Romanos 15

1Ojre' ri cof ojc'o riq'uin ri Cristo, ca'kacach'o' ri maja' ti'ka pa quive' otz (tiqui'an entender otz) ri ruch'ab'al ri Dios. Man taka'an jo'c ri nika chakavach ojre'. 2Can kab'ana' ri nika chiquivach ri nic'aj chic, chi quire' c'o otz nuc'am-pa chica ijeje' y chi nca'q'uiy chupan ri quic'aslien choch ri Dios. 3Ruma ri Cristo man xu'on ta jo'c ri xka choch jaja'. Ruma inche'l nu'ej chupan ri ruch'ab'al ri Dios ri tz'ib'an can: Ri itziel tzij ri xa'qui'ej ri vinak chava atre', xa chuva inre' xqui'ej-ve ri tzij. Quire' nu'ej ri Cristo cha ri Dios. 4Y nojiel ri ruch'ab'al ri Dios ri tz'ib'an ojier can, i-tz'ib'an can chi quire' c'o nakatamaj, chi nic'ujie' ka-paciencia, chi nkuru'on consolar, y chi nakayo'iej ri xtuya' ri Dios chika. 5Ri Dios ri nuya' ka-paciencia y nkuru'on consolar, nu'on ta chiva chi junan ta ivánima, y man jun ta ayoval chicajol. Inche'l xuc'ut can ri Cristo Jesús, 6chi quire' xa jun ib'anun y xa jun ikul nti'an chi ntiya' ruk'ij ri Dios ri Rutata' ri Kajaf Jesucristo. 7Tib'ana' recibir-ivi' chib'il-ivi'. Tib'ana' inche'l xu'on ri Cristo; ruma jaja' xojru'on recibir, chi quire' niyo'x ruk'ij ri Dios. 8Quire' ni'ej chiva, ruma ri Cristo xpa chi xojruto' ojre' ri israelitas ri b'anun ri circuncisión chika, chi xuc'ut chakavach chi ri Dios can nu'on-ve ri ru'e'n. Can ja ri Cristo xc'amo-pa ri ranun prometer ri Dios chica ri ojier tak kate't-kamama'. 9Y xpa je' chi quire' ri man israelitas ta niquiya' je' ruk'ij ri Dios ruma xujoyovaj quivach. Inche'l ri nu'ej chupan ri ruch'ab'al ri Dios ri tz'ib'an can: Can xtinya' ak'ij chiquivach ri vinak ri man israelitas ta, y xtinb'ixaj ri ab'e'. 10Y ri ruch'ab'al ri Dios nu'ej je': Ixre' ri man ix israelitas ta, quixquicuot junan quiq'uin ri israelitas, ri rutanamit ri Dios. 11Y nu'ej je': Tiya' ruk'ij ri Ajaf ixvonojiel ixre' ri man ix israelitas ta. Quinojiel tanamet tiquiya' ruk'ij ri Dios. Quire' nu'ej chupan ri ruch'ab'al ri Dios. 12Y ri profeta Isaías c'o je' ri rutz'ib'an; jaja' ru'e'n can: C'o jun rumáma ri Isaí xtic'ujie' y xtu'on gobernar pa quive' ri man israelitas ta, y ri vinak re' can xtiquiyo'iej jaja' chi xtuya' ri favor chica. Quire' ri rutz'ib'an can ri Isaías. 13Ri Dios nu'on chika chi cukul kac'u'x nakayo'iej ri xtuya' jaja' chika. Y ri nirayij inre', ja chi ri Dios nunojsaj ivánima chi nquixquicuot ja'al y nuya' paz chiva. Quire' xtu'on chiva ruma iniman jaja'. Can xquixruto' riq'uin ri ru-poder ri Espíritu Santo, chi quire' cukul ic'u'x ntivoyo'iej-apa ri xtuya' ri Dios. 14Hermanos, inre' vata'n chi otz ino'j, y chi q'uiy ino'j, mare' nquixtiquir ntich'olij-ivi'. 15Pero xc'atzin chi xinnataj-el chiva, y man xinxi'ij ta vi' chi xintz'ib'aj-el chupan va carta va. Nitz'ib'aj-el chiva, ruma ri Dios ruyo'n ri ru-favor chuva, 16chi xinuoc rusamajiel ri Jesucristo chi nitzijuoj ri ru-evangelio ri Dios chica ri vinak ri man israelitas ta, chi quire' ijeje' niquijach quic'aslien cha ri Dios, ruma ri nusamaj inre'. Y ijeje' nca'ka je' choch ri Dios, ruma ri Espíritu Santo nu'on sak cha ri quic'aslien. 17Ri Cristo Jesús c'o viq'uin, y rumare' inre' altíra nquiquicuot riq'uin ri samaj ri yo'n chuva ruma ri Dios. 18Inre' man jun tzij nquitiquir ni'ej xa man ta ri Cristo in-rucusan chi ni'an ri samaj re'. Y rumare' iq'uiy chiquivach ri vinak ri man israelitas ta ri nca'niman richin. Niquinimaj ruma nica'xaj ri ruch'ab'al ri Dios ri nitzijuoj chica y niquitz'at ri ni'an chiquicajol; 19y ruma niquitz'at ri señales y ri milagros ri nca'n'an riq'uin ri ru-poder ri Ru-Espíritu ri Dios. Inre' xintzijuoj ri ru-evangelio ri Cristo chupan Jerusalén y nic'aj chic tanamet, y hasta c'a Ilírico je'. 20Quire' ni'an ruma nivajo' nitzijuoj ri ru-evangelio ri Cristo pa tak lugares pache' man cata'n ta ri vinak chi nic'atzin niquinimaj ri Cristo, y man pache' ta ya xb'aka rutzijoxic cuma nic'aj chic. 21Y antok quire' ni'an, can nib'anataj ri nu'ej chupan ri ruch'ab'al ri Dios: Ri man jun quic'axan chirij ri jaja', can xtica'xaj; y ri man jun tzijuon chica chirij jaja', can xti'ka pa quive' (xtiqui'an entender). Quire' nu'ej ri tz'ib'an can. 22Y ruma nitzijuoj ri ruch'ab'al ri Dios chica ri man jun caxan ri ruch'ab'al, rumare' man in-tiquirnak ta in-b'anak iviq'uin. 23Pero vacame ruma xinq'uis yan ri nusamaj pa tak tanamet ri xin'ej yan chiva, nivajo' nquib'aka iviq'uin ixre', ruma q'uiy yan juna' nurayin-pa chi nquib'aka iviq'uin. 24Vacame nub'anun pensar nquinak'ax iviq'uin antok xqui'a ri nación España. Nivajo' nquic'ujie' jun jane' na (jaro' na) k'ij iviq'uin y xquiquicuot ruma nakatz'at-ki' iviq'uin. Y nivajo' je' chi ixre' ntiya-el ri nic'atzin chuva richin ri nub'iey. 25Pero vacame nqui'a Jerusalén chi ni'jacha' jun ofrenda chica ri santos hermanos ri ic'o chire'. 26Ruma ri aj-Macedonia y ri aj-Acaya, xalax pa cánima chi xquimol jun ofrenda chi niquitak-el chica ri i-puobra ri ic'o chiquicajol ri santos hermanos ri ic'o Jerusalén. 27Nicajo' nca'quito'. Y altíra otz quire' niqui'an, ruma ijeje' c'o quic'as quiq'uin ri israelitas. Ruma ja ri israelitas ri xa'tzijuon ri ruch'ab'al ri Dios chica chi xa'colotaj, y rumare' otz chi ijeje' nca'quito' jub'a' ri israelitas. 28Y antok nujachuon chic can ri niquitak-el ijeje' chuvij, xqui'a ri nación España y ja xquinak'ax iviq'uin. 29Y inre' vata'n chi antok xquib'aka iviq'uin, can nem ri bendición xti'an recibir viq'uin ruma xtintzijuoj ri ru-evangelio ri Cristo chiva. 30Ni'an rogar chiva hermanos, pa rub'e' ri Kajaf Jesucristo y ruma ri Espíritu Santo nu'on chika chi nakajo-ki', chi tib'ana' orar pa nu-cuenta. 31Tic'utuj cha ri Dios chi quire' man nquika ta pa quik'a' ri vinak ri man quiniman ta ri Jesucristo ri ic'o Judea. Y tic'utuj je' cha, chi quire' ri santos hermanos ri ic'o Jerusalén, can xtika ta chiquivach ri xtinjach can chica. 32Y quire' xtiquicuot ri vánima antok xquib'aka iviq'uin, xa quire' nrajo' ri Dios, y xquinuxlan jub'a' iviq'uin. 33Ri Dios ri nuya' paz, can tic'ujie' iviq'uin ixvonojiel. Amén.

will be added

X\