Apocalipsis 4

1Y después xitzu'n chicaj y xintz'at chi ri chicaj jakal jun puerta, y xinva'xaj chic rukul ri nich'o-pa chuva na'ay, can inche'l nik'ajan jun trompeta. Y xu'ej-pa chuva: Cajotie-pa, y xtinc'ut chavach ri xca'b'anataj-apa. 2Y ja xinna' chi ja ri Espíritu Santo ri c'uayuon vichin; y xintz'at chi chicaj c'o jun trono, y chire' tz'uyul Jun. 3Y ri tz'uyul chupan ri trono re', can altíra nich'ich'an, can inche'l ri ab'aj ri ni'e'x jaspe o cornalina chica. Y ruyo'n vielta chirij ri trono re' jun xocok'a' (arco iris). Y ri xocok'a' (arco iris) re' rax; can inche'l ri ab'aj ri ni'e'x esmeralda cha. 4Y chirij ri trono re' ic'o veinticuatro chic tronos. Y chire' i-tz'uyul-ve veinticuatro ch'itak mámix y quicusan sak tziak, y c'o je' coronas ri b'anun cha oro pa quijaluon. 5Riq'uin ri trono ri c'o pa nic'aj, nca'iel-pa yocopa' y ráya y ch'ab'al. Y ri choch-apa, nca'c'at siete (vuku') lámparas. Y ri siete (vuku') lámparas re', jare' ri siete (vuku') ru-espíritus ri Dios. 6Chire' choch-apa ri trono re' c'o inche'l jun mar ri inche'l vidrio nitz'iet. Y chirij ri trono re' ic'o icaje' ri c'o q'uiy quinak'avach chiquij y chiquivach. 7Ri na'ay chiquivach ri icaje' re', can inche'l jun león (coj). Ri ruca'n inche'l jun alaj váquix. Ri ruox inche'l c'a rupalaj jun ache. Y ri chi caje', can inche'l jun águila ri b'anak chicaj. 8Y ri caje' re' c'o vaki' quixic', y nojnak rij y chuxie' ri quixic' riq'uin quinak'avach. Y ijeje' man jun b'ay nca'tanie' chi niquiya' ruk'ij ri Dios, y chi pak'ij chi chak'a' niqui'ej: Santo, Santo, Santo ri Ajaf Dios ri c'o nojiel poder pa ruk'a'. Jaja' can c'o antok maja' c'o ri roch-ulief, c'o vacame, y xtic'ujie' chupan ri tiempo chakavach-apa, nca'cha'. 9Y antok ri icaje' ri c'o q'uiy quinak'avach chiquij y chiquivach niquiya' ruk'ij, niqui'an nem cha y niquiya' tiox b'a' cha ri Jun ri tz'uyul pa ru-trono, y c'o ruc'aslien richin nojiel tiempo; 10ri veinticuatro ch'itak mámix nca'xuquie' choch ri tz'uyul pa ru-trono ri c'o ruc'aslien richin nojiel tiempo, y chi niquiya' ruk'ij, nicalasaj-el ri qui-coronas, y niquiya-apa choch ri ru-trono, y niqui'ej: 11Ajaf Dios, atre' can rakalien niyo'x ak'ij y ni'an nem cha ri ab'e', y ni'e'x chi c'o a-poder; ruma atre' ri xab'ano nojiel ri c'o, ruma quire' xavajo'.

will be added

X\