Apocalipsis 3

1Tatz'ib'aj-el cha ri nusamajiel richin ri iglesia ri c'o pa tanamet Sardis, y ta'ej-el cha, chi inre' ri c'o ri siete (vuku') ru-espíritus ri Dios viq'uin y ri siete (vuku') estrellas (ch'umil), ni'ej: Inre' vata'n nojiel ri nti'an. Vata'n chi nitzijos chivij chi can ixc'as, pero chinoch inre' xa ix-quiminak. 2Rumare', ni'ej c'a chiva chi can quixc'asie' y man tiya' lugar chi nca'q'uis-ka ri utzulaj tak kax ri c'a c'o pan ic'aslien. Ruma inre' nitz'at ri nti'an vacame, xa man caval ta choch ri Dios. 3Talka pan ive' ri ruch'ab'al ri Dios ri xi'an recibir y xivaxaj na'ay. Can quire' tivaxaj y titzalaj-pa ivánima riq'uin ri Dios y tib'ana' ri nrajo' jaja'. Ruma xa man xquixc'asie', xquinalka chivij inche'l nu'on jun alak'uon, ruma man xtina'iej ta chica huora xquinalka. 4Pero chi'icajol ixre' ri in-iniman chire' pa tanamet Sardis, c'a ic'o nic'aj ri can i-sak. Ijeje' xca'in viq'uin inre', niquicusaj sak tak tziak, ruma can nuc'ul niquicusaj ri tziak re'. 5Ri xtich'acuon, xtiyo'x sak rutziak. Y man xtitur ta ri rub'e' chupan ri libro richin ri c'aslien. Y can xtin'ej cha ri Nata' y chica ri ángeles, chi ri jun re' can vichin inre'. 6Ri c'o ruxiquin, can tira'xaj ri nu'ej ri Espíritu Santo chica ri iglesias. 7Tatz'ib'aj-el cha ri nusamajiel richin ri iglesia ri c'o pa tanamet Filadelfia, y ta'ej-el cha, chi inre' ri in Santo, y can in Ketzij y c'o je' ri llave richin ri David pa nuk'a'; antok inre' nijak, man jun nitiquir nitz'apin, y antok nitz'apij, man jun nitiquir nijako. Ni'ej c'a: 8Inre' vata'n nojiel ri nti'an. Can nujakuon jun puerta chivach, ri man jun nitiquir nitz'apin; mesque man q'uiy ta ivuchuk'a', can iyacuon ri nuch'ab'al riq'uin ivánima y man ivavan ta chi iniman ri nub'e'. 9Rumare' inre' xtin'an chica ri vinak ri niquimol-qui' pa rub'e' ri Satanás chi xca'xuquie' chukul ivakan, ruma ijeje' niqui'ej chi israelitas y xa man ketzij ta ri niqui'ej. Y quire' xtin'an chica chi tiquina'iej c'a chi inre' can nquixvajo'. 10Ixre' can iyacuon pan ivánima ri nuch'ab'al, chi tic'ujie' i-paciencia. Rumare' can xquixchajij choch ri sufrimiento ri xtalka paro' ri roch-ulief chi nca'tojtob'ax quinojiel ri vinak. 11Y cha'nin xquipa chic jun b'ay. Rumare' man tiya' can ri otz ri c'o iviq'uin, chi quire' man jun xtimajo chiva ri corona ri xtuya' ri Dios chiva. 12Ri xca'ch'acuon, can xca'uoc pilares richin ri ru-templo ri Nu-Dios. Y chire' riq'uin ri Dios xca'c'ujie' richin nojiel tiempo. Y chiquij ijeje' xtintz'ib'aj ri rub'e' ri Nu-Dios y ri rub'e' ri rutanamit; y ri tanamet re' ja ri c'ac'ac' Jerusalén, ri nika-pa chicaj, ri alanak-pa riq'uin ri Nu-Dios. Y chiquij ijeje' xtintz'ib'aj je' ri c'ac'ac' nub'e' inre'. 13Ri c'o ruxiquin, can tira'xaj ri nu'ej ri Espíritu Santo chica ri iglesias. 14Y tatz'ib'aj-el cha ri nusamajiel richin ri iglesia ri c'o pa tanamet Laodicea, y ta'ej-el cha, chi inre' ri ketzij y can ja ri ketzij ri ni'ej, can inc'o je' riq'uin ri Dios antok x'an ri roch-ulief; ni'ej: 15Inre' vata'n nojiel ri nti'an, vata'n chi man ix c'atan ta, ni man ix ch'ich' ta. ¡Más ta otz xa ta ix c'atan o ix ch'ich'! 16Pero ruma man ix c'atan ta, y man ix ch'ich' ta, xa ix saklib', rumare' xquixxa'j-el. 17Ruma ixre' nti'ej chi vacame c'o i-miera, y can ix b'ayuon chic y man jun chic kax nu'on falta chivach. Y man ivata'n ta chi ixre' xa jumul ib'anun chinoch, xa juye' oc ivach, xa ix puobra, xa ix muoy y xa ix-ch'anal. 18Rumare' vacame ni'ej chiva, chi tilak'o' viq'uin inre' oro ri k'asan chic pa k'ak', chi quire' ketzij nquixb'ayomer. Y tilak'o' viq'uin inre' ri sak tak tziak chi nticusaj, ruma vacame q'uix-q'uix ib'anun chi manak itziak chivij. Y viq'uin inre' je' tilak'o' ri colirio chi ntiya' pa tak inak'avach, chi quire' nquixtzu'n otz. 19Inre' nca'nch'olij y nca'n'an castigar ri nca'nvajo'. Mare' ixre' riq'uin c'a nojiel ivuchuk'a' titzalaj chic pa ivánima viq'uin y tib'ana' ri nivajo' inre'. 20Vacame inre' inc'o chuchi' ri jay y nquich'o-apa. Xa c'o jun ri xquira'xaj-pa y xtujak ri puerta chinoch, xquinuoc-oc riq'uin y xquiva' riq'uin; y jaja' je' xtiva' viq'uin inre'. 21Ri xtich'acuon, xtinya' lugar cha chi nitz'uye' viq'uin pa nu-trono, can inche'l xin'an inre' antok xich'acuon, can xitz'uye' riq'uin ri Nata' Dios pa ru-trono. 22Ri c'o ruxiquin, can tira'xaj ri nu'ej ri Espíritu Santo chica ri iglesias.

will be added

X\