Romanos 1

1Inre' Pablo in jun ru-siervo ri Jesucristo, y xinayox chi xinuoc apóstol. Ri Dios xirucha' chi nitzijuoj ri ru-evangelio, 2ri ranun prometer chupan ri santo ruch'ab'al ri quitz'ib'an can ri profetas ri xa'c'ujie' ojier can tiempo, 3chirij ri Ruc'ajuol, y re' ja ri Kajaf Jesucristo. Y antok ri Jesucristo xpa vave' choch-ulief, xuoc vinak inche'l ojre', y jaja' rumáma can ri rey David. 4Y can xk'alajin riq'uin poder chi Ruc'ajuol ri Dios antok xc'astaj-pa chiquicajol ri quiminaki', ruma ri Espíritu ri c'o riq'uin, can Santo. 5Y ruma jaja' altíra nkojrajo', xu'on favor chika chi xojuoc apóstoles. Quire' xu'on chika, ruma xrajo' chi pa rub'e' jaja' nakatzijuoj ri ruch'ab'al nojiel naciones. Jaja' nrajo' chi quinojiel ta vinak niquicukub'a' quic'u'x riq'uin y xca'niman ta cha. 6Y chiquicajol quinojiel ri xa'rayuoj ri Jesucristo, ixc'o ixre' chi xixuoc richin. 7Y va carta va nitak-el chiva ixre' hermanos, ri ixc'o chire' pa tanamet Roma. Ri Dios altíra nquixrajo' y rumare' xixrayuoj chi xixuoc santos ralc'ual. Ja ta ri favor y ri paz ri nuya' ri Katata' Dios y ri Ajaf Jesucristo tic'ujie' riq'uin ivánima. 8Na'ay niya' tiox b'a' cha ri Dios pa rub'e' ri Jesucristo ivuma ixre', ruma nitzijos choch nojiel ri roch-ulief chi ixre' icukub'an ic'u'x riq'uin ri Dios. 9Y ri Ka-Dios can rata'n chi siempre ni'an orar pan i-cuenta; ri Dios ri can riq'uin nojiel vánima ni'an servir. Can nitzijuoj ri ru-evangelio ri Ruc'ajuol. 10Y nic'utuj cha ri Dios chi xtu'on ta chuva chi xquitiquir ta xquib'aka iviq'uin, xa quire' nrajo' jaja'. Q'uiy yan tiempo nurayin chi nquib'aka iviq'uin. 11Ruma nivajo' nquixtz'at, y nivajo' nquixto', chi quire' ixre' ntivatamaj más chirij ri nuya' ri Espíritu Santo, richin quire' más nticukub'a' ic'u'x riq'uin ri Dios. 12O más otz ni'ej chi nakatola-ki', chi nic'ujie' más ruchuk'a' ri kánima. Ixre' nquinito' y inre' nquixto', y quire' xtaka'an ruma junan kacukub'an kac'u'x riq'uin ri Jesucristo. 13Hermanos, inre' nivajo' chi ixre' ntina'iej chi q'uiy mul nub'anun pensar chi nqui'a iviq'uin, pero hasta vacame b'anun impedir chinoch. Can nivajo' chi nic'ujie' fruto pan ic'aslien, inche'l rub'anun ri nusamaj quiq'uin iq'uiy vinak ri man israelitas ta. 14Inre' inche'l c'o nuc'as, rumare' nic'atzin chi nitzijuoj ri ruch'ab'al ri Dios chica ri vinak griegos y chica ri man i-griegos ta, chica ri can q'uiy cata'n y chica je' ri man jun oc cata'n. 15Rumare' inre' can nivajo' nitzijuoj ri evangelio chiva ixre' ri ixc'o Roma. 16Inre' man nquiq'uix ta nitzijuoj ri evangelio, ruma can ru-poder ri Dios chi nca'rucol ri nca'niman richin. Na'ay xtzijos chica ri israelitas; después xtzijos je' chica ri man israelitas ta. 17Ri evangelio nuc'ut chakavach ri chica xu'on ri Dios, chi quire' ntiel chi man jun chic ka-pecado choch. Antok nakacukub'a' kac'u'x riq'uin, jare' antok nu'on chika chi man jun chic ka-pecado choch. Inche'l nu'ej chupan ri ruch'ab'al ri Dios ri tz'ib'an can: Jun vinak ri choj chic ruc'aslien, can xtic'ujie' riq'uin ri c'aslien ri man niq'uis ta, ruma rucukub'an ruc'u'x riq'uin ri Dios. Quire' nu'ej ri tz'ib'an can. 18Ya nik'alajin chi ri Dios ri c'o chila chicaj can patanak rayoval pa quive' ri vinak ri man otz ta quic'aslien choch y man niquijoyovaj ta quivach nic'aj chic. Y ruma itziel niqui'an, quik'atuon ri ketzij. 19Ijeje' c'o ta ri xcatamaj chirij ri Dios, ruma ri Dios xuc'ut chiquivach. 20Ri Dios man nitz'iet ta. Pero ri roch-ulief y ri nic'aj chic kax ri xa'ru'on, can nca'tz'atataj, y ruma nojiel ri kax re', k'alaj chi c'o ri Dios. Pa rutz'ucb'al-pa ri roch-ulief xk'alajin chiquivach ri vinak chi c'o ri Dios, y k'alaj je' chi ri ru-poder man niq'uis ta. Rumare' ri vinak man xca'tiquir ta xtiqui'ej: Ojre' man jun ka-pecado ruma man jun x'e'n chika chi c'o ri Dios. 21Ijeje' cata'n chi c'o ri Dios, pero man quiyo'n ta ruk'ij, ni man quiyo'n ta tiox b'a' cha, xa ja ri man jun quikalien ri niqui'an pensar; i-nacanak y ri cánima xa pa k'aku'n c'o-ve. 22Niqui'ej chi q'uiy cata'n, y xa más nacanak xqui'an-ka. 23Ruma man niquiya' ta ruk'ij ri Dios ri man nicon ta. Xa ja ri nca'con ri niquiya' quik'ij. Ruma hasta i-quib'anun qui-imágenes vinak, qui-imágenes chicop ri c'o quixic', qui-imágenes cumatz y qui-imágenes ri c'o caje' cakan; y jare' ri niquiya' quik'ij. 24Rumare' ri Dios xa'ruya' can chi tiquic'uaj ri itziel c'aslien, ruma xa jare' nurayij ri cánima. Can xa'qui'an-ka pecado riq'uin ri qui-cuerpo chiquivach-ka ijeje' mismo. 25Xa xquic'ax ri ketzij, ruma man xa'a ta chirij ri ketzij Dios y xa chiquij ri ídolos xa'a-ve. Man xquiya' ta ruk'ij ri Dios ni man xqui'an ta servir. Xa ja ri kax ri b'anun ruma ri Dios ri xquiya' quik'ij. Pero xa ja ri Dios ri niyo'x ruk'ij richin nojiel tiempo. Amén. 26Y ruma quire' niqui'an, ri Dios xa'ruya' can chi ca'c'uax ruma nojiel ri itziel tak kax ri niquirayij pa tak cánima; ri can nuya' q'uix. Rumare' ic'o ixoki' man xa'cajo' ta chic achi'a', xa quiq'uin chic ixoki' xquic'uaj-qui'. 27Y quire' je' ri achi'a', man xa'cajo' ta chic ixoki', xa achi'a' yan chic xa'quicanuj y xquic'uaj-qui' quiq'uin. Q'uiy itziel tak kax ri xa'qui'an, y man xa'q'uix ta; can xquijach-qui' chupan ri itziel tak kax ri niquirayij. Y ijeje' mismo nca'tajo nojiel ri itziel b'ay ri xquic'uaj. 28Ijeje' xqui'an pensar chi man nic'atzin ta chica ri Dios. Rumare' ri Dios xa'ruya' can chi itziel niqui'an pensar y tiquib'ana' ri man otz ta. 29Can nojnak ri cánima riq'uin nojiel itziel tak kax, ri achi'a' y ri ixoki' niquicanuj-qui' chi niqui'an pecado, nca'qui'an itziel tak kax chica nic'aj chic, siempre niquirayij ri kax ri c'o riq'uin jun chic, q'uiy itziel tak kax niquirayij niqui'an chica nic'aj chic, can altíra itziel niquitz'at jun chic ruma otz c'o, nca'quimisan, niqui'an ayoval, niqui'an maña, nojiel kax itziel niqui'an, 30jo'c tzij niqui'an chiquij nic'aj chic, can altíra itziel niqui'ej chiquij nic'aj chic y man nicajo' ta ri Dios. Y niqui'ej chi ijeje' c'o quik'ij, can altíra i-nima'k niquina-qui', can siempre niqui'an pensar chica modo niqui'an ri itziel kax, man nca'niman ta chica ri quitie-quitata', 31i-nacanak, man niqui'an ta ri niqui'ej, man nca'cajo' ta ri calc'ual ni ri quitie-quitata', man nca'cach'uon ta y man niquijoyovaj ta quivach nic'aj chic. 32Ijeje' cata'n chi ri Dios ru'e'n chi quinojiel ri nca'b'ano itziel tak kax inche'l re', can xtika ri camic pa quive'. Pero mesque cata'n, can niqui'an nojiel ri itziel tak kax inche'l re', y ijeje' nca'quicuot antok ic'o nic'aj chic ri quire' niqui'an.

will be added

X\