Apocalipsis 21

1Y xintz'at jun c'ac'ac' rocaj y jun c'ac'ac' roch-ulief, ruma ri na'ay rocaj y ri na'ay roch-ulief xa'q'uis. Y ri mar manak chic je'. 2Y inre' Juan xintz'at ri tanamet santa, ri c'ac'ac' Jerusalén. Xintz'at chi nika-pa chicaj; riq'uin ri Dios alanak-pa. Y can ja'al vakuon, can inche'l nu'on jun xtan antok nic'ulie'. 3Y xinva'xaj jun ri nich'o-pa cof chicaj y nu'ej: Tatz'ata', vacame ri Dios chiquicajol ri vinak c'o-ve. Y ri vinak re' xca'uoc rutanamit, y jaja' ri Qui-Dios. Can junan xca'c'ujie'. 4Y ri Dios xtisu'n ri ruya'l quinak'avach, ruma manak chic camic, ni ok'iej, ni jiluoj, ni k'axomal. Ruma nojiel ri xa'c'ujie' na'ay ya xa'k'ax. 5Y ri Jun ri tz'uyul pa trono xu'ej: Inre' c'ac'ac' ri nca'n'an cha nojiel, xcha'. Y xu'ej je' chuva: Ca'tz'ib'aj ri tzij ri xca'n'ej chava, ruma can ketzij y otz chi nca'nimax. 6Y xu'ej je' chuva: Nojiel ya xc'achoj. Y inre' ri Alfa y ri Omega, inre' ri na'ay y ri ruq'uisb'al. Y xa c'o ri nichakej ruchi', inre' xtinya' ruya' ri ntiel-pa chupan ri nacimiento ri niyo'n c'aslien, y ri ya' re' xa choj nisipaj. 7Ri xca'ch'acuon, jare' ri xtiyo'x qui-herencia. Y inre' xquinuoc Qui-Dios, y ijeje' xca'uoc valc'ual. 8Pero ri man nquinquinimaj ta, ri niquixi'ij-qui' niquik'asaj sufrimientos vuma inre', ri itziel nca'ntz'at ruma ri qui-pecados, ri nca'b'ano camic, ri man i-c'ulan ta ri niquicanuj-qui' chi niqui'an pecado, ri aj-itz, ri nca'yo'n quik'ij ri ídolos, y ri niquitz'ak tzij; can xca'nc'ak chupan ri k'ak' ri inche'l lago ri nic'at riq'uin azufre. Y jare' ri ruca'n camic. 9Y jun chiquivach ri siete (vuku') ángeles ri quic'uan ri siete (vuku') copas ri nojnak riq'uin ri siete (vuku') ruq'uisb'al tak sufrimientos ri xka paro' ri roch-ulief, xpa viq'uin y xalch'o' chuva y xu'ej: Catam-pa, y xtinc'ut chavach ri xtan ri nic'ulie' riq'uin ri Alaj Oveja. 10Y chupan ri jun inche'l achic' ri xin'an ruma ri ru-poder ri Espíritu Santo, ri ángel xiruc'uaj paro' jun nem juyu', y chire' xuc'ut chinoch ri santa tanamet Jerusalén ri richin ri Dios, ri nika-pa chicaj. 11Y ri tanamet re' can nich'ich'an ruma rusakil ri Dios; can inche'l nich'ich'an ri jaspe, ri jun ab'aj altíra ja'al. Ri tanamet can inche'l vidrio nitz'iet. 12Y chirij c'o jun muro nem y naj jatol chicaj y ruc'uan doce (cab'alajuj) puertas. Y nojiel ri puertas, ic'o jujun ángel. Y choch ri puertas re', i-tz'ib'an quib'e' ri doce (cab'alajuj) tanamet ri quichin ri doce (cab'alajuj) ruc'ajola' ri jun ache xub'inaj Israel. 13Y ri puertas re'; oxe' c'o pache' ntiel-pa ri k'ij, oxe' c'o pache' nika-ka ri k'ij, oxe' c'o norte, y oxe' c'o sur. 14Y ri acunak ri ru-cimiento ri muro re', doce (cab'alajuj) ab'aj y chiquij c'o quib'e' ri i-doce (cab'alajuj) ru-apóstoles ri Alaj Oveja. 15Y ri ángel ri nich'o' chuva, ruc'uan jun inche'l aj ri b'anun cha oro chi nrataj ri tanamet Jerusalén, chi nca'rataj ri puertas y chi nrataj ri muro ri c'o chirij ri tanamet. 16Ri tanamet Jerusalén cuadrado b'anun cha. Can junan ri caje' lados. Y xpa ri ángel xrataj ri tanamet cha ri inche'l aj, dos mil doscientos veinte kilómetros. Can quire' roch, can quire' je' ri rakan y can quire' je' jatol chicaj ri tanamet. 17Y ri ángel xrataj ri jane' (jaro') jatol ri muro ri c'o chirij ri tanamet. Y ri muro jatol setenta y cinco metros chicaj. Ri ángel xucusaj ri medida ri inche'l niquicusaj ri vinak. 18Y ri muro ri c'o chirij ri tanamet, can b'anun cha jun ab'aj ri altíra ja'al ri ni'e'x jaspe cha. Y ri tanamet re', cha oro puro b'anun-ve, y can inche'l vidrio ja'al ch'ajuon. 19Y ri ru-cimiento ri muro can ja'al vakuon cha nojiel roch ab'aj ri can i-ja'al. Ri na'ay ab'aj, ja ri jaspe; ri ruca'n, zafiro; ri ruox, ágata; ri chi caje', esmeralda; 20ri chi vu'uo', ónice; ri chi vaki', cornalina; ri siete (vuku'), crisólito; ri ocho (vakxaki'), berilo; ri nueve (b'ilijie'), topacio; ri diez (lajuj), crisopraso; ri once (julajuj), jacinto; y ri doce (cab'alajuj), ja ri amatista. 21Y ri doce (cab'alajuj) puertas b'anun cha doce (cab'alajuj) perlas. Cada puerta xa b'anun cha jun perla. Ri nem b'ay richin ri tanamet, can cha oro puro b'anun-ve, y can inche'l vidrio nitz'iet. 22Y inre' man jun templo xintz'at chupan, ruma ri Ajaf Dios ri c'o nojiel poder pa ruk'a' acunak ru-templo ri tanamet re', y quire' je' ri Alaj Oveja. 23Ri tanamet re' man nic'atzin ta rusakil ri k'ij ni ri ic' cha, ruma ri nib'ano ri sakil cha, ja rusakil ri Dios y ri Alaj Oveja. 24Y ri naciones ri i-colotajnak chic, can riq'uin ri rusakil ri tanamet xtiquitz'at quib'iey chi nca'in. Y ri reyes ri ic'o choch-ulief xtiquic'am-pa chupan ri tanamet, ri quib'ayomal ri b'anayuon chica chi c'o quik'ij. 25Chire', man jun b'ay xca'tz'apes ri puertas pak'ij, ruma chire' manak chak'a'. 26Ri quib'ayomal ri naciones ri b'anayuon chica chi c'o quik'ij, xca'c'uax-apa chupan ri tanamet. 27Pero man jun kax tz'il xtuoc-oc chupan ri tanamet re', ni man jun je' vinak ri itziel ruc'aslien choch ri Dios, ni man jun ri nutz'ak tzij xtuoc. Jo'c ri c'o quib'e' tz'ib'an chupan ri libro richin ri c'aslien, ri ru-libro ri Alaj Oveja.

will be added

X\