Romanos 12

1Hermanos, ri Dios can nujoyovaj kavach. Rumare' ni'an rogar chiva chi can tijacha-ivi' pa ruk'a' jaja'. Can inche'l nti'an chica ri chicop ri ntiya' cha ri Dios, quire' je' tib'ana' ixre', tiya' ri ic'aslien cha ri Dios. Jun c'aslien santa, inche'l ri nrajo' jaja', y quire' nik'alajin chi can ketzij ntiya' ruk'ij ri Dios. 2Man tivuc'uaj ri quic'aslien ri vinak ri man quiniman ta ri Dios. Xa tiya' lugar cha ri Dios chi nuc'ax ri ino'j, chi quire' xtic'axtaj ri ic'aslien. Y quire' xtivatamaj ri chica nrajo' ri Dios chi nti'an. Ri nrajo' jaja', ja ri otz, ri nika choch y ri ja'al. 3Ruma ri ru-favor ri Dios, xiruya' chupan ri rusamaj. Rumare' ni'ej chiva ixvonojiel: Man ti'an chi ix nima'k tak vinak, ruma man otz ta quire' nti'an. Can titz'ata-ka-ivi' xa can ketzij icukub'an ic'u'x riq'uin ri Dios y nti'an ri samaj ri yo'n chiva ruma ri Dios. Pero man junan ta roch kasamaj ruyo'n chika konojiel. 4Can inche'l rub'anun ri ka-cuerpo, c'o ruk'a', c'o rakan, c'o nak'aroch, pero man junan ta quisamaj. 5Y quire' je' ojre' ri kaniman ri Cristo, oj q'uiy y man junan ta kasamaj. Pero junan ojc'o y nakatola-ki' ruma jo'c jun kab'anun riq'uin ri Cristo. 6Ruma ri favor ri patanak chicaj ruyo'n jun kasamaj chikajunal, y ri samaj ri xrajo' ri Dios, jare' ri xuya' chika. Rumare', xa c'o ri nu'ej ri Dios cha jun, can tu'ej chica ri nic'aj chic. Y tu'ej c'a chi cukul ruc'u'x riq'uin ri nu'ej. 7Xa yo'n cha jun chi nca'ruto' nic'aj chic, ca'ruto'. Xa yo'n cha jun chi nca'rutijuoj nic'aj chic, ca'rutijuoj. 8Xa yo'n cha jun chi nuya' ruchuk'a' cánima nic'aj chic, can quire' tub'ana'. Xa yo'n cha jun chi nca'ruto' riq'uin miera, ca'ruto' riq'uin nojiel ránima. Xa yo'n cha jun chi nuc'uan quichin nic'aj chic, can tutija' ruk'ij chi otz nu'on cha. Xa yo'n cha jun chi nujoyovaj quivach ri nic'aj chic, can tiquicuot antok nu'on quire'. 9Can tivajo-ivi' chib'il-ivi' riq'uin nojiel ivánima, y mani riq'uin ca'ye' ipalaj. Tiya' can ri man otz ta y tib'ana' ri otz. 10Tivajo-ivi' riq'uin nojiel ivánima inche'l xa ivach'alal-ivi' y tib'ana' respetar-ivi'. 11Man quixk'oran, xa riq'uin nojiel ivánima tib'ana' ri rusamaj ri Ajaf. 12Tiquicuot ri ivánima ruma ivoyo'ien nojiel ri ru'e'n ri Dios chiva. Tic'ujie' i-paciencia chupan ri sufrimiento. Siempre tib'ana' orar. 13Antok ic'o ri i-ralc'ual chic ri Dios ri c'o nic'atzin chica, qui'ito'. Tiya' qui-posada antok nicajo' posada. 14Ri vinak ri itziel nca'tz'ato ivichin y niqui'an chiva chi nti'an sufrir, tic'utuj cha ri Dios chi ca'rub'ana' bendecir, y man tic'utuj chi ca'rub'ana' maldecir. 15Quixquicuot quiq'uin ri nca'quicuot, y quixuok' quiq'uin ri nca'uok'. 16Junan ivánima tib'ana' y man tina' chi ix nima'k, xa junan ivach tib'ana' quiq'uin ri manak-oc quikalien y man ti'an pensar chi altíra ino'j. 17Xa c'o jun vinak c'o itziel tak kax nu'on chiva, man ti'an ruc'axiel cha. Can titija' ik'ij chi ntivuc'uaj jun c'aslien otz chiquivach ri vinak. 18Man ti'an ayoval, can titija' ik'ij chi nquixc'ujie' en paz quiq'uin quinojiel vinak. 19Ixre' ri altíra nquixvajo', ni'ej chiva: Xa ic'o ri nca'b'ano itziel tak kax chiva, man ti'an ruc'axiel chica. Xa tiya' pa ruk'a' ri Dios, ruma jaja' ri xtiyo'n ruc'axiel chica ruma ri niqui'an. Inche'l nu'ej ri Dios chupan ri tz'ib'an can: Inre' nquib'ano castigar, y inre' je' xquiyo'n ruc'axiel chica ri niqui'an pecado. Quire' nu'ej ri Ajaf. 20Y rumare' ri ruch'ab'al ri Dios ri tz'ib'an can, nu'ej: Xa ninem rupan ri itziel ncarutz'at, taya' ruvay, y xa chake'j ruchi', taya' ruya', ruma xa quire' xta'an, jaja' xtiq'uix ruma ri itziel tak kax ri rub'anun chava. Quire' nu'ej ri tz'ib'an can. 21Man tiya' lugar chi nquixch'acataj ruma ri itziel tak kax ri ni'an chiva. Ixre' ja ri otz tib'ana' y jare' ri xtich'acuon chirij ri itziel.

will be added

X\