Apocalipsis 12

1Y xk'alajin-pa chicaj jun señal nem; jun ixok can inche'l k'ij ri rutziak, can nich'ich'an, pa'l paro' ri ic'. C'o jun corona pa rujaluon, y ri corona re' ruc'uan doce (cab'alajuj) estrellas (ch'umil). 2Y ri ixok re' k'alaj chi ya nic'ujie' ruxulu'. Rumare' can altíra nisiq'uin. Can altíra ruquiy nuna'. 3Y c'o chic jun señal xk'alajin-pa chicaj; jun nem dragón quiak rij, c'o siete (vuku') rujaluon, diez (lajuj) ruc'a' y quic'uan jujun corona ri rujaluon. 4Y ri dragón re', xa riq'uin ri rujay xujoc-pa ri oxe' parte ri estrellas (ch'umil) ri ic'o chicaj, y xa'ruc'ak-pa paro' ri roch-ulief. Y xb'ac'ujie-apa choch ri ixok ri ya nic'ujie' ruxulu'. Ruchajin-apa chi antok xtalax ri xulu', ja nuc'ux. 5Ri ixok re' can xc'ujie-ve jun ral-ala'. Y ri ala' re' ni'rub'ana' gobernar quinojiel naciones riq'uin poder y man jun xtujoyovaj quivach. Ri ral ri ixok xuc'uax-el choch ri Dios ri tz'uyul pa ru-trono. 6Y ri ixok ri xc'ujie' ruxulu', xnumaj-el y x'a pa desierto, ruma jare' ri lugar ri b'anun preparar ruma ri Dios chi nucol. Y chire' nilix-ve ri ixok mil doscientos sesenta k'ij. 7Y después xb'anataj jun nem ayoval chicaj. Ri arcángel Miguel y ri ru-ángeles, xqui'an ayoval riq'uin ri dragón y ri itziel tak ángeles ri i-rich'ilan. 8Pero ri dragón y ri itziel tak ángeles ri i-rich'ilan man xa'ch'acuon ta, y man xyo'x ta chic lugar chica chi xa'c'ujie' chicaj. 9Y xc'ak-pa ri dragón junan quiq'uin ri itziel tak ángeles ri i-rich'ilan, c'a choch-ulief. Quire' x'an cha ri dragón, ri ni'e'x diablo y Satanás cha. Jaja' ri xuoc jun cumatz ojier can, y jaja' ri nib'ano maña chica quinojiel vinak ri ic'o choch-ulief. 10Y jare' antok xinva'xaj c'a chicaj chi c'o jun ri nich'o-pa cof, y nu'ej: Ja k'ij richin ri salvación (colotajic), ri poder y ri ru-reino ri Ka-Dios. Y quire' je' ya xalka ri k'ij chi quinojiel tiquib'ana' ri nu'ej ri Cristo. Ruma ri jun ri nib'ano acusar quichin ri hermanos choch ri Dios chi pak'ij chi chak'a', ya xc'ak-el. 11Y ri hermanos re' xa'ch'acuon chirij ri diablo, ruma ri Alaj Oveja ri xcon y xiel ruquiq'uiel. Y ruma je' man xa'q'uix ta xqui'ej chi quiniman ri ruch'ab'al y man xquixi'ij ta qui' antok ni'e'x chica chi nca'quimisas. 12Ixre' ri ixc'o chicaj, tiquicuot ri ivánima. Pero ixre' ri ixc'o choch-ulief y ri ixc'o chupan ri mar, can juye' ivach. Ruma ri diablo xka-ka iviq'uin, y yacatajnak royoval ruma rata'n chi jub'a' chic tiempo ri yo'n cha. 13Ri dragón xc'ak-pa, y antok xuna' chi choch yan chic ri ulief c'o-ve, ja xutzakla'iej ri ixok ri xc'ujie' ral-ala'. 14Y ri ixok re' xyo'x ca'ye' nima'k ruxic' ri inche'l ruxic' ri águila, chi nitiquir nib'aka chupan ri desierto, ri lugar ri b'anun preparar ruma ri Dios chi nilix oxe' juna' riq'uin nic'aj. Chupan ri lugar re' man xtilitaj ta ruma ri dragón. 15Y ri dragón re' xralasaj-pa ya' pa ruchi' inche'l jun río y xuquiraj chirij ri ixok, chi quire' ri ya' xuc'uaj ta ri ixok. 16Pero ri roch-ulief xuto' ri ixok ruma ri ulief xjakataj y xub'ak' cha'nin ri río ri xuquiraj ri dragón. 17Y ruma ri dragón man xtiquir ta chirij ri ixok, altíra royoval xyacataj. Rumare' x'a y xb'arub'ana' ayoval quiq'uin ri ral y ri riy ri ixok. Quinojiel ri vinak re' niquinimaj ri mandamientos ri xa'ru'ej ri Dios, y c'o je' pa cánima ri ketzij ri i-ru'e'n can ri Jesucristo.

will be added

X\