Filipenses 4

1Rumare' hermanos, can tiya' ivuchuk'a' riq'uin ri Ajaf Jesucristo. Inre' altíra nquixvajo' y nirayij je' nquixtz'at jun b'ay chic. Inre' nquiquicuot ivuma ixre', ruma riq'uin ri ic'aslien, k'alaj chi otz ri samaj ri xin'an chicajol; rumare' vacame can ix inche'l jun nu-premio. 2Nic'utuj favor chica ri hermanas Evodia y Síntique chi junan cánima tiquib'ana', ruma quiniman chic ri Ajaf. 3Y atre' ri at vach'il, ri atc'o chupan rusamaj ri Dios, nic'utuj favor chava chi ca'to' ri ca'ye' hermanas re' chi junan cánima tiquib'ana', ruma ijeje' quitijuon quik'ij je' chupan rusamaj ri Dios; can junan xojsamaj chi xkatzijuoj ri evangelio. Junan xa'samaj viq'uin, quiq'uin ri hermano Clemente y nic'aj chic hermanos. Can c'o chic quib'e' chicaj, tz'ib'an chic chupan ri libro richin ri c'aslien. 4Siempre tiquicuot ri ivánima riq'uin ri Ajaf. Jun chic b'ay ni'ej: ¡Siempre tiquicuot ri ivánima! 5Otz ino'j tib'ana' quiq'uin quinojiel vinak. Ruma ri Ajaf ya nipa chic. 6Man tich'ujirisaj-ivi' chirij chica-na kax, xa tiya' nojiel pa ruk'a' ri Dios, y tic'utuj cha jaja' ri nic'atzin chiva, y man timastaj je' chi ntiya' tiox b'a' cha. 7Xa quire' xti'an, ri paz ri nipa riq'uin ri Dios xtic'ujie' riq'uin ivánima; y ri paz re' can xtuchajij ri ivánima y xquixruto' riq'uin ri nti'an pensar. Quire' xtu'on chiva ruma jo'c jun ib'anun riq'uin ri Jesucristo. Y ri paz re' man xti'ka ta pa kave' otz (man xtaka'an ta entender otz), ruma can nem ri samaj nu'on. 8Y pa ruq'uisb'al hermanos, ja ri ketzij, ri c'o ruk'ij, ri choj, ri sak, ri ja'al y ri c'o otz rub'ixic, ri can otz, y ri nika choch ri Dios, jare' ri tib'ana' pensar. 9Can ja ri xivatamaj, ri xinimaj, ri xivaxaj y ri xitz'at viq'uin, jare' tib'ana'. Y ri Dios ri niyo'n paz, can xtic'ujie' iviq'uin. 10Altíra niquicuot vánima y niya' tiox b'a' cha ri Ajaf ivuma. Ruma xinataj chic pa chiva chi nquinito' chic pa jun b'ay. Pero re' man ruma ta chi xinimastaj can, man quire' ta, xa ruma man ix-tiquirnak ta. 11Y nojiel re' man ni'ej ta chiva ruma c'o nic'atzin chuva. Man quire' ta. Ruma inre' nquiquicuot antok c'o viq'uin ri nic'atzin chuva; y xa manak, nquiquicuot je'. 12Vata'n nik'asaj ri nuc'aslien antok man jun kax c'o viq'uin y vata'n je' nik'asaj ri nuc'aslien antok c'o q'uiy kax viq'uin. Q'uiy xinvatamaj yan y nquiquicuot riq'uin ri chica nik'asaj, xa c'o ri chica nitej o manak, xa c'o q'uiy kax viq'uin o manak. 13Nojiel nquitiquir ni'an ruma ja ri Cristo niyo'n vuchuk'a'. 14Mesque quire' nub'anun, ixre' otz ri xi'an, chi xijoyovaj-pa noch y xina' ri sufrimiento ri pache' inc'o-ve. 15Ixre' hermanos aj-Filipos, can ivata'n chi antok xinalka iviq'uin na'ay y nuc'amun-pa ri evangelio chiva, después antok xiniel-el iviq'uin Macedonia, jo'c ixre' xiya-el chuva; man jun chic iglesia xyo'n-el chuva, jo'c ixre' quire' xi'an. 16C'a inc'o pa tanamet Tesalónica antok xyo'x chuva ri itakuon-pa ixre' chi nquinito'. Man jo'c ta jun b'ay quire' xi'an antok xic'ujie' chire'. 17Y ruma xinataj chic pa chiva, can niquicuot ri vánima, pero man ruma ta ri xitak-pa chuva. Inre' nquiquicuot ruma vata'n chi xtiyo'x jun utzulaj ruc'axiel chiva. 18Vacame c'o chic nojiel viq'uin, ruma ri hermano Epafrodito xalruya' chuva ri itakuon-pa. Rumare' man jun chic nu'on falta chuva, ruma can q'uiy ri xitak-pa chuva. Ri xi'an viq'uin, can jub'ul ruxla' choch ri Dios, can nika choch, y xu'on recibir. 19Ri Ka-Dios ri can c'o-ve ruk'ij y can c'o altíra rub'ayomal, xtuya' c'a nojiel ri xtic'atzin chiva ruma jo'c jun ib'anun riq'uin ri Cristo Jesús. 20Ri Katata' Dios can tiyo'x ruk'ij richin nojiel tiempo. Amén. 21Tiya' jun saludo chica quinojiel ri santos hermanos ri jo'c jun quib'anun riq'uin ri Cristo Jesús. Ri hermanos ri ic'o viq'uin niquitak-el je' jun saludo. 22Can quinojiel c'a ri santos hermanos niquitak-el jun saludo chiva. Pero ri más nca'jo'n chi niquitak-el jun saludo chiva, ja ri nca'samaj pa rachuoch ri César. 23Ja ta ri ru-favor ri Kajaf Jesucristo tic'ujie' iviq'uin chi'ixvonojiel. Amén.

will be added

X\