Apocalipsis 16

1Y c'ajare' xinva'xaj chi c'o jun ri cof nich'o-pa ri pa templo y xu'ej chica ri i-siete (ivuku') ángeles: Quix'in y tik'ija' paro' ri roch-ulief ri siete (vuku') copas ri nojnak ri rayoval ri Dios chupan. 2Y ri na'ay ángel x'a y xb'aruk'ija' paro' ri roch-ulief ri c'o chupan ri copa. Ri na'ay sufrimiento xu'on chica ri vinak chi xa'iel-pa itziel tak sal-ch'a'c chiquij. Quire' xb'anataj chica ri quic'uan ri ru-marca ri bestia y ri niquiya' ruk'ij ri ru-imagen. 3Quire' je' ri ruca'n ángel ruc'uan ri copa y xb'aruk'ija' ri c'o chupan paro' ri mar. Y ri mar xchuver inche'l ruquiq'uiel jun quiminak, y nojiel ri c'o quic'aslien ri ic'o chupan, xa'con. 4Y ri ruox ángel xb'aruk'ija' ri c'o chupan ri copa pa quive' ri ríos y pa quive' ri nacimientos richin ya'. Y xa'uoc quic'. 5Y inre' xinva'xaj chi ri ángel ri yo'n autoridad pa ruk'a' pa quive' ri ya', xch'o' y xu'ej: Ajaf Dios, atre' ri atc'o antok maja' c'o ri roch-ulief y atc'o vacame; atre' ri at Santo y pa ruchojmil na'an juzgar nojiel. 6Ruma naya' ruc'axiel chica ri xa'quimisan quichin ri quiniman ri ach'ab'al y ri profetas ri xa'tzijuon ri atzij. Y can otz na'an chica chi tiquikumu' quic' ruma ri xqui'an, xcha' ri ángel. 7Y xinva'xaj je' chi c'o chic jun nich'o-pa choch ri altar, y nu'ej: Can ketzij chi atre' Ajaf Dios ri c'o nojiel poder pan ak'a', can nik'alajin c'a chi can ketzij y can choj na'an juzgar. 8Ri chi caje' ángel xb'aruk'ija' ri c'o chupan ri copa paro' ri k'ij. Y ri k'ij xyo'x poder cha chi nca'ruparuoj ri vinak riq'uin ri ruk'ak'al. 9Y can quire' xb'anataj, ri k'ij xa'ruparuoj ri vinak riq'uin ri ruk'ak'al, pero ri vinak man xtzalaj ta pa cánima riq'uin ri Dios y man xquiya' ta ruk'ij. Pa ruc'axiel re', xa itziel xa'ch'o' chirij ri Dios, ri c'o poder pa ruk'a' chi nuya' ri sufrimientos re' pa quive'. 10Ri chi vu'uo' ángel xb'aruk'ija' ri c'o chupan ri copa paro' ru-trono ri bestia; y paro' ri ru-reino xka jun nem k'aku'n, y ruma ri ruquiy ri niquina' ri vinak ri ic'o chire', can niquicach' cak'. 11Pero ri vinak re', xa itziel xa'ch'o' chirij ri Dios ri c'o chicaj. Quire' niqui'an ruma ri ruquiy, y ruma je' ri itziel tak sal-ch'a'c ri c'o chiquij. Y ijeje' man xquiya' ta can ri itziel tak kax ri nca'qui'an y man xtzalaj ta pa cánima riq'uin ri Dios. 12Ri chi vaki' ángel xb'aruk'ija' ri c'o chupan ri copa paro' ri nem río Eufrates. Y ri río re' xchakej-ka chi c'o che'l nca'k'ax ri reyes ri i-patanak oriente. 13Y inre' xintz'at chi pa ruchi' ri dragón, y pa ruchi' ri bestia, y pa ruchi' ri falso profeta, nca'iel-pa iyoxe' itziel tak espíritus ri inche'l ranas. 14Ri iyoxe' itziel tak espíritus re', can nca'qui'an milagros chi nca'qui'an maña chica ri vinak. Ijeje' nca'a quiq'uin quinojiel ri reyes ri ic'o choch-ulief richin nca'quimol. Nca'quimol-apa richin ri k'ij antok xtiqui'an ri guerra riq'uin ri Dios ri c'o nojiel poder pa ruk'a'. 15Ri Jesucristo nu'ej: Can tib'ana' cuenta-ivi'. Inre' antok xquipa chic, man xtin'ej ta jampe' xquinalka, can inche'l nu'on jun alak'uon. Can ja'al tiquicuot ri in-royo'ien y rucusan ri rutziak chi quire' man xtich'anie' ta, y man xtitz'atataj ta ri ruq'uixb'ilal. 16Y ri ranas re' xa'quimol quinojiel ri reyes chupan ri jun lugar ri ni'e'x Armagedón cha pa ch'ab'al hebreo. 17Y ri séptimo (chi vuku') ángel xuchoxij chupan ri cak'iek' ri c'o chupan ri copa, y xinva'xaj chi c'o Jun nich'o-pa chupan ri templo ri c'o chicaj, pache' c'o-ve ri ru-trono ri Dios. Y cof xu'ej-pa: Ja xc'achoj nojiel. 18Y can jo'c xu'ej quire', xa'pa yocopa', ch'ab'al, ráya, y xu'on jun nem cub'rakan ri man jun b'ay quire' rub'anun ri jane' (jaro') tiempo ic'o ri vinak choch-ulief. 19Y ri nem tanamet oxe' partes xu'on cha. Y ri nima'k tanamet ri ic'o chupan ri naciones, can xa'vuluvu'. Ri Dios can xunataj ri i-rub'anun-pa ri nem tanamet Babilonia, y ja xuya' ruc'axiel chica ri vinak aj-chire' ruma ri itziel tak kax ri quib'anun. Ri Dios can xu'on chica chi tiquikumu' y tiquina' ri rayoval jaja'. 20Y ruma ri nem cub'rakan ri xu'on, nojiel isla xa'a chuxie' ri mar. Y ri juyu' man xa'tz'atataj ta chic. 21Y chicaj xa'ka-pa pa quive' ri vinak nima'k tak sakb'ach, ri c'o la'k jujun quintal calal; rumare' ri vinak altíra itziel xa'ch'o' chirij ri Dios. Ri sufrimiento ri xuya' ri Dios pa quive' ri vinak re', can altíra nem.

will be added

X\