Romanos 16

1Ri hermana Febe nib'aka iviq'uin; jaja' jun diaconisa chupan ri iglesia ri c'o Cencrea. 2Rumare' ni'ej chiva chi ja'al tib'ana' recibir, quire' otz nti'an como santos hermanos ruma xa jun ib'anun riq'uin ri Ajaf. Can tito' ri Febe riq'uin ri nic'atzin cha; ruma jaja' iq'uiy i-ruto'n y quire' je' rub'anun chuva inre'. 3Nitak-el jun saludo cha ri hermana Priscila y cha ri hermano Aquila, ri junan xojsamaj quiq'uin pa rusamaj ri Cristo Jesús. 4Ijeje' jub'a' ma xa'con ruma xinquicol inre' choch ri camic. Man jo'c ta inre' niya' tiox b'a' chica rumare', xa quire' je' niqui'an quinojiel ri iglesias quichin ri man israelitas ta. 5Y nitak-el je' jun saludo cha ri iglesia ri c'o pa cachuoch ri ica'ye' hermanos re'. Y nitak-el je' jun saludo cha ri hermano Epeneto. Inre' altíra nivajo' jaja'. Jaja' ri na'ay ri xunimaj ri Cristo chupan ri lugar Acaya. 6Nitak-el jun saludo cha ri hermana María. Jaja' altíra nisamaj chicajol. 7Nitak-el je' jun saludo chica ri hermanos Andrónico y Junias, ri i-nuvanakil, ri junan xojc'ujie' quiq'uin pa cárcel. Q'uiy yan juna' tiquinimaj ri Cristo. Ijeje' quiniman yan antok inre' c'a maja' tinnimaj. Y ijeje' can ja'al nca'tz'iet cuma ri nic'aj chic apóstoles. 8Nitak-el jun saludo cha ri hermano Amplias. Inre' altíra nivajo' jaja', ruma jaja' can runiman ri Ajaf je'. 9Nitak-el jun saludo cha ri hermano Urbano. Riq'uin jaja' junan xojsamaj pa rusamaj ri Cristo Jesús. Y nitak-el je' jun saludo cha ri hermano Estaquis, ri altíra nivajo'. 10Nitak-el jun saludo cha ri hermano Apeles. Jaja' can nik'alajin chi ruyo'n ránima riq'uin ri Cristo. Nitak-el jun saludo chica ri hermanos ri iru-familia ri Aristóbulo. 11Nitak-el jun saludo cha ri hermano Herodión, ri nuvanakil. Nitak-el jun saludo chica ri ru-familia ri Narciso, ri quiniman ri Ajaf. 12Nitak-el jun saludo chica ri hermanas Trifena y Trifosa, i-rusamajiel ri Ajaf. Nitak-el jun saludo cha ri Pérsida, ri altíra nivajo'. Jaja' altíra samajnak pa rusamaj ri Ajaf. 13Nitak-el jun saludo cha ri hermano Rufo. Jaja' cho'n je' ruma ri Ajaf. Y nitak-el je' jun saludo cha ri rutie' jaja', ri can inche'l je' ntie' inre'. 14Nitak-el jun saludo chica ri hermanos Asíncrito, Flegonte, Hermas, Patrobas, Hermes y chica ri hermanos ri ic'o quiq'uin. 15Nitak-el jun saludo chica ri Filólogo, ri Julia, ri Nereo y ri rana', ri Olimpas y ri santos hermanos ri ic'o quiq'uin. 16Tib'ana' saludar-ivi' chib'il-ivi' y titz'ub'aj ichi' pa rub'e' ri Ajaf Dios. Quinojiel ri iglesias richin ri Cristo niquitak-el jun saludo chiva. 17Hermanos, ni'ej chiva chi tib'ana' cuenta-ivi', ruma ic'o vinak ri nca'quijach quivach ri hermanos, y niqui'an chica chi nca'tzak. Ruma ijeje' jun-ve chic ri niquic'ut y can itziel nca'ch'o' chirij ri ketzij ri ivuc'uan ixre'. Ri vinak ri nca'b'ano quire' man tivuc'uaj-ivi' quiq'uin. 18Ruma ijeje' man ja ta ri rusamaj ri Kajaf Jesucristo niqui'an, xa ja ri nurayij ri qui-cuerpo ri niqui'an. Ijeje' niquicusaj ja'al tak tzij y rumare' ri nca'c'axan quichin altíra otz nica'xaj, ruma man niqui'an ta pensar otz ri chica nu'ej ri tzij, y cha'nin nca'an engañar. 19Quinojiel cata'n chic chi ixre' can nquixniman cha ri Dios, y inre' altíra nquiquicuot rumare'. Pero nivajo' je' chi tic'ujie' ino'j chi nti'an ri otz y man chic ti'an ri itziel tak kax. 20Y ri Dios ri niyo'n paz, ya mero xtuxak' ri Satanás richin xa jun tiempo y xtuya' chuxie' ivakan. Ja ta ri ru-favor ri Kajaf Jesucristo tic'ujie' iviq'uin. 21Ri hermano Timoteo nutak-el jun saludo chiva, oj ca'ye' ojc'o pa rusamaj ri Dios. Niquitak-el je' jun saludo chiva ri Lucio, ri Jasón y ri Sosípater; ijeje' i-nuvanakil. 22Y inre' Tercio, ri nitz'ib'aj-el ri nu'ej ri Pablo, nitak-el jun saludo chiva pa rub'e' ri Ajaf. 23Ri hermano Gayo nutak-el jun saludo chiva. Vacame pa rachuoch jaja' inc'o-ve, y vave' je' niquimol-qui' ri iglesia. Ri hermano Erasto nutak-el jun saludo chiva. Jaja' ri tesorero richin ri tanamet. Y quire' je' nutak-el jun saludo chiva ri hermano Cuarto. 24Ja ta ri ru-favor ri Kajaf Jesucristo tic'ujie' iviq'uin chi'ixvonojiel. Amén. 25Kaya' ruk'ij ri Dios. Ruma jo'c jaja' ri nitiquir nu'on chiva chi ntiya' más ruchuk'a' ivánima riq'uin. Quire' nu'ej ri evangelio richin ri Jesucristo ri nitzijuoj inre', ri c'o pan aval riq'uin ri Dios ojier can tiempo, 26xa c'a vacame xk'alajin, y rumare' ni'ka pa kave' (naka'an entender) ri tz'ib'an can chupan ri ruch'ab'al cuma ri profetas ri xa'c'ujie' ojier can tiempo. Ri Dios ri can c'o-ve richin nojiel tiempo, ru'e'n-pa chi titzijos chica quinojiel vinak, y jare' ri najin vacame, chi quire' tiquicukub'a' quic'u'x riq'uin jaja' y ca'niman cha. 27Jo'c jaja' ri Dios c'o y riq'uin jaja' c'o-ve nojiel no'j. Tiyo'x ruk'ij richin nojiel tiempo. Jo'c ruma ri Jesucristo nkojtiquir nakaya' ruk'ij ri Dios. Amén.

will be added

X\