Romanos 14

1Ri nicajo' nca'c'ujie' iviq'uin, can qui'b'ana' recibir otz, mesque ijeje' maja' ti'ka pa quive' otz (tiqui'an entender otz) chi jo'c ruma ri cukb'al c'u'x riq'uin ri Cristo nca'colotaj. Y man ti'an ayoval quiq'uin ruma ri niqui'an pensar. 2Chiquivach nic'aj, otz nitij nojiel, pero chiquivach ri maja' ti'ka pa quive' otz (tiqui'an entender otz) chi jo'c ruma ri cukb'al c'u'x riq'uin ri Cristo nca'colotaj, xa ja ri k'ayis ri otz nitij. 3Ri niquitej nojiel, man itziel ca'quitz'at ri man niquitej ta nojiel. Y ijeje' man tiqui'ej chi man otz ta ri niqui'an ri niquitej nojiel. Ri Dios can i-ranun recibir quinojiel. 4¿At chica atre' chi na'an juzgar ri siervo ri man avichin ta atre'? Xa ja ri rajaf ri ni'e'n xa otz ri nu'on o xa man otz ta. Ruma ri Ajaf Dios can c'o nojiel poder riq'uin chi nu'on cha chi choj nic'ujie'. 5Ic'o niqui'ej chi c'o k'ij ri altíra quikalien, y ic'o nic'aj chic niqui'ej chi nojiel k'ij xa i-junan. Y rumare' otz tiquib'ana' pensar chiquijunal ri chica niqui'an. 6Ruma ic'o nic'aj niquicha' ri k'ij chi niquiya' ruk'ij ri Dios. Y ic'o nic'aj ri man jun k'ij niquicha', ruma chiquivach ijeje' nojiel k'ij nic'atzin chi niyo'x ruk'ij ri Dios. Ri niquitej nojiel, niquiya' ruk'ij ri Dios, ruma niquiya' tiox b'a' cha. Y ri man niquitej ta nojiel, can niquiya' ruk'ij ri Dios, ruma niquiya' tiox b'a' cha. 7Antok ojc'as choch-ulief, can ja ri Cristo ri Kajaf, y quire' je' antok xkucon. 8Antok ojc'as choch-ulief, can richin jaja' ri kac'aslien. Y quire' je' antok nkucon, can richin jaja' ri kacamic. Rumare' xa ojc'as o nkucon-el, can oj richin ri Cristo. 9Ri Cristo xcon y xc'astaj-pa chi xuoc Kajaf. Jaja' ri Kajaf ojre' ri c'a ojc'as y Cajaf je' ri i-quiminak chic el. 10Pero atre', ¿karruma na'ej chi man otz ta nu'on ri av-hermano? O atre' je', ¿karruma na'an cha ri av-hermano chi manak-oc rakalien? Ruma konojiel xkub'aka choch ri ru-tribunal ri Cristo chi nkoj'an juzgar. 11Inche'l nu'ej chupan ri ruch'ab'al ri Dios ri tz'ib'an can: Ri Ajaf nu'ej: Inre' ri c'aslic Dios, quinojiel vinak xca'xuquie' chinoch inre', y xtiqui'ej chi can ketzij chi inre' ri Dios. Quire' ri tz'ib'an can. 12Y rumare' antok xtalka ri k'ij, chikajunal xtakajach cuenta cha ri Dios. 13Rumare', man chic taka'ej chi man otz ta ri nu'on jun ka-hermano. Pa ruc'axiel re', xa katija' kak'ij chi quire' man naka'an ta cha jun hermano chi nitzak o nu'on ruch'o'j. 14Y inre' vata'n y cukul nuc'u'x riq'uin ri Ajaf Jesús chi man jun ri nitij xajan choch ri Dios. Pero xa choch jun xajan nitij, choch jaja' man otz ta. 15Pero xa ruma natej nojiel, na'an cha jun ri man nutej ta nojiel chi caca' ruc'u'x nu'on-ka y nitzak avuma atre', chire' nik'alajin chi man navajo' ta. Man c'a ta'an quire' chi xa ruma ri natej natzak jun hermano, ruma ri Cristo xcon je' ruma ri hermano re'. 16Man tiya' lugar chi nca'ch'o' itziel chivij. 17Ruma ri ru-reino ri Dios man ja ta ri nitij o ri nikun. Ri nic'atzin ja chi ri ic'o chupan niquic'uaj jun choj c'aslien y nic'ujie' ri paz pa cánima y nca'quicuot ruma c'o ri Espíritu Santo quiq'uin. 18Ruma xa c'o pan ic'aslien nojiel ri xin'ej yan, can k'alaj chi nti'an ri nrajo' ri Cristo y nquixka choch ri Dios y chiquivach je' ri vinak. 19Rumare' katija' kak'ij chi quire' man jun ayoval chikacajol, y chi nakatola-ki' chi nkojq'uiy chupan ri kac'aslien choch ri Dios. 20Man tavulij rusamaj ri Dios ruma ri nitij. Can ketzij chi nojiel otz nca'tij, pero xa c'o jun ri nitzak ruma ri nutej jun chic, man otz ta ri nu'on. 21Otz chi man tac'ux ch'ac chiquivach ri man niquic'ux ta, ni man takun vino, ni man ta'an chica-na kax ri nu'on cha jun hermano chi nipa royoval, nitzak o nuya' can ri Dios. 22¿Acukub'an ac'u'x riq'uin ri Dios? Xa atre' avata'n chi choch ri Dios otz nitij nojiel, man ta'ej chica quinojiel chi tiquib'ana' quire' je'. Y xa otz nojiel ri na'an y ri avánima quire' je' nu'ej chava, can ja'al ncaquicuot rumare'. 23Pero ri xa ca'ye' quic'u'x niquitej jun kax, can pecado ri niqui'an. Ruma chica-na ri niqui'an y xa ca'ye' quic'u'x, can pecado ri niqui'an.

will be added

X\