Apocalipsis 14

1Y después xintz'at ri Alaj Oveja pa'l paro' ri juyu' Sion, y ic'o ciento cuarenta y cuatro mil vinak riq'uin. Y quinojiel c'o rub'e' jaja' y c'o je' rub'e' ri Rutata' chi'quivach. 2Y xinva'xaj jun ch'ab'al ri patanak chicaj, can inche'l nivajaj q'uiy ya', y inche'l nik'ajan jun nem ráya, y can inche'l antok iq'uiy niquik'ojomaj arpas. 3Y niquib'ixaj jun c'ac'ac' b'ix choch ri ru-trono ri Dios y chiquivach ri icaje' ri c'o q'uiy quinak'avach chiquij y chiquivach, y chiquivach ri ch'itak mámix. Ri b'ix ri niquib'ixaj, man jun chic nitiquir nataman, xa jo'c ri i-ciento cuarenta y cuatro mil ri xa'colotaj-el chiquicajol ri ic'o choch-ulief. 4Ijeje' ri man xa'ka ta chupan ri pecado quiq'uin ixoki'. Ijeje' i-b'anak chirij ri Alaj Oveja xa chica-na lugar ri ni'a-ve. Jare' ri na'ay ri xa'cuol-pa chiquicajol ri vinak, y ijeje' i-richin ri Dios y i-richin ri Alaj Oveja. 5Y man jun tz'akon-tzij xlitaj chi alanak ta pa quichi', xa can i-sak ic'o choch ri ru-trono ri Dios. 6Y xintz'at jun chic ángel ri b'anak pa nic'aj ri rocaj, y jaja' ruc'uan ri evangelio, ri ch'ab'al ri can richin nojiel tiempo c'o, chi nuya' rutzijoxic chica quinojiel ri naciones ri ic'o choch-ulief, chica ri man junan ta qui-raza, ri man junan ta quich'ab'al, y ri man junan ta quitanamit. 7Y ri ángel cof nu'ej: Tixi'ij-ivi' choch ri Dios, y tiya' ruk'ij, ruma ri k'ij chi nu'on juzgar ya xalka. Tiya' ruk'ij ri Dios ri b'anayuon ri rocaj y ri roch-ulief, ri mar y ri nacimientos richin ya'. 8Y jun ruca'n ángel xch'o' je' y xu'ej: Ya xtzak, ya xtzak ri Babilonia; ri nem tanamet ri xb'ano chica quinojiel naciones ri ic'o choch-ulief chi xa'k'ab'ar pa ruk'a'; can xu'on chica chi xqui'an pecado riq'uin, ri inche'l niqui'an ri achi'a' y ri ixoki' ri niquicanuj-qui' chi niqui'an pecado. 9Y jun ruox ángel xch'o' je' y cof xu'ej: Xa c'o jun niyo'n ruk'ij ri na'ay bestia y nuya' ruk'ij ri ru-imagen, y nu'on recibir ri ru-marca chi'roch o chuk'a'; 10ri xtib'ano quire', can xtika ri rayoval ri Dios paro', ruma ri Dios man xtujoyovaj ta roch. Can xtu'on sufrir chupan ri k'ak' y azufre, chiquivach ri santos ángeles y choch ri Alaj Oveja. 11Y ri rusib'il ri k'ak' ri richin sufrimiento, jatol chicaj richin nojiel tiempo. Man jun b'ay xca'uxlan ta jub'a', ni pak'ij ni chak'a' ri nca'yo'n ruk'ij ri na'ay bestia, y ri niquiya' ruk'ij ri ru-imagen, y ri niquiya' quitzij chi xtiyo'x ri rub'e' chi'quivach o chiquik'a'. 12Ri i-ralc'ual chic ri Dios nica'xaj y niqui'an ri nca'ru'ej ri ru-mandamientos ri Dios y siempre quicukub'an quic'u'x riq'uin ri Jesús, can tic'ujie' qui-paciencia chupan ri sufrimiento. 13Y xinva'xaj chi c'o jun ri nich'o-pa chuva chicaj, y nu'ej: Tatz'ib'aj ri xtin'ej chava: Vacame, can ja'al ca'quicuot ri xca'con y xa quiniman-el ri Ajaf, xcha'. Y xinva'xaj je' chi ri Espíritu Santo xu'ej: Quire'. Ruma can xca'uxlan riq'uin ri quisamaj, y xtiyo'x rajal chica ri nojiel samaj ri xqui'an. 14Y antok xitzu'n chic apa, xintz'at jun mukul sak. Y paro' ri mukul re' tz'uyul jun ri can inche'l ri Jun ri Xtak-pa chicaj chi xalax chikacajol. Jaja' c'o jun corona ri b'anun cha oro pa rujaluon, y pa ruk'a' ruc'uan jun juos ri sima'j rutza'n y altíra roray. 15Y chupan ri templo xb'a'iel chic pa jun ángel, y cof nich'o' cha ri tz'uyul paro' ri mukul, y nu'ej cha: Tacusaj ri ajuos y tajuku-el la tico'n, ruma ja xalka ri huora y k'an chic ri tico'n ri c'o choch-ulief. 16Y ri tz'uyul paro' ri mukul quire' xu'on, xucusaj ri rujuos choch-ulief y xujuk-el ri tico'n. 17Y xb'a'iel chic pa jun ángel chupan ri templo ri c'o chicaj, ruc'uan je' jun juos ri sima'j rutza'n y altíra roray. 18Y riq'uin ri altar xb'a'iel-pa je' jun chic ángel ri yo'n autoridad cha paro' ri k'ak'. Y cof xch'o-apa cha ri ángel ri c'uayuon ri juos ri sima'j rutza'n y altíra roray y xu'ej: Tacusaj la ajuos chi nca'kupij ri tzakaj uva. Ruma ri uva ri ic'o choch-ulief ichak' chic. 19Y ri ángel ri c'uayuon ri juos ri altíra roray, quire' xu'on. Xucusaj chi xa'rukupij ri tzakaj uva. Después xa'ruya' chupan jun nem lugar inche'l pila chi nca'yitz'. Y ri yitz'uoj re' nuc'ut chakavach ri nem castigo ri xtuya' ri Dios. 20Ri uva can chuchi' ri tanamet xa'yitz'-ve. Y antok xyitz' ri uva chupan ri lugar inche'l pila, xa quic' yan chic xb'a'iel-pa. Y altíra q'uiy ri quic', ruma can trescientos kilómetros xunojsaj. Y xjotie' hasta c'a pache' niyo'x-ve ri freno pa quichi' ri quiej.

will be added

X\