Apocalipsis 11

1Xyo'x jun aj chuva, ri inche'l jun chie' richin atab'al. Y x'e'x je' chuva: Capalaj y tavataj rupan ru-templo ri Dios, tavataj ri altar, y ca'vijilaj i-jane' (i-jaro') nca'yo'n ruk'ij ri Dios chire'. 2Pero ri roch jay richin ri ru-templo ri Dios, man tavataj, ruma xa jachuon chic pa quik'a' ri vinak ri man israelitas ta; y cuarenta y dos ic' xtiquixak' ri tanamet santa. 3Y inre' xca'ntak-el ca'ye' nusamajiel chi xtiquitzijuoj ri nuch'ab'al, y xtiqui'an mil doscientos sesenta k'ij, y xtiquicusaj tziak richin b'is, xcha' chuva. 4Y ja ri ca'ye' samajiel re' i-inche'l ri ca'ye' mata olivos y ri ca'ye' candeleros ri ic'o-apa choch ri Dios, ri Rajaf ri roch-ulief. 5Y xa c'o jun nrajo' nu'on itziel chica, xa xtiel-pa k'ak' pa quichi' ijeje', chi nca'quiq'uis ri quiyoval chiquij. Y xa jun c'o nrajo' nu'on chica, can xtiq'uis riq'uin ri k'ak' re'. 6Ri ca'ye' samajiel re' yo'n poder chica, chi niquitz'apij ri chicaj, chi quire' man nika ta job' chupan ri tiempo antok ijeje' xtiquitzijuoj ri xu'ej ri Dios chica. Y yo'n je' poder chica chi niqui'an cha ri ya' chi ntuoc quic' y chi niquiya' je' chica-na sufrimiento pa quive' ri ic'o choch-ulief xa jane' na (jaro' na) mul nicajo' niquiya'. 7Y antok ri ca'ye' re' quiq'uisuon chic rutzijoxic ri ruch'ab'al ri Dios, ri bestia ri ntiel-pa chupan ri jul ri man niq'uis ta rakan ri can k'aku'n rupan, xtu'on ayoval quiq'uin, can xca'ruch'ec y xca'ruquimisaj. 8Y ri qui-cuerpo xca'c'ujie' can chire' pa nem b'ay richin ri nem tanamet; pache' xquimisas-ve ri Kajaf Jesucristo choch ri cruz, ri tanamet re' ni'e'x je' Sodoma y Egipto cha, ruma ri itziel tak kax ri niqui'an ri vinak ri ic'o chire'. 9Y oxe' k'ij riq'uin nic'aj xca'c'ujie' ri qui-cuerpo chiquivach ri vinak ri man junan ta quitanamit, man junan ta qui-raza, man junan ta quich'ab'al y man junan ta qui-nación. Y ijeje' man xtiquiya' ta permiso chi nca'muk ri qui-cuerpo. 10Y ri vinak re' can altíra xca'quicuot ruma xa'quimisas ri ca'ye' profetas. Y ruma altíra nca'quicuot, can xca'quic'ax regalos chiquivach, ruma altíra xqui'an sufrir pa quik'a' ri xa'tzijuon ri ruch'ab'al ri Dios. 11Y antok k'axnak chic ri oxe' k'ij riq'uin nic'aj, ri espíritu richin c'aslien ri patanak riq'uin ri Dios xuoc chic quiq'uin. Rumare' ijeje' xa'pi'ie' chic jun b'ay. Y ri vinak ri xa'tz'ato quichin, can altíra xquixi'ij-qui'. 12Y ri ca'ye' rusamajiel ri Dios xca'xaj chi c'o jun ri nich'o-pa cof chicaj y nu'ej chica: Quixjotie-pa vave' chicaj, xcha'. Y ijeje' xa'jotie-el chicaj chupan jun mukul. Y ri vinak ri itziel xa'tz'ato quichin, can xa'quitz'at-el antok xa'a. 13Chupan ri misma huora re' xu'on jun nem cub'rakan, y ri décima parte ri tanamet xvuluvu'; y ruma ri cub'rakan, xa'con siete (vuku') mil vinak. Y ri nic'aj chic altíra xquixi'ij-qui', y xquiya' ruk'ij ri Dios ri c'o chicaj. 14Ri ruca'n sufrimiento ya xak'ax. Y can ja patanak cha'nin ri ruox sufrimiento. 15Y ri séptimo (chi vuku') ángel xuxupuj ri ru-trompeta. Y ic'o ri cof xa'ch'o' chicaj, y niqui'ej: Ri gobiernos ri ic'o choch nojiel ri ulief, vacame can i-richin chic ri Kajaf Dios y i-richin chic je' ri Cristo. Y jaja' ri xtib'ano reinar richin nojiel tiempo. 16Y ri veinticuatro ch'itak mámix ri i-tz'uyul choch ri Dios chupan ri qui-tronos, xa'xuquie-ka choch y xquikasaj-ka ri quijaluon c'a pan ulief chi niquiya' ruk'ij. 17Y niqui'ej: Ajaf Dios, tiox b'a' nakaya' chava. Atre' ri c'o nojiel poder pan ak'a', can atc'o antok maja' c'o ri roch-ulief, atc'o vacame, y xcac'ujie' je' chupan ri tiempo ri más chakavach-apa. Tiox b'a' nakaya' chava, ruma vacame can nac'ut chi atre' nem a-poder, y atre' ri ncab'ano reinar. 18Ri naciones ri ic'o choch-ulief xpa quiyoval chavij, pero xa ja xalka ri k'ij chi atre' xyacataj avayoval. Y ja je' xalka ri k'ij chi nca'an juzgar ri quiminaki'. Pero chica ri asamajiel ri profetas, chica ri quiniman ri ach'ab'al y chica ri nca'yo'n ak'ij, chi ch'ute'k chi nima'k, can xtaya' jun utzulaj ruc'axiel chica, y ja je' xalka ri k'ij chi atre' nca'q'uis ri vinak ri nca'q'uiso paro' ri roch-ulief, xa'cha'. 19Y ja xjakataj ri ru-templo ri Dios ri c'o chicaj. Y can xk'alajin-pa ri caja richin ri ru-pacto ri Dios. Y xu'on yocopa', xpa altíra ch'ab'al, xu'on ráya, xu'on jun nem cub'rakan, y xpa jun tremenda sakb'ach.

will be added

X\