Romanos 11

1Y inre' ni'ej chiva: ¿Ruyo'n came can ri Dios ri rutanamit? Man quire' ta. Ruma inre' can in israelita. Y in rumáma can ri Benjamín y ri Benjamín rumáma can ri Abraham. 2Ri Dios man ruyo'n ta can ri rutanamit; ri Dios can pa rutz'ucb'al-pa rajo'n-pa. ¿Man ivata'n ta ri nu'ej chupan ri ruch'ab'al ri Dios ri tz'ib'an can chirij ri Elías? Ri Elías xch'o' riq'uin ri Dios chiquij ri ruvanakil israelitas, y xu'ej: 3Ajaf, xa'quivulij ri altares ri avichin atre' y xa'quiquimisaj ri nic'aj chic a-profetas. Xa nuyuon chic inre' inc'o can y nquinquicanuj je' chi nquinquiquimisaj. Quire' xu'ej ri Elías cha ri Dios. 4¿Y chica xu'ej ri Dios cha ri Elías? Ri Dios xu'ej: Man ayuon ta atc'o can. C'a ic'o i-siete (ivuku') mil ri ic'o can, ri man quiyo'n ta ruk'ij ri ídolo Baal. Quire' xu'ej ri Dios cha ri Elías. 5Y quire' je' vacame c'o jun ch'iti grupo kavanakil israelitas ri i-cho'n ruma ri ru-favor ri Dios. 6Ri i-cho'n ruma ri Dios, man i-cho'n ta ruma otz ri nca'qui'an pa quic'aslien; ijeje' i-cho'n, xa ruma ri ru-favor ri Dios. Xa ta i-cho'n ruma ri otz ri nca'qui'an pa quic'aslien, man ta ni'e'x chi i-cho'n ruma ri ru-favor ri Dios. 7Y re' nuc'ut chakavach chi ri nic'aj kavanakil ri i-cho'n ruma ri Dios xquil yan jun utzulaj c'aslien riq'uin ri Dios. Pero ri nic'aj chic kavanakil ri man i-cho'n ta ruma ri Dios, xa x'an cof cha ri cánima. 8Inche'l nu'ej chupan ri ruch'ab'al ri Dios ri tz'ib'an can: Ri Dios xuya' chica inche'l jun tremenda varan, xa inche'l man nca'tzu'n ta y inche'l man nca'c'axan ta. C'a quire' quib'anun vacame. Quire' nu'ej chupan ri tz'ib'an can. 9Y ri David ru'e'n can je': Ri quinamak'ej xtuoc ta qui-trampa y xtuoc ta inche'l ya'l ri nca'ka chupan. Ja ta re' ri xtitzako quichin y xtuoc qui-castigo. 10Xtik'akumir c'a ri quinak'avach, chi quire' man xca'tzu'n ta; can luculic ta quij xtiqui'an richin nojiel tiempo. Quire' ri ru'e'n can ri David. 11Inre' man ni'ej ta chi ri kavanakil xquitupij cakan y xa'tzak richin xa jun tiempo. Man quire' ta. Pero ruma man xquinimaj ta ri ruch'ab'al ri Dios, mare' ri Dios nca'rucol ri vinak ri man israelitas ta, xa richin nuc'asuoj pa cánima ri israelitas chi niquinimaj ta ri ruch'ab'al. 12Ri israelitas xquiya' can ri Dios, y rumare' ri Dios xuya' ri ru-bendición chica nic'aj chic vinak ri man israelitas ta. Pero más q'uiy ri bendición ri xca'pa antok ri kavanakil israelitas xtiquinimaj. 13Y c'o je' ri nivajo' ni'ej chiva ixre' ri man ix israelitas ta: Inre' in jun apóstol ri in-takuon-pa iviq'uin ixre' ri man ix israelitas ta. Can niya' ruk'ij ri nusamaj, 14ruma nivajo' nic'asuoj pa cánima ri nuvanakil israelitas chi nca'colotaj ta nic'aj, antok niquitz'at ri nusamaj. 15Ri Dios xa'ru'on recibir ri man israelitas ta, y jare' ri xu'on ri Dios antok xa'ruya' can ri nuvanakil israelitas. Pero antok ri nuvanakil xtiquinimaj chic ri Dios y jaja' xca'ru'on chic recibir, después xca'c'astaj y xtiquic'uaj jun c'ac'ac' c'aslien. 16Ri israelitas can i-cho'n na'ay. Can i-inche'l ri na'ay tak simíta ri niyo'x choch ri Dios. Xa ri na'ay tak simíta ri niyo'x choch ri Dios can i-sagrada, quire' je' ri nic'aj chic simíta. Y xa i-cho'n ri ruxie', i-cho'n je' ri ruk'a'. 17Ri nuvanakil israelitas can i-inche'l ri chie' rub'inan olivo, can ja'al ticuon. Pero ic'o ruk'a' ri xa'juok'-el. Y ixre' ri man ix israelitas ta man ix ruk'a' ta ri chie' re', xa ix richin jun chic olivo ri man ticuon ta, ri xa ruyuon xiel-pa. Pero xixyo'x paro' ri chie' ri ticuon y q'uiy bendición iviluon. 18Pero man otz ta chi ntina-ka-ivi' chi ix nima'k y nti'an chica ri nuvanakil chi man jun quikalien ruma xa'lasas-el. Man otz ta nti'an quire', ruma ivata'n chi man ja ta ri ruk'a' ri chie' ri tz'amayuon ri ruxie', xa ja ri ruxie' ri tz'amayuon ri ruk'a' ri chie'. Y ixre' xa ix ruk'a' ri chie' y man ix ruxie' ta. 19Y ixre' nti'ej: Ojre' otz kab'anun ruma ic'o ruk'a' ri chie' ri xa'juok'-el, richin chi ojre' ri xojyo'x can pa quic'axiel. 20Can ketzij chi ijeje', ruma man xquinimaj ta ri Dios, rumare' xa'lasas-el. Pero ixre' xa ruma icukub'an ic'u'x riq'uin ri Dios ixc'o can pa quic'axiel. Ruma c'a re' man tina-ka-ivi' chi ix otz. Xa tixi'ij-ivi'. 21Ruma ivata'n chi ri Dios man xa'ru'on ta perdonar ri nuvanakil israelitas. Xa xa'ralasaj-el, mesque ijeje' can i-ruk'a' ri chie'. Xa quire' xu'on quiq'uin ijeje', ixre' je' man nquixru'on ta perdonar. 22Can tivatamaj chi ri Dios altíra otz runo'j, pero jaja' can nu'on juzgar ri pecado. Jaja' nuya' ri castigo chica ri man xquinimaj ta rutzij. Chiva ixre' otz runo'j rub'anun, pero siempre tiya' ivánima riq'uin. Ruma xa man quire' ta xti'an, ixre' je' xquixlasas-el. 23Y xa ri nuvanakil niquinimaj chic, ri Dios nca'ruya' chic jun b'ay paro' ri chie' olivo, ruma choch ri Dios man jun cuesta chi nu'on. 24Ixre' can ix inche'l ruk'a' jun chie' olivo ri man xtic ta, xa ruyuon xiel-pa; pero xixlasas-pa riq'uin ri chie' re' y xixyo'x paro' ri chie' olivo ri can ticuon, mesque man ix richin ta ri chie' re'. Y xa quire' x'an chiva ixre', más xti'an chica ri nuvanakil israelitas, ijeje' can xca'yo'x chic jun b'ay paro' ri chie' ri can ticuon; ruma ijeje' can i-richin ri chie' re'. 25Hermanos, inre' nivajo' chi ixre' ntina'iej ri c'o pan aval riq'uin ri Dios ojier can tiempo, chi quire' man tina-ka-ivi' ixre' chi más ix otz chiquivach ri israelitas. Ri nuvanakil israelitas ri cof cánima quib'anun, quire' xca'c'ujie', c'a xca'tz'akat-na ri man israelitas ta chi xca'colotaj. 26C'ajare' xca'colotaj ri nuvanakil israelitas. Inche'l nu'ej ri ruch'ab'al ri Dios ri tz'ib'an can: Ri Jun ri nicalo, xtipa pa tanamet Sion, y xtiralasaj-el ri itziel tak no'j chiquicajol ri rumáma can ri Jacob. 27Y inre' xtinvalasaj-el ri qui-pecados, ruma jare' ri pacto ri xin'an quiq'uin. Quire' nu'ej ri Dios chupan ri tz'ib'an can. 28Ic'o nuvanakil israelitas itziel niquitz'at ri Dios ruma man quiniman ta ri evangelio. Y ruma man quiniman ta, ri Dios xuya' ri ruch'ab'al chiva ixre' ri man ix israelitas ta. Pero ri Dios c'a altíra nca'rajo' ri nuvanakil, ruma i-rucho'n y ruma je' ri ru'e'n chica ri ojier tak kate't-kamama'. 29Ruma antok ri Dios nuya' jun kax, man xtumaj ta chic; y antok nrayuoj ri rutanamit, man xtuc'ax ta chic ri rutzij. 30Ojier can, ixre' ri man ix israelitas ta man xixniman ta cha ri Dios. Pero antok ri nuvanakil israelitas xquiya' can ri Dios, jaja' xujoyovaj ivach ixre'. 31Ri nuvanakil man quiniman ta ri Dios vacame, pero xtalka ri k'ij antok ri Dios xtujoyovaj chic quivach jun b'ay, y xtiqui'an chic recibir ri inche'l xu'on chiva ixre'. 32Ri Dios ru'e'n chi quinojiel vinak c'o qui-pecado; richin nujoyovaj quivach quinojiel. 33¡Ri Dios can altíra otz, can q'uiy no'j c'o riq'uin! ¡Man jun nicovin ni'e'n ri runo'j y man jun nicovin ni'e'n karruma nu'on ri nu'on! 34Ruma ri tz'ib'an can chupan ri ruch'ab'al ri Dios nu'ej: ¿C'o came jun vinak runa'ien ri chica nu'on pensar ri Ajaf Dios? ¿O c'o came jun ri nitiquir nu'ej cha ri Dios ri chica otz chi nu'on? 35¿O c'o came jun vinak ri nusipaj jun kax na'ay cha ri Dios, y ri Dios c'ajare' xtuya-pa ruc'axiel cha? Quire' nu'ej ri tz'ib'an can. 36Ruma jaja' ri xb'ano nojiel. Can riq'uin jaja' patanak nojiel. Y nojiel ri xa'ru'on, can richin chi niquiya' ruk'ij. Can tiyo'x c'a ruk'ij ri Dios richin nojiel tiempo. Amén.

will be added

X\