Apocalipsis 18

1Después xintz'at jun chic ángel ri c'o altíra poder pa ruk'a', nika-pa chicaj. Ri ángel re' riq'uin ri rusakil, sak xu'on cha ri roch-ulief. 2Can cof nich'o', y nu'ej: Ya xtzak, ya xtzak ri nem tanamet Babilonia. Vacame xa acunak cachuoch itziel tak espíritus. Y chire' je' c'o-ve quisuoc i-tz'il tak chicop ri c'o quixic', y itziel nca'tz'iet. 3Ruma ja ri Babilonia ri xb'ano chica quinojiel naciones chi xa'k'ab'ar chupan ri pecado, ri inche'l niqui'an ri achi'a' y ri ixoki' ri niquicanuj-qui' chi niqui'an pecado. Ja je' ri Babilonia ri xb'ano chica ri reyes ri ic'o choch-ulief chi xa'ka chupan ri pecado re'. Y ri aj-c'ayiniel ri choch-ulief xa'b'ayomer, ruma ri aj-Babilonia xquic'uaj jun itziel c'aslien y rumare' xquisach q'uiy miera, xcha' ri ángel. 4Y xinva'xaj chic chi c'o jun ri nich'o-pa chicaj y nu'ej: Ixre' ri ix nutanamit chic, quixiel-pa chupan ri tanamet Babilonia, chi quire' man xquixka ta je' ixre' chupan ri ru-pecados y man nika ta pan ive' ixre' ri castigo ri xtika pa quive' ri vinak aj-chire'. 5Ruma ri qui-pecados ri vinak ri ic'o chupan ri tanamet re', can altíra q'uiy, rumare' c'a nib'aka chicaj. Y ri Dios can xtuya' ri castigo pa quive', ruma ri qui-pecados xak'ax ruve'. 6Y ri jun ri nich'o-pa chicaj xu'ej chica ri nca'yo'n ruc'axiel cha ri Babilonia: Tiya' ruc'axiel cha ri Babilonia, inche'l xu'on jaja', quire' je' tib'ana' cha jaja'. Can doble ruc'axiel tib'ana' cha, que choch ri xu'on jaja' chica ri nic'aj, chi quire' can tub'ana' sufrir más. 7Tiya' chupan q'uiy sufrimiento y tib'ana' cha chi altíra tituok'. Ruma jaja' can xuna' chi nem, y can rujachuon-ri' chupan ri itziel c'aslien. Ruma jaja' quire' nu'ej pa ránima: Inre' ri inche'l reina ri in-tz'uyul vave'. Man in malca'n ta, y man xtink'asaj ta b'is y ok'iej, nicha'. 8Y ruma quire' xu'ej, can chupan jun k'ij xca'pa nojiel roch sufrimiento paro'. Xtipa camic, ok'iej y vi'jal. Y xtiparox je' pa k'ak'. Y quire' xtib'anataj, ruma ja ri Ajaf Dios ri c'o nojiel poder riq'uin ri xtib'ano castigar. 9Y ri reyes ri ic'o choch-ulief altíra xticok'iej ri tanamet Babilonia. Ruma ijeje' xqui'an pecado riq'uin jaja', inche'l ri pecado quiq'uin ixoki', y xa'ka je' chupan ri itziel tak c'aslien ri pache' xquisach qui-miera. Xticok'iej y xtiquib'isuoj ri tanamet Babilonia antok xtiquitz'at ri seb' jatol chicaj ruma ja nic'at. 10Y ruma niquixi'ij-qui' choch ri castigo ri kajnak paro', c'a naj xca'pi'ie-pa y xtiqui'ej: ¡Juye' roch ri nem tanamet Babilonia; jun tanamet ri c'o ruchuk'a' chi xc'ujie' pa quive' quinojiel! ¡Juye' roch ruma xa chupan jun huora xq'uis ruma ri castigo ri xka-pa paro'! 11Y ri aj-c'ayiniel ri ic'o choch-ulief altíra xticok'iej y xtiquib'isuoj ri tanamet re', ruma man jun chic xtilak'o ri quic'ay. 12Y ri quic'ay, ja ri oro, ri plata, ri cobre, ri ch'ich', ri ab'aj ri altíra i-ja'al, ri mármol, y ri perlas; ri utzulaj tak tziak, inche'l ri lino fino, ri seda, y ri tziak morado y quiak; ri kax ri i-b'anun cha ja'al tak chie' y ri jub'ul tak chie', kax ri i-b'anun cha b'ak, 13canela, k'ayis jub'ul ruxla', incienso (puon), mirra y nic'aj chic jub'ul tak ak'uon; ri vino, aceite, harina, trigo, ovejas, quiej y nic'aj chic chicop, carruajes, y hasta vinak. 14Ri vinak ri xa'c'ujie' chupan ri nem tanamet, man xca'quitej ta chic quivach-chie' ri ja'al i-que' ri altíra xa'ka chiquivach. Xa'q'uis nojiel ri ja'al tak kax ri ic'o quiq'uin, y xq'uis je' ri quib'ayomal. 15Y ri aj-c'ayiniel ri xa'b'aka Babilonia altíra xa'b'ayomer ruma ri kax ri xa'quic'ayij chire'. Ri aj-c'ayiniel re' niquixi'ij-qui' choch ri castigo ri kajnak paro', c'a chi-naj nca'pi'ie-ve. Can altíra nicok'iej y niquib'isuoj. 16Y niqui'ej: ¡Juye' roch ri nem tanamet Babilonia, ri xa inche'l jun ixok ruvakuon-ri' riq'uin tziak ri altíra ja'al ri ni'e'x lino cha, y rucusan tziak quiak y morado, y i-rucusan je' oro, perlas y nic'aj ab'aj ri altíra i-ja'al! 17Y xa chupan jun huora xq'uis nojiel ri b'ayomal ri c'o riq'uin. Y ri achi'a' ri i-c'uayuon ri barcos, ri nic'aj chic ri nca'samaj chupan, ri vinak ri i-b'anak chupan ri barcos, y quinojiel ri nca'samaj paro' ri mar, c'a chi-naj xa'pi'ie-ve-pa. 18Ruma xquitz'at ri seb' ri jatol chicaj ruma ja nic'at ri tanamet. Y cof xa'ch'o', y xqui'ej: ¿C'o chic came jun tanamet junan riq'uin ri nem tanamet re'? xa'cha'. 19Y ri vinak ri nca'a pa tak barcos y ri nca'samaj paro' ri mar, xquiya' ulief pa tak quijaluon; can altíra nca'uok' y nca'b'isuon, y nca'siq'uin niqui'ej: ¡Juye' roch ri nem tanamet Babilonia! Can riq'uin rub'ayomal jaja' xa'b'ayomer can quinojiel rajaf ri barcos. Y xa chi jun huora xq'uis nojiel, xa'cha'. 20Y jare' antok c'o jun ri xch'o' y xu'ej: Ixre' ri ixc'o chicaj, ixre' apóstoles, ixre' profetas y ixre' ri iniman ri ruch'ab'al ri Dios, quixquicuot, ruma ri Dios can xutz'at ri xik'asaj pan ic'aslien pa ruk'a' ri Babilonia, rumare' nuya' ruc'axiel cha. 21Y jun ángel ri altíra ruchuk'a', xb'aruma-pa jun nem ab'aj, ri inche'l jun mama' ca', y riq'uin nojiel ruchuk'a' xuq'uiak ri ab'aj c'a chupan ri mar, y xu'ej: Quire' xti'an cha ri nem tanamet Babilonia chi tiq'uis chire'. Ri tanamet re' man xtitz'atataj ta chic. 22Man jun b'ay chic xtic'axax pa tak b'ay ri arpas, ri trompetas y ri flautas. Man jun chic xtik'ojoman quichin. Ni man jun chic xtisamaj chire'. Y man jun bulla richin ri molinos xtic'axax. 23Man jun chic luz xtitz'atataj chi nuya' sakil cha ri tanamet. Man jun chic c'ulub'ic xtic'axax. Ruma ri xa'c'ayin chire' can i-nima'k xquina-qui' ri choch-ulief. Y chire' je' x'an-ve maña chica quinojiel naciones ri ic'o choch-ulief riq'uin ri hechicerías (b'anaquil). 24Y chupan je' ri tanamet Babilonia x'in-ve quiquiq'uiel ri profetas, y ri quiquiq'uiel ri nic'aj chic ri quiniman ri ruch'ab'al ri Dios. Paro' ri tanamet re' xka-ve ri quicamic quinojiel ri i-quimisan-el choch-ulief.

will be added

X\