Apocalipsis 13

1Y inre' xipi'ie' pa sanaye' chuchi' ri mar, y xintz'at chi chupan ri mar xb'a'iel-pa jun bestia ri c'o siete (vuku') rujaluon y diez (lajuj) ruc'a'. Y pa quive' ri ruc'a' c'o jujun corona. Y pa quive' ri rujaluon i-tz'ib'an b'i'aj ri niqui'ej chi jaja' ri Dios. 2Ri bestia ri xintz'at inche'l jun b'alom (tigre), ri rakan inche'l rakan ri oso, ri ruchi' inche'l ruchi' jun león (coj). Y ri dragón xuya' ru-poder y xuya' ri ru-trono cha y xuya' je' nem autoridad cha. 3Y xintz'at chi jun chiquivach ri rujaluon ri bestia re', ri c'aja' tiyo'x ri trono cha, socotajnak y can richin chi nicon. Pero ri socotajic xa xc'achoj y rumare' ri vinak ri ic'o choch-ulief, can xa'chapataj y xa'a chirij. 4Y ri vinak re' can xquiya' je' ruk'ij ri dragón, ruma jaja' ri xyo'n poder pa ruk'a' ri bestia. Ri vinak antok niquiya' ruk'ij ri bestia, niqui'ej: ¿C'o came jun ri junan riq'uin ri bestia va? ¿Y c'o came jun ri xtich'aco richin? nca'cha'. 5Ri bestia re' xyo'x lugar cha chi nuya-ka ruk'ij jaja' mismo riq'uin ri ruch'ab'al, y chi itziel nich'o' chirij ri Dios, y xyo'x autoridad cha chi nu'on gobernar chupan cuarenta y dos ic'. 6Y quire' xu'on ri bestia re'. Itziel xch'o' chirij ri Dios; itziel xch'o' chirij ri rub'e', altíra itziel tak tzij xa'ru'ej chirij ri rachuoch ri Dios y chiquij je' ri ic'o chicaj. 7Y xyo'x je' permiso cha, chi nu'on ayoval quiq'uin ri quiniman ri ruch'ab'al ri Dios y chi nca'ruch'ec. Xyo'x je' autoridad cha pa quive' quinojiel vinak ri man junan ta qui-raza, ri man junan ta quitanamit, man junan ta quich'ab'al y man junan ta qui-nación. 8Can quinojiel ri ic'o choch-ulief xquiya' ruk'ij ri bestia re'. Y ri xa'b'ano quire', ja ri man tz'ib'an ta quib'e' chupan ri libro richin ri c'aslien, ri ru-libro ri Alaj Oveja, ri xquimisas ruma quire' ranun-pa pensar ri Dios paro' antok c'a maja' c'o ri roch-ulief. 9Ri c'o ruxiquin, can tira'xaj ri ni'e'x: 10Ri nib'ano cha jun chic chi ni'a priexa, quire' je' xti'an cha jaja'. Y ri niquimisan cha espada, can cha espada je' xtiquimisas. Mare' ri quiniman ri ruch'ab'al ri Dios tic'ujie' qui-paciencia, y can tiquicukub'a' quic'u'x riq'uin ri Dios. 11Después xintz'at chi c'o jun chic bestia ri xb'a'iel-pa pan ulief. Y jaja' c'o ca'ye' ruc'a' inche'l richin jun alaj oveja. Pero nich'o' inche'l ri dragón. 12Y ri ruca'n bestia re', riq'uin ri ru-poder ri na'ay bestia nca'ru'on ri rusamaj. Can nu'on chica ri vinak ri ic'o choch-ulief chi niquiya' ruk'ij ri na'ay bestia, ri xc'achoj riq'uin ri socotajic, ri can richin chi nicon. 13Ri ruca'n bestia, nima'k tak milagros ri nca'ru'on. Can nu'on chi nika-pa k'ak' chicaj chi nika-pa choch ri roch-ulief chiquivach ri vinak. 14Y ruma yo'n permiso cha ri ruca'n bestia chi nca'ru'on milagros choch ri na'ay bestia, ri vinak ri ic'o choch-ulief can x'an maña chica. Y xu'ej chica ri vinak chi tiquib'ana' jun ru-imagen la na'ay bestia ri man xcon ta ruma ri socotajic ri x'an cha ruma espada. 15Y ri ruca'n bestia, xyo'x poder pa ruk'a' chi tuya' ruc'aslien ri ru-imagen ri na'ay bestia, chi quire' ri imagen re' tich'o' y tu'ej chi ca'quimisas quinojiel ri man niquiya' ta ruk'ij. 16Xu'on je' chi tiyo'x jun marca chica quinojiel ri vinak chiquik'a' derecha o chi'quivach. Chi ch'ute'k y chi nima'k, chi b'ayoma' y chi i-puobra, chi esclavos y chi libres. 17Y man jun chiquivach ri vinak nitiquir nilak'o o nic'ayin ta, xa manak ri marca o ri rub'e' ri na'ay bestia chuk'a' o chi'roch tz'ib'an cha letras o b'anun cha números. 18Y ri ru-número ri na'ay bestia ja ri seiscientos sesenta y seis; y ri número re', número richin vinak. Can q'uiy no'j nrajo' chi nina'ax ri chica nu'ej ri número re'. Rumare' ri vinak ri c'o runo'j, can tub'ana' pensar otz ri chica nu'ej ri ru-número ri na'ay bestia.

will be added

X\