Apocalipsis 1

1Ri Dios xu'ej cha ri Jesucristo, richin chi jaja' tu'ej chica ri ru-siervos ri kax ri ya xca'b'anataj. Rumare' ri Jesucristo xutak-pa jun ru-ángel riq'uin ri Juan ri ru-siervo, chi xu'ej cha ri xca'b'anataj. 2Y ri Juan xu'ej chi ketzij ri ruch'ab'al ri Dios, chi ketzij ri xu'ej ri Jesucristo, y chi ketzij je' nojiel ri xutz'at. 3Can ja'al tiquicuot ri jun ri nib'ano leer ri tz'ib'an chupan va libro va, y can ja'al je' ca'quicuot ri nca'c'axan y niquinimaj ri nu'ej ri tz'ib'an chupan va libro va. Ruma xa cierca chic c'o-ve ri k'ij antok xca'b'anataj nojiel re'. 4Inre' Juan, nitz'ib'aj-el chica ri siete (vuku') iglesias, ri ic'o chupan ri lugar rub'inan Asia; can tic'ujie' iviq'uin ri favor y ri paz ri nuya' ri Dios; ri Dios ri can c'o-ve antok maja' c'o ri roch-ulief, c'o vacame, y xtic'ujie' chupan ri tiempo chakavach-apa. Y tic'ujie' je' iviq'uin ri favor y ri paz quichin ri siete (vuku') espíritus ri ic'o choch ri ru-trono ri Dios. 5Y tic'ujie' je' iviq'uin ri favor y ri paz ri nuya' ri Jesucristo, ri jo'c ri ketzij nu'ej, ri xc'astaj-pa na'ay chiquicajol ri quiminaki' y c'o pa quive' quinojiel ri reyes ri ic'o choch-ulief. Jaja' altíra nkojrajo', y xuch'aj ri ka-pecados cha ri ruquiq'uiel. 6Y xu'on chika ojre' chi xojuoc reyes y sacerdotes chi naka'an rusamaj ri Rutata' Dios. ¡Ja ri Jesucristo ri c'o ruk'ij y c'o ru-autoridad richin nojiel tiempo! Amén. 7Tina'iej c'a chi ri Jesucristo xtika-pa chicaj chupan mukul. Y quinojiel vinak xca'tz'ato richin. Hasta ri vinak ri xa'quimisan richin, xtiquitz'at je'. Quinojiel vinak ri ic'o choch-ulief xca'uok' antok xtiquitz'at jaja'. Y can quire' xtib'anataj. 8Ri Ajaf, ri c'o nojiel poder pa ruk'a', jaja' can c'o-ve antok maja' c'o ri roch-ulief, c'o vacame, y xtic'ujie' chupan ri tiempo chakavach-apa; jaja' nu'ej: Inre' ri Alfa y ri Omega, inre' ri na'ay y ri ruq'uisb'al, nicha' ri Ajaf. 9Y inre' Juan in iv-hermano, can ni'an sufrir junan iviq'uin ixre', junan inc'o iviq'uin chupan ri ru-reino ri Dios, y can junan iviq'uin, nuya' ka-paciencia ri Jesucristo. Inre' ruma xin'an predicar ri Jesucristo y ruma ri ruch'ab'al ri Dios, mare' xinalyo'x chupan ri isla rub'inan Patmos. 10Chupan jun k'ij richin ri Ajaf, inre' xin'an c'a jun inche'l achic' ruma ri ru-poder ri Espíritu Santo, y xinva'xaj chi c'o jun nich'o-pa chuvij. Y can cof nich'o-pa, can inche'l nik'ajan jun trompeta. 11Y quire' xu'ej chuva: Inre' ri Alfa y ri Omega, inre' ri nab'ayal y ri ruq'uisb'al. Tatz'ib'aj c'a chupan jun libro nojiel ri natz'at, y tataka-el chica ri siete (vuku') iglesias ri ic'o Asia; ri c'o pa tanamet Efeso, ri c'o pa tanamet Esmirna, ri c'o pa tanamet Pérgamo, ri c'o pa tanamet Tiatira, ri c'o pa tanamet Sardis, ri c'o pa tanamet Filadelfia y ri c'o pa tanamet Laodicea. 12Y xitzu'n can chuvij chi nitz'at ri chica nich'o-pa chuva. Y xintz'at siete (vuku') candeleros ri i-b'anun cha oro. 13Y pa nic'aj ri siete (vuku') candeleros, pa'l jun ri can inche'l ri Jun ri Xtak-pa chicaj chi xalax chikacajol. Ri rutziak c'a nika-ka c'a chukul rakan, y chuc'u'x nak'ax jun cinturón ri b'anun cha oro. 14Ri rujaluon y ri ruve' can sak, inche'l ri lana sak y can inche'l je' hielo. Y ri nak'aroch can inche'l ruxak-k'ak'. 15Ri rakan, can nca'ch'ich'an inche'l ri bronce antok c'o chupan k'ak'. Y antok nich'o', can inche'l nivajaj q'uiy ya'. 16Y pa ruk'a' derecha ruc'uan siete (vuku') estrellas (ch'umil) y pa ruchi' ntiel-pa jun espada sima'j rutza'n ri ca'ye' lado c'o roray. Y ri rutzub'al, can inche'l ri k'ij antok altíra ruk'ak'al. 17Antok inre' xintz'at, xitzak-ka chirakan inche'l xa xicon. Pero jaja' xuya' ri ruk'a' derecha pano' y xu'ej chuva: Man taxi'ij-avi', inre' ri nab'ayal y ri ruq'uisb'al, 18y inre' ri inc'as. Can xicon, pero vacame inc'as richin nojiel tiempo. Amén. Y c'o je' poder pa nuk'a' paro' ri camic y paro' ri lugar quichin ri quiminaki'. 19Tatz'ib'aj ri kax ri xatz'at, ri nca'b'anataj vacame y ri xca'b'anataj je' chakavach-apa. 20Ri siete (vuku') estrellas (ch'umil) ri xatz'at pa nuk'a' derecha y ri siete (vuku') candeleros ri i-b'anun cha oro, can c'o niquic'ut. Ri siete (vuku') estrellas (ch'umil) ri nuc'uan pa nuk'a' derecha, ja ri siete (vuku') nusamajiel ri ic'o pa quive' ri siete (vuku') iglesias, y ri siete (vuku') candeleros ri i-b'anun cha oro, ja ri siete (vuku') iglesias.

will be added

X\