Apocalipsis 2

1Tatz'ib'aj-el cha ri nusamajiel richin ri iglesia ri c'o pa tanamet Efeso, y ta'ej-el cha, chi inre' ri nuc'uan ri siete (vuku') estrellas (ch'umil) pa nuk'a' derecha y nqui'in chiquicajol ri siete (vuku') candeleros ri i-b'anun cha oro, ni'ej: 2Inre' vata'n nojiel ri nti'an. Vata'n chi q'uiy samaj ib'anun y can icach'uon ruma c'o i-paciencia, y vata'n je' chi man ic'ulun ta ka ri vinak ri i-itziel. Y itojtob'ien ri nca'e'n chi i-apóstoles y xa man i-ketzij ta; xa i-tz'akoy-tzij. 3Q'uiy sufrimientos icach'uon ruma c'o i-paciencia, y q'uiy samaj ib'anun ruma nquinivajo' inre' y man ix-cosnak ta. 4Pero c'o ri man ja ta chic ri nti'an, ruma man nquinivajo' ta chic inche'l na'ay. 5Talka pan ive' pache' ix-tzaknak-ve. Titzalaj-pa ivánima viq'uin y tib'ana' ri nivajo' inre'. Tib'ana' inche'l xi'an na'ay. Y xa man xti'an ta quire', cha'nin xquinalka iviq'uin y xtinvalasaj-el ri i-candelero ri pache' c'o-ve. 6Pero c'a c'o jun kax ri can otz ri nti'an, ruma man nika ta chivach ri niqui'an ri vinak ri ni'e'x nicolaítas chica. Inre' je' can itziel nitz'at ri niqui'an ijeje'. 7Ri c'o ruxiquin, can tira'xaj ri nu'ej ri Espíritu Santo chica ri iglesias. Ri xtich'acuon, xtinya' cha chi nutej roch ri chie' ri niyo'n c'aslien, ri c'o pa nic'aj ri lugar ri ni'e'x paraíso cha, ri lugar pache' c'o-ve ri Dios. 8Y tatz'ib'aj-el cha ri nusamajiel richin ri iglesia ri c'o pa tanamet Esmirna, y ta'ej-el cha, chi inre' ri nab'ayal y ri ruq'uisb'al, ri xiquimisas y xic'astaj chic pa, quire' ni'ej: 9Inre' vata'n nojiel ri nti'an, can ib'anun sufrir, y manak ib'ayomal, pero chinoch inre' can ix b'ayoma'. Vata'n chi ic'o vinak ri nca'e'n chi israelitas, ri altíra itziel nca'ch'o' chivij. Ijeje' niqui'ej chi israelitas, pero xa man ijeje' ta, ri vinak re' xa i-richin ri Satanás. 10Man tixi'ij-ivi' choch ri sufrimiento ri xtipa chivij. Ruma ri diablo xtu'on chi ic'o nic'aj chivach ixre' ri xca'yo'x pa cárcel chi nca'rutojtob'iej vi xa can ketzij quiyo'n cánima riq'uin ri Dios. Diez (lajuj) k'ij xquixrutojtob'iej riq'uin sufrimientos, pero siempre tiya' ivánima riq'uin ri Dios; mesque nquixquimisas. Y inre' xtinya' jun corona chiva; ri corona ri xtinya', ja ri utzulaj c'aslien ri man niq'uis ta. 11Ri c'o ruxiquin, can tira'xaj ri nu'ej ri Espíritu Santo chica ri iglesias. Ri xtich'acuon, man xti'a ta chupan ri sufrimiento richin ri ruca'n camic. 12Tatz'ib'aj-el cha ri nusamajiel richin ri iglesia ri c'o pa tanamet Pérgamo, y ta'ej-el cha, chi inre' ri nuc'uan ri espada ri sima'j rutza'n ri ca'ye' lado c'o roray, ni'ej: 13Inre' vata'n nojiel ri nti'an. Vata'n chi chire' chupan ri tanamet pache' ixc'o-ve ixre', chire' c'o-ve ri ru-trono ri Satanás. Y mesque quire', ixre' man iyo'n ta can ri nub'e', y c'a icukub'an ic'u'x viq'uin. Y man xiniya' ta can ni chupan ri k'ij antok ri Antipas xquimisas. Jaja' jun utzulaj nusamajiel ri xutzijuoj ri nuch'ab'al, y ruma man xiruya' ta can, xquimisas chire' chi'icajol pache' c'o-ve ri ru-trono ri Satanás. 14Pero c'o nic'aj kax ri nti'an ri man nika ta chinoch. Chi'icajol ic'o ri man nicajo' ta niquiya' can ri itziel tak kax ri xuc'ut can ri Balaam; ri Balaam xuc'ut choch ri Balac chi tub'ana' chica ri israelitas chi nca'tzak; chi niquitej ri kax ri i-yo'n chic chiquivach ri ídolos, y chi ri achi'a' y ri ixoki' niquicanuj-qui' chi niqui'an pecado. 15Ic'o je' nic'aj chi'icajol ri man nicajo' ta niquiya' can ri itziel tak kax ri niquic'ut ri vinak ri ni'e'x nicolaítas chica. Y ri niquic'ut ri nicolaítas can man nika ta chinoch. 16Rumare', titzalaj-pa ivánima viq'uin y tib'ana' ri nivajo' inre'. Ruma xa man quire' ta xti'an, inre' cha'nin xquinalka iviq'uin. Y nalb'ana' ayoval quiq'uin ri man xtitzalaj ta pa cánima viq'uin cha ri espada ri ntiel-pa pa nuchi'. 17Ri c'o ruxiquin, can tira'xaj ri nu'ej ri Espíritu Santo chica ri iglesias. Ri xtich'acuon, can xtinya' cha ri simíta rub'inan maná ri avan-can. Y xtinya' jun ch'iti ab'aj sak cha, ri tz'ib'an choch jun c'ac'ac' b'i'aj. Y ri c'ac'ac' b'i'aj re', jo'c ri choj cha xtinya' ri ch'iti ab'aj, jo'c jaja' xtina'ien. 18Tatz'ib'aj-el cha ri nusamajiel richin ri iglesia ri c'o pa tanamet Tiatira, y ta'ej-el cha, chi inre' ri Ruc'ajuol ri Dios, ri nak'anoch can inche'l ruxak-k'ak', y ri vakan can nca'ch'ich'an inche'l ri bronce, ni'ej: 19Inre' vata'n nojiel ri nti'an. Vata'n chi nquinivajo', chi icukub'an ic'u'x viq'uin, nqui'to' ri vinak, c'o i-paciencia, y vata'n je' chi vacame más nquixsamaj que choch ri na'ay. 20Pero c'o nic'aj kax ri nti'an ri man nika ta chinoch, y re' ja chi iyo'n lugar cha ri ixok Jezabel. Ruma jaja' nu'ej chi jun profetisa, pero quire' nu'on jo'c chi nu'on maña chica ri nu-siervos y nu'on chica chi nca'tzak. Can nu'ej chi otz niquitej ri kax ri i-yo'n chic chiquivach ri ídolos, y nu'on chica ri achi'a' y ri ixoki' chi niquicanuj-qui' chi niqui'an pecado. 21Y nuyo'n c'a tiempo cha, chi titzalaj-pa ránima viq'uin y nu'on ri nivajo' inre', pero jaja' man nrajo' ta chi man chic tuc'uaj-ri' riq'uin jun chic ri xa man rachajil ta. 22Rumare' xtin'an cha chi xtika choch ch'at ruma jun yab'il. Y quinojiel ri quib'anun pecado riq'uin, can altíra xtiqui'an sufrir. Can quire' xtin'an chica xa man xtiquiya' ta can ri pecado y niqui'an ri nivajo' inre'. 23Y quinojiel ri ral xca'nquimisaj, chi quinojiel ri iglesias tiquitamaj chi inre' vata'n ri chica niqui'an pensar y vata'n je' ri c'o pa cánima quinojiel. Y can inche'l ri ib'anun chi'ijunal, quire' ri ruc'axiel xtinya' chiva. 24Pero chiva ixre' y chica ri nic'aj ri ic'o chupan ri tanamet Tiatira, ri man i-b'anak ta chirij ri nuc'ut ri Jezabel, y man jun cata'n chirij ri nem no'j ri ni'e'x chi c'o riq'uin ri Satanás, can otz ri xqui'an, inre' man jun chic más aka'n xtinya' chivij. 25Pero man tiya' can ri otz ri nti'an hasta c'a antok inre' xquipa chic jun b'ay. 26Ri xca'ch'acuon y xtiqui'an ri xtin'ej chica c'a antok xtalka ri ruq'uisb'al k'ij, can xtin'an chica chi xtic'ujie' qui-autoridad pa quive' ri naciones, 27can inche'l rub'anun-pa ri Nata' chuva; can ruyo'n-pa autoridad chuva. Can xtinya' autoridad chica, y can xca'qui'an gobernar ri naciones riq'uin poder y man jun xtiquijoyovaj quivach. C'o jun vara b'anun cha ch'ich' pa quik'a', y can xca'quipaxij inche'l nca'paxix b'ajo'y. 28Can xtinya' chica ri estrella (ch'umil) ri ntiel-pa cumaj yan. 29Ri c'o ruxiquin, can tira'xaj ri nu'ej ri Espíritu Santo chica ri iglesias.

will be added

X\