Romanos 13

1Can nic'atzin chi konojiel nkojniman chica ri autoridades. Ruma quinojiel ri autoridades ja ri Dios i-ya'yuon, y jaja' ya'yuon ri autoridad pa quik'a'. 2Rumare', xa man nkojniman ta chica ri autoridades, riq'uin ri Dios naka'an-ve ayoval, ruma ja ri Dios i-ya'yuon ri autoridades. Y xa quire' naka'an, kayuon nakayuoj-ka ri castigo pa kave'. 3Jun autoridad man nuya' ta castigo pa quive' ri niqui'an ri otz, jo'c pa quive' ri i-b'anoy itziel tak kax nuya-ve ri castigo. Can kab'ana' ri otz, chi quire' man jun chica ni'an chika. Y xa ruyuon otz naka'an, otz nkojtz'iet cuma ri autoridades. 4Ruma ri Dios i-ruyo'n ri autoridades chi nkojquichajij. Pero xa naka'an ri man otz ta, kaxi'ij-ki' chiquivach, ruma ijeje' xca'yo'n ri castigo pa kave'. Can i-yo'n ruma ri Dios chi niquiya' castigo pa quive' ri i-b'anoy itziel tak kax. 5Rumare' nic'atzin chi nkojniman chica ri autoridades, ruma quire' nu'ej ri kajaluon y ri kánima chika y man jo'c ta ruma man nkoj'an ta castigar. 6Mare' katajo' ri impuestos, ruma ja ri Dios ya'yuon quisamaj ri autoridades, chi niqui'an gobernar k'ij-k'ij. 7Can katzoliej kac'as chica ri c'o kac'as quiq'uin. Katajo' ri impuesto richin ri miera ri nakach'ec. Katajo' ri nic'aj chic impuestos. Ri vinak ri c'o ru-respeto, kab'ana' respetar. Ri i-nima'k tak vinak, can kab'ana' chica chi i-nima'k tak vinak. 8Man otz ta nic'ujie' kac'as choj-iq'uin-na, xa kajo-ki'; ruma xa nca'kajo' ri nic'aj chic, can naka'an nojiel ri nu'ej chupan ri ru-ley ri Dios. 9Ri ley re' nu'ej: Ri at-c'ulan, man tavuc'uaj-avi' riq'uin jun chic; man caquimisan; man catalak'; man tatz'ak tzij chirij jun chic; man tarayij chi aviq'uin ta atre' c'o-ve ri c'o riq'uin jun chic. Y c'o je' nic'aj chic kax ri nu'ej ri ley, pero nojiel re' ntuoc chupan jun tzij ri nu'ej: Can inche'l ri navajo-ka-avi' atre', can quire' je' mismo tavajo' ri a-prójimo. 10Xa nca'kajo' ri vinak, man jun itziel naka'an chica. Y quire' naka'an nojiel ri nu'ej chupan ri ley, xa nca'kajo' ri vinak. 11Y tib'ana' nojiel re' ruma ivata'n chica tiempo ojc'o. Ya xalka ri huora chi nquixc'astaj riq'uin ri ivaran, ruma ya nalka ri k'ij antok ri Cristo xkojrucol-el richin xa jun tiempo. Ruma vacame más cierca c'o ri k'ij re', que antok xkanimaj. 12Ri k'aku'n nak'ax yan, y nik'alajin-pa ri k'ij. Rumare', xa c'a nca'ka'an kax richin ri k'aku'n, kaya' can. Nic'atzin chi ja ri luz nakacusaj chi nkuch'acuon chirij ri itziel. 13Ojre' ojc'o chic chupan ri sakil, rumare' kuc'uaj jun c'aslien otz. Man otz ta nkojk'ab'ar, ni man otz ta nak'ax ruve' ri va'en ri naka'an. Man otz ta chi ri achi'a' y ri ixoki' ja ri nurayij ri qui-cuerpo niqui'an; man jun itziel kax nrajo' chi naka'an. Man otz ta nic'ujie-ka ayoval chikacajol y itziel nakatz'at jun ruma otz c'o. 14Nic'atzin chi jo'c jun naka'an riq'uin ri Ajaf Jesucristo, y man taka'an pensar nakaya' lugar chica ri itziel tak kax ri nurayij ri ka-cuerpo.

will be added

X\