui'an pan aval. Y ri Dios ja ri Jesucristo ri xtucusaj chi nu'on juzgar. Quire' nu'ej ri evangelio ri nitzijuoj. 17Ixre' nuvanakil, can altíra nquixquicuot ruma ix israelitas, ixre' nti'an pensar chi ya xixcolotaj, ruma ri Dios chiva ixre' xuya-ve ri ru-ley. Y altíra ix nima'k ntina-ivi' ruma c'o ri Dios iviq'uin. 18Ixre' ix-tijuon riq'uin ri ru-ley ri Dios, y rumare' ivata'n ri chica nrajo' ri Dios chi nti'an, y ivata'n je' ri chica otz y ri chica man otz ta. 19Y ixre' nti'an pensar chi nquixtiquir nqui'vuc'uaj ri i-muoy y ntiya' qui-luz ri ic'o pa k'aku'n. 20Nqui'tijuoj ri vinak ri man jun kax cata'n, y nqui'tijuoj ri ac'ola'. Ruma chiva ixre' yo'n-ve ri ru-ley ri Dios ri c'o q'uiy no'j chupan y c'o nojiel ri ketzij chupan. 21Ixre' nti'ej chi nqui'tijuoj ri nic'aj chic. ¿Man came nic'atzin ta chi ntitijuoj-ka-ivi' ixre' na'ay? Ixre' nti'ej chica ri nic'aj chi man otz ta ri alak'. ¿Y ixre' xa nquixalak'? 22Ixre' nti'ej chica ri i-c'ulan chi man tiquic'uaj-qui' riq'uin jun chic. Y xa ixre' ri nquixb'ano. Ixre' nti'ej chi itziel ca'tz'iet ri ídolos. Pero xa ixre' mismo nquixalak'-pa chupan ri cachuoch ri ídolos. 23Can ntina-ivi' chi c'o ik'ij ruma c'o ri ru-ley ri Dios iviq'uin. Pero ruma man nti'an ta ri nu'ej chupan ri ley, xa ntikasaj ruk'ij ri Dios. 24Ruma ri ruch'ab'al ri Dios ri tz'ib'an can nu'ej: Ri vinak ri man israelitas ta itziel nca'ch'o' chirij ri Dios, ruma niquitz'at ri itziel tak kax ri nti'an ixre' israelitas. Quire' ri tz'ib'an can. 25Ojre' israelitas can b'anun ri circuncisión chika, y re' altíra otz. Pero xa man naka'an ta ri nu'ej ri ru-ley ri Dios, man jun nic'atzin chi b'anun ri circuncisión chika. 26Y xa c'o jun ache ri man israelita ta y nu'on ri nu'ej ri ley; choch ri Dios, ri jun ri nu'on quire' inche'l xa b'anun ri circuncisión cha, mesque man rub'anun ta. 27Y ri ache ri nu'on ri nu'ej chupan ri ru-ley ri Dios, y man b'anun ta ri circuncisión cha, jaja' ri xtib'ano juzgar ivichin. Ruma ixre', mesque pan ik'a' c'o-ve ri ley re' y b'anun ri circuncisión chiva, xa man nti'an ta ri nu'ej. 28Can ix israelitas y b'anun ri circuncisión chiva. Pero man jo'c ta re' nic'atzin chi nik'alajin chi ix israelitas, ruma ri circuncisión ri b'anun chiva, xa jo'c juviera. 29Ruma choch ri Dios ri ketzij israelitas, ja ri vinak ri sak cánima. Ijeje' can b'anun ri circuncisión pa tak cánima. Ri circuncisión re' ja ri Espíritu Santo nib'ano y man ja ta ri nu'ej ri ley ri nib'ano. Y ri vinak ri b'anun ri circuncisión chica pa tak cánima, jare' ri nca'ka choch ri Dios, mesque man nca'ka ta chiquivach ri vinak.

will be added

X\