Apocalipsis 17

1Y jun chiquivach ri i-siete (ivuku') ángeles ri quic'uan jujun copa, xalch'o' chuva y xu'ej: Catam-pa viq'uin y xtinc'ut chavach ri chica castigo ri xtika paro' ri nem ramera, ri tz'uyul pa quive' q'uiy ya'. 2Can riq'uin ri ixok re' quib'anun pecado ri reyes ri ic'o choch-ulief. Y ruma je' ri ixok re' ri vinak ri ic'o choch-ulief xa'k'ab'ar chupan ri pecado, ri inche'l niqui'an ri achi'a' y ri ixoki' ri niquicanuj-qui' chi niqui'an pecado. 3Y chupan ri jun inche'l achic' ri xin'an ruma ri ru-poder ri Espíritu Santo, xinna' chi ri ángel xiruc'uaj c'a pa jun desierto. Y chire' xintz'at ri ixok, tz'uyul chirij jun bestia quiak rij ri c'o siete (vuku') rujaluon y diez (lajuj) ruc'a'. Ri quiak rij bestia re' ruyuon b'i'aj c'o chirij, ri niqui'ej chi jaja' ri Dios. 4Y ri ixok re' rucusan tziak quiak y morado. I-rucusan nic'aj chic kax ri i-b'anun cha oro, cha ja'al tak ab'aj y cha perlas chi ruvakuon-ri' ja'al. Y pa ruk'a' ruc'uan jun copa ri b'anun cha oro. Y ri copa re' can nojnak-el rupan riq'uin ri itziel tak kax ri i-rub'anun choch ri Dios, y riq'uin je' nojiel ri pecado ri i-rub'anun quiq'uin achi'a'. 5Y ri ixok re' chi'roch tz'ib'an jun b'i'aj. Y ri b'i'aj re' man can ta k'alaj ri chica nrajo' nu'ej ri tzij, pero quire' ri nu'ej: RI NEM TANAMET BABILONIA, QUITIE' RI RAMERAS Y QUITIE' JE' RI VINAK RI NCA'B'ANO ITZIEL TAK KAX CHOCH RI DIOS. 6Antok inre' xintz'at ri ixok re', can xichapataj, ruma k'ab'ariel rub'anun riq'uin ri quiquiq'uiel ri i-ralc'ual chic ri Dios y riq'uin quiquiq'uiel ri xqui'an-el sufrir ruma xquinimaj ri Jesús. 7Y ri ángel ri c'uayuon vichin, xu'ej chuva: ¿Karruma ncachapataj? Inre' xtin'ej chava ri chica nu'ej ri tzij ri ixok ri tz'uyul chirij ri bestia, y xtin'ej je' chava ri chica nu'ej ri tzij ri bestia ri siete (vuku') rujaluon y diez (lajuj) ruc'a'. 8Ri bestia ri xatz'at, xa xc'ujie' ojier can y vacame manak chic. Pero xa xtiel chic pa chupan ri jul ri man niq'uis ta rakan ri can k'aku'n rupan, y xti'a pa k'ak'. Y ri vinak ri ic'o choch-ulief, ri man tz'ib'an ta quib'e' chupan ri libro richin ri c'aslien desde antok xtz'ucutaj-pa ri roch-ulief, can xca'chapataj ruma ri xtiquitz'at, chi ri bestia ri xc'ujie' ojier can y xa manak chic tz'atuon, can xtalka chic jun b'ay. 9Va, q'uiy no'j nrajo' chi ni'an entender, ruma ri siete (vuku') rujaluon ri bestia xa i-siete (ivuku') juyu' ri pache' tz'uyul-ve ri ixok re'. 10Ri siete (vuku') rujaluon ri bestia, xa i-siete (ivuku') reyes. Ivu'uo' chiquivach ri reyes re' ya xa'tzak, jun ja nu'on gobernar vacame y ri jun chic maja' tu'on gobernar. Pero antok xtu'on gobernar, xa man xtilayuj ta ri ru-gobierno. 11Ri bestia ri xc'ujie' ojier can y vacame manak chic tz'atuon, jare' ri xtuoc can ri octavo rey. Jaja' jun chiquicajol ri siete (vuku') reyes y xti'a pa k'ak'. 12Y ri diez (lajuj) uc'a' ri xatz'at ri ruc'uan ri bestia, xa i-diez (lajuj) reyes je' ri maja' tiqui'an gobernar. Ri diez (lajuj) reyes re' xtiyo'x autoridad pa quik'a' junan riq'uin ri bestia chi niqui'an gobernar. Pero ijeje' xa jun oc huora ri xtiqui'an gobernar. 13Ijeje' junan xtiqui'an pensar; rumare' xtiquiya' ri qui-gobierno y ri qui-poder pa ruk'a' ri bestia. 14Y ri reyes re' can xtiqui'an ayoval riq'uin ri Alaj Oveja y jaja' xtich'acuon chiquij. Ruma jaja' Rey pa quive' quinojiel reyes y Ajaf pa quive' quinojiel ajaf. Ri ic'o riq'uin ri Ajaf Jesucristo, can i-rayuon y i-rucho'n ri Dios, y quiyo'n cánima riq'uin. 15Y ri ángel xu'ej je' chuva: Ri ya' ri xatz'at pache' tz'uyul-ve ri ramera, xa iq'uiy naciones, iq'uiy tanamet, iq'uiy vinak, y man junan ta quich'ab'al. 16Y ri diez (lajuj) uc'a' ri xatz'at ri ruc'uan ri bestia, itziel xtiquitz'at ri ixok re', rumare' xca'palaj chirij y nojiel ri c'o riq'uin xtiquimaj cha; y xtiquich'anab'a' can. Y xtiquitej nic'aj ri ru-cuerpo y nic'aj chic ri ru-cuerpo xa xtiquiparuoj. 17Ri Dios xuya' pa cánima ri diez (lajuj) reyes chi junan xqui'an pensar chi xquiya' ri qui-gobierno cha ri bestia hasta c'a nu'on cumplir ri ru'e'n-pa ri Dios. 18Y ri ixok ri xatz'at, ja ri nem tanamet ri c'o pa quive' ri reyes ri ic'o choch-ulief.

will be added

X\