Apocalipsis 9

1Y antok ri chi vu'uo' ángel xuxupuj ri ru-trompeta, xintz'at chi c'o jun estrella (ch'umil) ri xtzak-pa chicaj y choch-ulief xka-ve. Y cha ri estrella (ch'umil) re', xyo'x ru-llave ri jul ri man niq'uis ta rakan ri can k'aku'n rupan. 2Y xb'arujaka-pa ruchi' ri jul ri man niq'uis ta rakan ri can k'aku'n rupan. Y chupan ri jul re' altíra seb' xb'a'iel-pa, inche'l rusib'il jun nem horno. Ri seb' ri xiel-pa chire', xutz'apij roch ri k'ij, y k'aku'n xu'on cha ri chicaj. 3Y chupan ri seb' re', xa'b'a'iel-pa sac' y xa'a choch ri ulief. Y xyo'x poder chica chi niqui'an inche'l niqui'an ri alacranes ri ic'o choch-ulief. 4Y x'e'x chica chi man jun kax tiqui'an chica ri chie', ri tico'n o nojiel roch k'ayis; xa jo'c chica ri vinak ri manak ru-sello ri Dios chi'quivach. 5Y x'e'x chica chi man ca'quiquimisaj ri vinak, jo'c chi tiquina' ruquiy vu'uo' ic'. Y ri ruquiy re' can inche'l ri ruquiy ri niquiya' ri alacranes antok niquicak' jun vinak. 6Y ri k'ij re', ri vinak xtiquicanuj quicamic ruma ri ruquiy ri niquik'asaj, pero xa man xca'con ta. Can altíra xtiquirayij quicamic, pero ri camic xa man nalka ta. 7Ri sac' re' inche'l quiej ri i-chojmin chic chi nca'a pa guerra. Pa quijaluon quic'uan inche'l corona ri b'anun cha oro, y ri quipalaj can inche'l quipalaj vinak. 8C'o je' quive' inche'l quive' ixoki', ri coray inche'l coray león (coj), 9ri quij can inche'l ch'ich', ri quixic' altíra bulla niqui'an, can inche'l q'uiy carruajes i-chiririen cuma quiej ri cha'nin i-b'anak pa guerra. 10Ri quijay inche'l quijay alacranes, y chutza'n c'o ri qui-pansuoña. Y riq'uin re', nca'covin niqui'an chica ri vinak chi niquina' ruquiy vu'uo' ic'. 11Y ri qui-rey ri sac', ja ri ángel ri richin ri jul ri man niq'uis ta rakan ri can k'aku'n rupan. Ri qui-rey ri sac' re', Abadón ni'e'x cha pa ch'ab'al hebreo, y Apolión ni'e'x cha pa ch'ab'al griego. 12Ya xak'ax ri na'ay sufrimiento, pero c'a c'o ca'ye' chic ri maja' ta'k'ax. 13Y antok ri chi vaki' ángel xuxupuj ri ru-trompeta, xinva'xaj chi c'o jun xch'o-pa chiquicajol ri caje' uc'a' ri ruc'uan ri altar ri b'anun cha oro, ri c'o choch ri Dios, 14y xu'ej cha ri chi vaki' ángel ri xuxupuj ri ru-trompeta: Ca'quira' ri icaje' ángeles ri i-ximil chuchi' ri nem río Eufrates. 15Y ja xa'quir ri icaje' ángeles, chi nca'quiquimisaj vinak. Ruma ri icaje' ángeles re' can i-yacuon richin ri huora, ri k'ij, ri ic' y ri juna' re'. Y ja ri oxe' parte ri vinak ri ic'o choch-ulief ri xca'quiquimisaj. 16Can iq'uiy soldados ic'o quiq'uin. Y xinva'xaj chi quinojiel ri soldados re' i-doscientos millones, y quinojiel c'o quiquiej. 17Y chupan ri inche'l achic' ri xin'an, xa'ntz'at ri quiej; y ri i-ch'acol chiquij quicusan ch'ich' chi niquito' roch-quic'u'x, y ri color ri ch'ich' re' quiak, k'an y azul. Ri quijaluon ri quiej, can inche'l quijaluon león (coj) y pa quichi' ntiel-pa k'ak', seb' y azufre. 18Y ja ri k'ak', ri seb' y ri azufre ri nca'iel pa quichi' ri quiej ri xa'quimisan ri oxe' parte ri vinak ri ic'o choch-ulief. 19Ri quiej re', niquicusaj ri quichi' y ri quijay chi niquiya' ruquiy chica ri vinak, ruma ri quijay can inche'l cumatz y c'o quijaluon. 20Pero ri vinak ri man xa'con ta chupan ri sufrimiento re', man xquiya' ta can ri itziel tak kax ri nca'qui'an y man xqui'an ta ri nrajo' ri Dios; ruma c'a xa'quiya' quik'ij ri itziel tak espíritus, xa'quiya' je' quik'ij ri ídolos ri i-quib'anun cha oro, plata, bronce, ab'aj, y chie', y ri ídolos re' xa man nca'tzu'n ta, man nca'c'axan ta y man nca'in ta je'. 21Ri vinak re' man xquiya' ta can ri b'anoy-camic, ri hechicerías (b'anaquil), ri alak' y ri achi'a' y ri ixoki' can xquicanuj-qui' je' chi xqui'an pecado.

will be added

X\