Apocalipsis 15

1Xintz'at chic jun nem señal chicaj, y can xichapataj. Xa'ntz'at i-siete (ivuku') ángeles; ri i-siete (ivuku') ángeles re' jachuon ri siete (vuku') ruq'uisb'al tak sufrimientos chica. Y riq'uin ri siete (vuku') sufrimientos re', niq'uis-ve ri rayoval ri Dios. 2Y inre' xintz'at je' chi c'o inche'l jun mar ri inche'l vidrio, y can xaluon riq'uin k'ak'. Y quinojiel ri man xa'ka ta pa ruk'a' ri bestia y ri ru-imagen, y man xcajo' ta je' ri ru-marca o ri ru-número ri rub'e' ri bestia, i-pa'l paro' ri inche'l mar re', y quic'uan arpas ri yo'n chica ruma ri Dios. 3Y niquib'ixaj c'a ri rub'ix ri Moisés ri ru-siervo ri Dios y ri rub'ix ri Alaj Oveja. Y quire' niquib'ixaj: Ajaf Dios, atre' can ja ri nima'k tak kax ri nca'an, ri man jun b'ay i-katz'atuon, y c'o nojiel poder pan ak'a'. Can ketzij y choj ri ab'iey, y atre' ri Qui-Rey quinojiel ri quiniman ri ach'ab'al. 4¿Chica c'a jun ri man xtuxi'ij ta ri' chavach Ajaf? ¿Chica c'a jun ri man xtiyo'n ta ak'ij? Ruma jo'c atre' at Santo. Y rumare' quinojiel naciones ri ic'o ri choch-ulief xca'pa chi xtiquiya' ak'ij, ruma xk'alajin chi atre' can pa ruchojmil na'an juzgar. 5Y antok nutz'atuon chic nojiel re', xintz'at chi xjakataj ri templo ri c'o chicaj, pache' c'o-ve ri caja richin ri ru-pacto ri Dios. 6Y chupan ri templo re' xa'b'a'iel-pa ri i-siete (ivuku') ángeles ri jachuon jujun sufrimientos pa quik'a'. Y ri quitziak ri quicusan, b'anun cha lino ri altíra sak y nich'ich'an je'. Y choch quic'u'x nak'ax jun cinturón ri b'anun cha oro. 7Y jun chiquivach ri icaje' ri c'o q'uiy quinak'avach chiquij y chiquivach, xuya' jujun copa pa quik'a' ri i-siete (ivuku') ángeles; ri copas re' i-b'anun cha oro, y i-nojnak riq'uin ri rayoval ri Dios, ri Dios ri c'as richin nojiel tiempo. 8Ri templo chicaj xnuoj riq'uin seb', ruma ri namalaj ruk'ij y ru-poder ri Dios. Y man jun nitiquir ntuoc-oc chire', hasta c'a ca'q'uis-na ri sufrimientos ri niquiya' ri i-siete (ivuku') ángeles.

will be added

X\