Apocalipsis 20

1Y xintz'at jun ángel ri nika-pa chicaj y ruc'amun-pa ri llave richin ri jul ri man niq'uis ta rakan ri can k'aku'n rupan. Y ruc'amun-pa je' jun nem cadena (yariena) pa ruk'a'. 2Ri ángel re' xutz'om ri dragón, ri ni'e'x diablo y Satanás cha, ri xuoc jun cumatz ojier can. Y xxim c'a el ruma ri ángel mil juna'. 3Y xb'aruc'aka' chupan ri jul ri man niq'uis ta rakan ri can k'aku'n rupan, xutz'apij can y xu'on can sellar richin quire' man jun tijako. Quire' x'an can cha, chi quire' man chic xtu'on ta maña más chica ri vinak ri ic'o choch-ulief. Mil juna' xtitz'apie' c'a. Y antok xtitz'akat ri mil juna', xtitzokopes, pero xa jub'a' chic oc tiempo xtu'on. 4Y xintz'at chi ic'o tronos, y ri i-tz'uyul chire' xyo'x autoridad pa quik'a' chi nca'qui'an juzgar ri vinak; xa'ntz'at je' qui-espíritu ri i-quiminak-el ruma xkupex quikul. Ijeje' xa'quimisas-el ruma xquitzijuoj ri xu'on ri Jesús y xquitzijuoj ri ruch'ab'al ri Dios. Quinojiel re', ja ri man xa'yo'n ta ruk'ij ri bestia y ri ru-imagen. Ni man xquiya' ta quitzij chi xyo'x ri ru-marca ri bestia chi'quivach ni chiquik'a'. Y ijeje' xa'c'astaj chic pa y junan xqui'an reinar riq'uin ri Cristo chupan ri mil juna'. 5Y jare' ri quiminaki' ri xa'c'astaj-pa na'ay. Pero ri nic'aj chic quiminaki' man xa'c'astaj ta yan. Xa c'a xtz'akat-na ri mil juna', c'ajare' xca'c'astaj-pa. 6Can santo c'a ri quic'aslien y can ja'al ca'quicuot ri xca'c'astaj-pa na'ay antok ri Dios xca'ruc'asuoj ri quiminaki', ruma ri ruca'n camic man xtitiquir ta chiquij. Ijeje' can xca'uoc sacerdotes richin ri Dios y ri Cristo. Y junan xtiqui'an reinar riq'uin ri Cristo chupan ri mil juna'. 7Y antok xtitz'akat ri mil juna', ri Satanás xtalasas-pa chupan ri lugar ri pache' tz'apal-ve. 8Y xtipa chic jun b'ay chi xtu'on maña chica ri vinak ri ic'o choch-ulief. Y xtu'on maña chica ri vinak aj-Gog y aj-Magog; can nca'rumol-el richin ri guerra. Y iq'uiy ri soldados ri xca'rumol chi xtiqui'an ri guerra, xa can i-inche'l ri sanaye' ri c'o chuchi' ri mar. 9Ri vinak ri quimaluon-el-qui', quinojsan-el ri roch-ulief, y xa'jotie-el y xb'aquisururiej rij ri tanamet ri altíra nrajo' ri Dios ri pache' ic'o-ve ri quiniman ri ruch'ab'al ri Dios. Pero ri Dios xu'on chi xka-pa k'ak' pa quive' y xa'ruq'uis. 10Y ri diablo ri xu'on maña chica quinojiel ri vinak re', xc'ak chupan ri k'ak' ri inche'l lago ri nic'at riq'uin azufre, ri pache' xa'c'ak-ve ri bestia, junan riq'uin ri falso profeta. Y chire' chupan ri k'ak' xtiqui'an sufrir chi pak'ij chi chak'a' richin nojiel tiempo. 11Y xintz'at jun namalaj trono sak, y xintz'at je' ri tz'uyul chire'. Y ri rocaj y ri roch-ulief xa'numaj choch. Y man chic xa'litaj ta. Man xa'tz'atataj ta chic. 12Y xa'ntz'at ri vinak ri i-quiminak-el, chi ch'ute'k chi nima'k i-pa'l-apa choch ri Dios. Y xa'jak ri libros, y xjak je' jun chic libro ri richin ri c'aslien. Quinojiel ri vinak re' xa'an juzgar riq'uin ri xa'qui'an ri choch-ulief, y can inche'l ri xa'qui'an, can quire' i-tz'ib'an chupan ri libros re'. 13Ri mar xa'rujach quinojiel ri i-quiminak chupan, y ri camic y ri lugar quichin ri quiminaki' xa'quijach je'; y quinojiel xa'c'astaj-pa y xa'an juzgar. Y can inche'l xa'qui'an ri choch-ulief chiquijunal, can quire' xa'an juzgar. 14Y ri camic y ri lugar quichin ri quiminaki', can junan c'a xa'c'ak chupan ri k'ak' ri inche'l lago. Y jare' ri castigo ri ni'e'x ruca'n camic cha. 15Y can chupan je' ri k'ak' ri inche'l lago xa'c'ak quinojiel ri vinak ri man tz'ib'an ta quib'e' chupan ri libro richin ri c'aslien.

will be added

X\