1 Hermanos, ri nic'utuj cha ri Dios y ri nurayij ri vánima, ja ta chi ri kavanakil israelitas nca'colotaj. 2 Inre' vata'n chi ijeje' niqui'an ri rusamaj ri Dios, pero man niqui'an ta inche'l rub'anic ri ruc'utun ri Dios. 3 Niqui'an chi man cata'n ta chica modo niqui'an chi quire' ntiel chi manak chic qui-pecado choch ri Dios. Y rumare' niquitej quik'ij chi niqui'an ri niqui'an pensar ijeje', y man nicajo' ta niquinimaj ri Dios. 4 Ri ley xq'uis antok xalka ri Cristo. Quire' xb'anataj, chi quire' chica-na vinak ri xtiniman ri Cristo, ntiel chi manak chic ru-pecado choch ri Dios. 5 Ri Moisés rutz'ib'an can ri chica nic'atzin niqui'an ri vinak chi quire' ntiel chi manak chic qui-pecado choch ri Dios ruma ri ley. Jaja' rutz'ib'an can: Ri nib'ano nojiel ri nu'ej ri ley, can xtiril ri c'aslien riq'uin ri Dios. Quire' rutz'ib'an can. 6 Pero ri nic'atzin naka'an chi quire' ntiel chi manak chic ka-pecado choch ri Dios, ja chi takacukub'a' kac'u'x riq'uin ri Cristo. Y mare' nu'ej: Man taka'ej pa kánima: ¿Chica xti'a chila chicaj chi xtirukasaj-pa ri Cristo? Ruma jaja' xka yan pa. 7 Y man taka'ej je': ¿Chica xti'a pache' ic'o-ve ri quiminaki' chi xtiruc'ama-pa ri Cristo? Ruma jaja' ya xc'astaj-el. 8 Ri ch'ab'al chi ncacolotaj xa cierca c'o-ve, xa pan avánima c'o-ve, y pan achi' je'. Quire' nu'ej chupan ri ruch'ab'al ri Dios. Y ja ch'ab'al re' ri nakatzijuoj, y nu'ej chi kacukub'a' kac'u'x riq'uin ri Jesucristo. 9 Y xa atre' na'ej chi ri Jesús jare' ri Ajaf, y xa nanimaj riq'uin nojiel avánima chi jaja' xc'astaj-pa chiquicajol ri quiminaki' ruma ri Dios, xcacolotaj. 10 Chi ncacolotaj y chi ntiel chi manak chic a-pecado choch ri Dios, can riq'uin nojiel avánima tanimaj ri Jesús, y na'ej chi animan. 11 Y chupan ri ruch'ab'al ri Dios ri tz'ib'an can, nu'ej: Quinojiel ri vinak ri xtiquinimaj jaja', man xca'q'uixb'ax ta. Quire' nu'ej ri tz'ib'an can. 12 Oj junan konojiel, oj israelitas o man oj israelitas ta. Ri Ajaf, can Kajaf konojiel y q'uiy ri nuya' chica ri nca'c'utun cha. 13 Inche'l nu'ej chupan ri ruch'ab'al ri Dios ri tz'ib'an can: Quinojiel ri xtiquic'utuj cha ri Ajaf chi ca'rucalo', can xca'colotaj-ve. Quire' nu'ej. 14 ¿Pero chica modo xtuc'utuj jun chi ticuol ruma ri Jesucristo, y xa man nunimaj ta chi jaja' ri nicalo? ¿O che'l xtunimaj, xa man jun raxan chirij ri Jesucristo? ¿Y che'l xtira'xaj, xa man jun nitzijuon cha? 15 ¿Y che'l xtitzijos ri ruch'ab'al ri Dios, xa man jun nitak-el? Pero chupan ri ruch'ab'al ri Dios ri tz'ib'an can, nu'ej: ¡Can altíra ja'al ri cakan ri i-b'anak chutzijoxic ri evangelio; ri niquitzijuoj ri chica modo nic'ujie' ri paz! Quire' nu'ej chupan ri tz'ib'an can. 16 Pero man quinojiel ta vinak nca'niman ri nu'ej ri evangelio. Inche'l rutz'ib'an can ri profeta Isaías: Ajaf, ¿chica xniman ri atzij ri xkatzijuoj? Quire' ri rutz'ib'an can. 17 Chi nakacukub'a' kac'u'x, nic'atzin chi na'ay nakaxaj ri ch'ab'al. Y ri ch'ab'al ri nic'atzin nakaxaj, ja ri ruch'ab'al ri Dios. 18 Y inre' ni'ej: ¿Man ivaxan ta came ri ruch'ab'al ri Dios? Chupan ri tz'ib'an can, nu'ej: Choch nojiel ri roch-ulief i-b'anak ri nca'tzijuon richin. Y chica-na lugar ic'o vinak, chire' niquitzijuoj je'. Quire' ri tz'ib'an can. 19 Y inre' ni'ej je', chi ri kavanakil israelitas cata'n ri nu'ej ri ruch'ab'al ri Dios. Na'ay katz'ata' ri nu'ej ri Dios chupan ri rutz'ib'an can ri Moisés: Ic'o ri man i-nutanamit ta y man jun cata'n. Pero xa ja yan chic ijeje' ri xca'ncol y rumare' ixre' israelitas itziel xqui'tz'at y xtipa ivoyoval. Quire' ri tz'ib'an can. 20 Pero más k'alaj ri rutz'ib'an can ri profeta Isaías, ri nu'ej: Ri vinak ri man xa'canun ta vichin, xinquil. Can xinc'ut-vi' chiquivach, mesque man xquic'utuj ta pache' inc'o-ve. Quire' ri tz'ib'an can. 21 Pero ri Dios nu'ej chiquij ri kavanakil israelitas: Can k'ij-k'ij nca'nvayuoj chi nca'pa viq'uin y nujakuon nuk'a' chi i-voyo'ien, pero ijeje' xa man nca'niman ta y man nicajo' ta niqui'an ri ni'ej chica. Quire' ri tz'ib'an can.
