Apocalipsis 22

1Y ri ángel ri c'uayuon vichin, xuc'ut jun río sak chinoch; ri ya' nuya' c'aslien. Ri río re' inche'l vidrio nitz'iet y nalax-pa ri pache' c'o-ve ri ru-trono ri Dios y ri Alaj Oveja. 2Pa nic'aj ri nem b'ay richin ri tanamet, chire' nak'ax-ve ri río ri nuya' c'aslien. Y cala ca'ye' ruchi' ri río re' niq'uiy ri chie' ri niyo'n je' c'aslien, y doce (cab'alajuj) mul nuya' roch chupan jun juna'. Can ic'-ic' nuya' roch. Y ri ruxak ri chie' re' jare' ri cak'uon quinojiel naciones. 3Y chire' man jun chic ri nika castigo paro'. Y chire' c'o-ve ri trono richin ri Dios y richin ri Alaj Oveja. Y quinojiel ri ru-siervos, xtiquiya' ruk'ij. 4Y ijeje' xtiquitz'at roch jaja' chire'. Y xtiquic'uaj je' ri rub'e' chi'quivach. 5Chire' chupan ri tanamet, manak xticok'a-ka. Y quinojiel ri ic'o chupan ri tanamet re', man jun xtic'atzin-ve rusakil jun lámpara chica, ni xtic'atzin ri k'ij. Ruma ja ri Dios ri Ajaf ri xtib'ano sakil quiq'uin. Y quinojiel xtiqui'an reinar richin nojiel tiempo. 6Y ri ángel ri c'uayuon vichin xu'ej chuva: Ri tzij re' can i-ketzij y can otz chi nca'nimax. Ruma ja ri Ajaf Dios ri xyo'n ri tzij pa cánima ri profetas, y jaja' je' ri takayuon richin ri ru-ángel chi nu'ej chica ri ru-siervos, chirij ri kax ri ya xca'b'anataj. 7Ri Jesucristo nu'ej: ¡Inre' ya nquipa chic! Quinojiel ri vinak ri nca'niman ri nu'ej ri Dios chupan va libro va, can ja'al ca'quicuot. 8Y inre' Juan, can xinva'xaj y xintz'at nojiel re'. Y antok ya vaxan chic y nutz'atuon chic, ja xixuquie-ka chukul rakan ri ángel ri xuc'ut nojiel chinoch, chi niya' ruk'ij. 9Pero ri ángel re' xu'ej chuva: Man taya' nuk'ij inre'. Inre' xa in jun ru-siervo ri Dios, junan aviq'uin atre' y quiq'uin ri nic'aj chic av-hermanos ri profetas, y quiq'uin je' ri nca'niman ri tzij ri i-tz'ib'an chupan va libro va. Can ja ri Dios taya' ruk'ij, xcha' chuva. 10Y xu'ej je' chuva: Ri ruch'ab'al ri Dios ri tz'ib'an chupan ri jun libro va, man tavavaj. Can tatzijuoj. Ruma xa cierca chic c'o-ve ri k'ij antok xca'b'anataj nojiel re'. 11Rumare' ri man choj ta ruc'aslien, tub'ana' ri nrajo' nu'on. Y ri tz'il ruc'aslien, can tub'ana' ri itziel nurayij. Y ri choj ruc'aslien, man tumalij nu'on ri otz. Y ri sak ruc'aslien, can quire' tub'ana-apa. 12Ri Jesucristo nu'ej: Inre' cha'nin xquipa chic jun b'ay. Y c'o ruc'axiel nic'am-pa chica chiquijunal; y can inche'l ri xa'qui'an, can quire' je' ri ruc'axiel xtinya' chica. 13Inre' ri Alfa y ri Omega, inre' ri nab'ayal y ri ruq'uisb'al. Y inre' inc'o antok maja' c'o ri roch-ulief, y xquic'ujie' más chakavach-apa. 14Can ja'al ca'quicuot ri niquich'aj ri quitziak, ruma quire' rub'anun ri quic'aslien; ijeje' c'o quik'a' cha ri roch ri chie' ri niyo'n c'aslien, y chi nca'k'ax chupan ri puertas chi nca'uoc chupan ri c'ac'ac' tanamet. 15Pero ri tz'e' man xca'uoc ta chupan ri tanamet. Y quire' je' ri aj-itz, ri man i-c'ulan ta ri niquicanuj-qui' chi niqui'an pecado, ri nca'b'ano camic, ri nca'yo'n quik'ij ri ídolos, y ri nika chiquivach niquitz'ak tzij. 16Y inre' Jesús, nutakuon-el ri nu-ángel chi nu'ej nojiel re' chiquivach ri iglesias. Y inre' ri in rumáma can ri rey David. Y inre' can inche'l ri nem estrella (ch'umil) ri ja'al nich'ich'an mac'ajan yan. 17Y ri Espíritu Santo y ri xtan ri nic'ulie' riq'uin ri Jesucristo, niqui'ej: Quixam-pa. Y ri nca'c'axan, can tiqui'ej je': Quixam-pa. Y ri chake'j ruchi' y nrajo' nipa, can tipa y tukumu' ri Ya' ri niyo'n c'aslien. Y ri Ya' re' xa nisipas. 18Y ni'ej chica quinojiel ri nca'c'axan ri nu'ej ri Dios chupan va libro va: Xa c'o jun ri nuya' ruve' ri tzij ri c'o chupan, can quire' je' xti'an cha ri castigo ri xtuya' ri Dios paro' ri nib'ano quire'; can ja ri sufrimiento ri i-tz'ib'an chupan va libro va. 19Y xa c'o jun ri nralasaj-el b'a' ri tzij va y nuc'ax rub'ixic ri nu'ej ri Dios chupan va libro va, ri Dios man xtuya' ta cha ri xtiyo'x chica ri tz'ib'an quib'e' chupan ri libro richin ri c'aslien, y man xtuya' ta je' lugar cha chi ntuoc chupan ri tanamet santa, ni man xtiyo'x ta cha ri utzulaj tak kax ri tz'ib'an chupan va libro va. 20Y ri ni'e'n nojiel re', can nu'ej je': Can ketzij chi ya nquipa, nicha'. Y inre' Juan ni'ej: Amén. Catam-pa, Ajaf Jesús. 21Ja ta ri ru-favor ri Kajaf Jesucristo tic'ujie' iviq'uin chi'ixvonojiel ri iniman ri ruch'ab'al. Amén.

will be added

X\