Apocalipsis 5

1Y xintz'at chi ri Jun ri tz'uyul pa ru-trono, ruc'uan pa ruk'a' derecha jun vuj ri b'atuon roch (rollo). Ri vuj re', tz'ib'an choch y chirij, y tz'apin cha siete (vuku') sellos. 2Y xintz'at je' jun ángel ri altíra ruchuk'a', y cof nich'o' nuc'utuj: ¿Chica nuc'ul chi nujak ri vuj re' y nralasaj-el ri siete (vuku') sellos ri tz'apin cha? xcha'. 3Y man jun chiquivach ri ic'o chicaj, ni choch-ulief, ni chuxie' ka ri ulief nuc'ul chi nujak ri vuj, ni jo'c nutz'at b'a'. 4Y inre' altíra nquinuok', ruma man jun xlitaj ri nuc'ul chi nujak ri vuj, chi nu'on leer y chi nutz'at roch. 5Y jun chiquivach ri ch'itak mámix xu'ej chuva: Man catuok', ruma c'o Jun ri nuc'ul nujak ri vuj y nralasaj-el ri siete (vuku') sellos, ruma ya xch'acuon; jaja' can inche'l jun león (coj), rumáma can ri Judá y rumáma can je' ri David, xcha' chuva. 6Y xintz'at Jun pa'l pa nic'aj ri trono, ri icaje' ri c'o q'uiy quinak'avach chiquij y chiquivach, y ri ch'itak mámix. Ri Jun re' ja ri Alaj Oveja ri can k'alaj chi ya xu'on sufrir y ya xak'ax choch camic. Ic'o siete (vuku') ruc'a' y siete (vuku') nak'aroch. Y ri siete (vuku') nak'aroch, jare' ri siete (vuku') ru-espíritus ri Dios ri i-takuon choch-ulief. 7Xpa ri Alaj Oveja, xb'aruc'ama-pa ri vuj ri b'atuon roch (rollo) pa ruk'a' derecha ri tz'uyul pa ru-trono. 8Y antok c'o chic ri vuj pa ruk'a', ri icaje' ri c'o q'uiy quinak'avach chiquij y chiquivach, junan quiq'uin ri veinticuatro ch'itak mámix, xa'xuquie-ka choch ri Alaj Oveja. Quinojiel ijeje' quic'uan arpas y quic'uan je' copas ri i-b'anun cha oro ri i-nojnak riq'uin incienso (puon), jare' qui-oraciones ri quiniman ri Dios. 9Y c'o jun c'ac'ac' b'ix niquib'ixaj, y cava niqui'ej: Atre' ri can nuc'ul xb'ac'ama-pa ri vuj, y nca'valasaj-el ri sellos ri tz'apin cha; ruma atre' xaquimisas, y riq'uin ri aquiq'uiel xojacol konojiel chi xojuoc richin ri Dios; xa chica-na raza, ch'ab'al, tanamet y nación, 10y xa'an chika chi xojuoc reyes y sacerdotes richin ri Katata' Dios, y junan xtaka'an gobernar ri roch-ulief. 11Y antok xitzu'n chic apa jun b'ay, xinva'xaj quikul q'uiy ángeles. Ri ángeles re' ic'o chirij ri trono y ri icaje' ri c'o q'uiy quinak'avach chiquij y chiquivach y ri ch'itak mámix. Ri ángeles ri ic'o chire', can millones y millones. 12Ijeje' cof niqui'ej: Ri Alaj Oveja ri xquimisas, can nuc'ul niyo'x ruk'ij; ni'e'x chi jaja' c'o ru-poder, c'o nojiel b'ayomal, c'o nojiel no'j riq'uin y nojiel nitiquir nu'on. Y ti'an nem cha ri rub'e'. 13Y xa'nva'xaj je' quinojiel ri i-rub'anun ri Dios; ri ic'o chicaj, ri ic'o choch-ulief, ri ic'o chuxie' ka ri ulief, y ri ic'o chupan ri mar, niqui'ej: Ri tz'uyul chupan ri ru-trono y ri Alaj Oveja, tiyo'x ruk'ij, ti'an nem cha ri rub'e', y ti'e'x chi c'o ru-poder richin nojiel tiempo. 14Y ri icaje' ri c'o q'uiy quinak'avach chiquij y chiquivach, xqui'ej: Amén. Y ri veinticuatro ch'itak mámix xa'xuquie-ka y xquikasaj-ka ri quijaluon c'a pan ulief y xquiya' ruk'ij ri c'o ruc'aslien richin nojiel tiempo.

will be added

X\