Apocalipsis 19

1Y chirij nojiel re' xinva'xaj quikul iq'uiy vinak nca'vajaj chicaj, y cof niqui'ej: ¡Tiyo'x ruk'ij ri Kajaf Dios! Ruma jaja' nkojrucol, richin jaja' ri poder, y c'o je' ruk'ij. 2Tiyo'x ruk'ij ri Ka-Dios ruma nik'alajin chi ketzij y choj nu'on juzgar, ruma ya xuya' ruc'axiel cha ri nem ramera ruma ri i-rub'anun; ruma ri ixok re' xu'on chica ri vinak ri ic'o choch-ulief chi xqui'an pecado ri inche'l niqui'an ri achi'a' y ri ixoki' ri niquicanuj-qui' chi niqui'an pecado. Jaja' je' ri xquimisan quichin ri ru-siervos ri Dios, rumare' ri Ka-Dios can xuya' ruc'axiel cha, nca'cha'. 3Y jun chic b'ay xinva'xaj ri nca'vajaj chicaj, xqui'ej: ¡Tiyo'x ruk'ij ri Dios! ruma ri Babilonia ja nic'at, y ri rusib'il jatol chicaj richin nojiel tiempo. 4Y ri veinticuatro ch'itak mámix ri ic'o chicaj y ri icaje' ri c'o q'uiy quinak'avach chiquij y chiquivach, ja xa'xuquie-ka chi xquiya' ruk'ij ri Dios ri c'o pa ru-trono, y xqui'ej: ¡Amén y tiyo'x ruk'ij ri Dios! xa'cha'. 5Y c'o jun ri xb'ach'o-pa pache' c'o-ve ri ru-trono ri Dios y quire' ri nu'ej: Ixvonojiel ixre' ri ru-siervos ri Dios, can tiya' ruk'ij. Ixre' ri nquixniman cha ri Dios, chi ch'ute'k chi nima'k, tiya' ruk'ij. 6Y xinva'xaj je' inche'l quikul q'uiy vinak nca'vajaj chicaj, inche'l nivajaj q'uiy ya' y inche'l je' nik'ajan ri ráya y niqui'ej: ¡Tiyo'x ruk'ij ri Ajaf ri Ka-Dios, ri c'o nojiel poder pa ruk'a', ruma jaja' ri nib'ano reinar! 7Kojquicuot y kojtze'n, y kaya' ruk'ij ri Dios; ruma xalka ri k'ij chi nib'anataj ri namalaj ruc'ulub'ic ri Alaj Oveja. Y ri xtan ruchojmin chic ri' chi nic'ulie'. 8Can xyo'x permiso cha ri xtan chi xuvak-ri' riq'uin tziak ri altíra sak y nich'ich'an, tziak ri b'anun cha lino fino. Y ri tziak re', xa jare' ri c'aslien choj ri quic'uan ri quiniman ri ruch'ab'al ri Dios. 9Y ri ángel xu'ej chuva: Tatz'ib'aj: Can ja'al ca'quicuot ri xa'yox richin ri va'en ri xti'an chupan ri ruc'ulub'ic ri Alaj Oveja. Y ri ángel xu'ej je' chuva: Ri tzij ri xin'ej chava can ketzij, ruma ja ri Dios b'iyuon-pa. 10Y inre' ja xixuquie-ka chukul rakan ri ángel chi niya' ruk'ij, pero jaja' xu'ej chuva: Man taya' nuk'ij inre'. Ja ri Dios taya' ruk'ij. Ruma inre' xa in ru-siervo ri Dios inche'l atre', y oj junan quiq'uin ri av-hermanos ri c'o ri ruch'ab'al ri Jesús pa cánima y niquitzijuoj je'. Ruma jun ri nu'ej ri ni'e'x cha ruma ri Dios, y jun ri nutzijuoj ri ruch'ab'al ri Jesús, xa jun mismo Espíritu ri niyo'n re' chica. 11Y antok xintz'at chic, xintz'at chi ri chicaj jakal. Y xintz'at jun quiej sak rij y c'o Jun ch'acol chirij ri ni'e'x Choj y Ketzij cha, y pa ruchojmil nu'on juzgar y nu'on guerra quiq'uin ri itziel nca'tz'ato richin. 12Ri nak'aroch can i-inche'l ruxak-k'ak'. Y pa rujaluon rucusan q'uiy coronas, y tz'ib'an jun b'i'aj ri man jun nib'ano entender, xa jo'c jaja'. 13Ri rutziak ri rucusan c'o quic' chirij. Y ri rub'e' jaja': RI RUCH'AB'AL RI DIOS. 14Y ri ejércitos richin ri chicaj i-b'anak riq'uin, quicusan tziak ri b'anun cha lino fino, ri can sak y asiada. Y quinojiel i-ch'acol chiquij quiej ri sak quij. 15Y ri pa ruchi' jaja' ntiel-pa jun espada ri sima'j rutza'n, chi nca'rusoc ri vinak ri ic'o chupan ri naciones. Y jaja' ri xtib'ano gobernar ri vinak riq'uin poder y man xtujoyovaj ta quivach. Y xtu'on chica inche'l antok nixak' ri uva chi niyitz' chupan ri lugar inche'l pila. Quire' ri rayoval ri Dios ri xtuya' pa quive' ri vinak, ri Dios ri c'o nojiel poder pa ruk'a'. 16Y chirij ri rutziak tz'ib'an jun b'i'aj, ri paro-el jub'a' ri ruch'iec. Y quire' nu'ej: REY PA QUIVE' QUINOJIEL RI REYES, Y AJAF PA QUIVE' QUINOJIEL RI AJAF. 17Y xintz'at jun ángel pa'l choch ri k'ij. Ri ángel re' cof xu'ej chica ri chicop ri c'o quixic': Quixam-pa. Timalo-pa-ivi', ruma ri Dios nuya' jun nem va'en chiva. 18Ri xtuya' ri Dios chiva chi ntitej, ja ri qui-cuerpo ri reyes, ri qui-cuerpo ri capitanes, y ri qui-cuerpo je' ri achi'a' ri altíra quichuk'a'; ri qui-cuerpo ri quiej y ri i-ch'acol chiquij; ri qui-cuerpo quinojiel vinak, esclavos o libres, chi ch'ute'k chi nima'k, xcha' ri ángel. 19Y xintz'at chic ri bestia y xa'ntz'at ri reyes ri ic'o choch-ulief y ri qui-ejércitos. Y quimaluon-qui' chi niqui'an guerra riq'uin ri Jun ri ch'acol chirij ri quiej ri sak rij y riq'uin ri ru-ejército. 20Y ri bestia xtz'am-el y quire' je' x'an-el cha ri falso profeta. Ri jun ache tz'akoy-tzij re', can xa'ru'on milagros choch ri bestia ri man jun b'ay i-tz'atuon. Y riq'uin re', xu'on maña chica ri vinak chi xquiya' quitzij chi xyo'x ri ru-marca chi'quivach o chiquik'a'. Y ri vinak re' can xquiya' je' ruk'ij ri ru-imagen ri bestia. Y rumare' ri bestia y ri falso profeta, quire' ic'as xa'c'ak-ka chupan ri k'ak' ri inche'l lago ri nic'at riq'uin azufre. 21Y ri nic'aj chic vinak ri i-b'anak quiq'uin ri ica'ye' re', xa'quimisas quinojiel. Xa'quimisas riq'uin ri espada ri ntiel-pa pa ruchi' ri ch'acol chirij ri quiej sak rij. Y ri qui-cuerpo quinojiel ri xa'quimisas, ja ri chicop ri c'o quixic' ri xa'tijo quichin. Y xnuoj quipan riq'uin ri qui-cuerpo.

will be added

X\