Apocalipsis 10

1Y xintz'at jun chic ángel ri c'o altíra ruchuk'a' nika-pa chicaj. C'o-pa chupan jun mukul, y c'o jun xocok'a' (arco iris) pa rujaluon. Xintz'at je' chi ri rupalaj can inche'l ri k'ij. Y ri rakan inche'l ruxak-k'ak'. 2Y pa ruk'a' ruc'uan jun ch'iti libro jakal. Xuya' ri rakan derecha paro' ri mar, y ri izquierda xuya' paro' ri ulief. 3Ri ángel re', altíra cof xch'o', y ri rukul ri xu'on, can inche'l rukul jun león (coj). Y antok xch'o', ic'o i-siete (ivuku') inche'l ráya ri xa'ch'o-pa je'. 4Y antok xa'ch'o' ri i-siete (ivuku') inche'l ráya, ja xinvajo' ta xintz'ib'aj ri xqui'ej. Pero c'o jun ri xch'o-pa chicaj y xu'ej-pa chuva: Jo'c aviq'uin atre' ca'c'ujie-ka ri tzij ri xqui'ej ri i-siete (ivuku') inche'l ráya, y man tatz'ib'aj. 5Y ri ángel ri xintz'at chi ruyo'n jun rakan paro' ri mar y ri jun chic paro' ri ulief, xupilisaj ri ruk'a' chicaj, 6y xu'ej: Inre' ni'an jurar pa rub'e' ri c'o richin nojiel tiempo, ri xb'ano ri rocaj y ri ic'o choch, ri xb'ano ri ulief y ri ic'o choch, ri xb'ano ri mar y ri ic'o chupan, can pa rub'e' jaja' ni'an jurar; chi man chic xtak'ax ta más tiempo. 7Ruma antok ri séptimo (chi vuku') ángel xtuxupuj ri ru-trompeta, ja xca'b'anataj ri c'o pan aval riq'uin ri Dios, inche'l xu'ej chica ri rusamajiel ri profetas ri xa'c'ujie' ojier can tiempo. 8Y ri xch'o-pa chicaj chuva, xch'o' chic pa chuva jun b'ay y xu'ej: Ca'in y tatz'ama' ri ch'iti libro jakal pa ruk'a' ri ángel ri ruyo'n jun rakan paro' ri mar, y ri jun chic paro' ri ulief, xcha'. 9Can xi'a-apa riq'uin ri ángel, y xinc'utuj ri ch'iti libro cha. Y ri ángel xu'ej chuva: Tatz'ama' y tatija'. Y xtana' pan achi' que-que' inche'l cab'. Pero chapan can c'ay xtu'on. 10Y xintz'om-apa ri ch'iti libro pa ruk'a' ri ángel, y xintej-ka. Y pa nuchi' xinna' que-que' inche'l ri cab', pero chinupan can c'ay xu'on-ka. 11Y ri ángel xu'ej chuva: Can nic'atzin chi na'ej chic jun b'ay ri nu'ej ri Dios chiquij q'uiy tanamet, naciones, reyes, y chiquij vinak ri man junan ta quich'ab'al.

will be added

X\