Filipenses 3

1Hermanos, vacame ni'ej chiva chi tiquicuot ri ivánima riq'uin ri Ajaf. Chinoch inre', nak kax nina' chi nitz'ib'aj chic el chiva jun b'ay ri ya nu'e'n chiva, ruma can nic'atzin. 2Can tib'ana' cuenta-ivi' chiquivach ri vinak ri niqui'an inche'l niqui'an ri itziel tak tz'e', ruma niqui'ej chi i-rusamajiel ri Dios y xa ja ri itziel tak kax ri niqui'an; y niqui'ej chi nic'atzin chi ni'an ri circuncisión cha jun vinak chi nicolotaj. 3Pero choch ri Dios, ojre' c'a ri b'anun ri circuncisión riq'uin kánima, ruma c'o chic ri Espíritu Santo kiq'uin chi nkojruto' chi nakaya' ruk'ij ri Dios. Y nkojquicuot naka'ej chi ya xkanimaj ri Cristo Jesús y man nic'atzin ta chi ni'an ri circuncisión chika chi nkojcolotaj. 4Xa ta ruma ri otz ri kab'anun pa kac'aslien, rumare' nkojcolotaj, ja ta inre' ri na'ay nquicolotaj. Ruma ri nuc'aslien inre' más otz choch ri quic'aslien ri nca'e'n chi nca'colotaj ruma otz quic'aslien. 5Ruma inre' ocho (vakxaki') k'ij quinalax antok x'an ri circuncisión chuva. Inre' in jun israelita, in rumáma can ri Benjamín. Ri ntie-nata' i-hebreos. Inre' xinuoc jun fariseo, rumare' xintej nuk'ij chi xin'an ri nu'ej ri ru-ley ri Moisés. 6Can riq'uin nojiel vánima xa'n'an perseguir ri quiniman chic ri Jesucristo ri ni'e'x iglesia chica, xin'an chica chi xqui'an sufrir, ruma xin'an pensar chi quire' nrajo' ri Dios. Inre' can xinna' chi choj ri nuc'aslien, ruma xintej nuk'ij chi xin'an ri nu'ej ri ru-ley ri Moisés. 7Nojiel re' can i-otz chinoch inre'; pero antok xi'ka pano' (xin'an entender) chi xa man jun nca'c'atzin chuva, ja xa'nya' can ruma xinvajo' ri Cristo. 8Nojiel ri can nuyo'n vánima riq'uin, ya xinya' can. Man jun chic quikalien chinoch inre'. Quire' xin'an ruma xinvatamaj roch ri Vajaf Jesucristo. Ruma ri Cristo, xinya' can nojiel, ruma mies chinoch. Quire' xin'an ruma nivajo' chi ri Cristo ntuoc Vajaf, 9y ruma nivajo' chi jo'c jun ni'an riq'uin jaja'. Nivajo' chi ntiel chi man jun chic nu-pecado choch ri Dios. Ri ru-ley ri Moisés man niya' ta chic vánima riq'uin, ruma vata'n chi man nquitiquir ta ni'an nojiel ri nu'ej. Can xincukub'a' nuc'u'x riq'uin ri Cristo; rumare' ri Dios xu'on chuva chi man jun chic nu-pecado choch jaja'. Y quire' nu'on chica quinojiel ri niquicukub'a' quic'u'x riq'uin ri Cristo. 10Can nivajo' nivatamaj más roch ri Cristo y nisamaj ri ru-poder ri Dios pa nuc'aslien, inche'l ri poder ri xucusaj antok xuc'asuoj ri Cristo chiquicajol ri quiminaki'. Nivajo' ni'an sufrir ruma ri ruch'ab'al ri Dios, can inche'l xu'on sufrir ri Cristo. Nivajo' nic'ut chi inre' can inche'l xicon riq'uin ri Cristo choch ri cruz. 11Can nitej nuk'ij, ruma nivajo' nquic'astaj chiquicajol ri quiminaki' y nquib'ac'ujie' chicaj riq'uin ri Dios. 12Inre' man ni'an ta chi ya viluon chic nojiel ri c'o riq'uin ri Cristo. Ni man ni'an ta je' chi can ja'al chic ri nuc'aslien, ruma xa c'a ja nitej nuk'ij chi ntuoc vichin nojiel ri c'o riq'uin ri Cristo Jesús; jare' ri xrajo' chuva antok xirayuoj. 13Hermanos, inre' man ni'ej ta chi ya xa'nvil nojiel ri c'o chicaj riq'uin ri Cristo, xa nitej nuk'ij chi nivil. Ri ni'an pensar jo'c ri nca'pa chinoch-apa y man nca'c'atzin ta chic chuva chi ni'an pensar ri ya xa'k'ax. 14Can nitej nuk'ij chi nquib'aka chupan ri meta, ruma nivajo' nich'ec ri premio ri nuya' ri Dios. Y ruma ri Cristo Jesús, ri Dios xirayuoj inre'. 15Inre' nivajo' chi konojiel ri ketzij kayo'n chic kánima riq'uin ri Dios quire' ta naka'an pensar. Y xa ixre' man ja ta re' ri nti'an pensar, ri Dios je' xtu'ej chiva. 16Pero chirij ri ruyo'n ri Dios chika, can quire' c'a nrajo' chi naka'an pa kac'aslien y can junan ta naka'an pensar konojiel. 17Hermanos, tib'ana' inche'l ri ni'an inre'; y tib'ana' inche'l niqui'an ri nic'aj chic hermanos chicajol, ri can niqui'an je' inche'l ni'an inre'. 18Ruma iq'uiy ri itziel niquitz'at ri Cristo y man niquinimaj ta chi jo'c riq'uin ri rucamic choch ri cruz nkojcolotaj. Y re' q'uiy c'a mul nu'e'n chic chiva, y vacame can nquinuok' ninataj chiva. 19Pa ruq'uisb'al, ijeje' xa pa k'ak' xca'b'aka-ve. Jo'c ri va'en ri ninataj chica, y jare' acunak qui-dios. Y niqui'an chi i-nima'k tak vinak y man nca'q'uix ta ruma ri niqui'an, ruma chiquivach ijeje' can otz ri niqui'an. Can b'anak cánima chirij ri kax ri c'o vave' choch-ulief. 20Pero ojre' oj richin chic ri chicaj, ri pache' c'o-ve ri Ajaf Jesucristo ri Ka-Salvador (caloy-kichin), y nkojquicuot kayo'ien ri k'ij antok xtipa chic. 21Ri ka-cuerpo vacame man jun rakalien, pero xtalka jun k'ij antok ri Jesús xtuc'ax, y xkojuoc inche'l jaja' ri can c'o ruk'ij. Quire' xtu'on chika ruma jaja' can nem ri ru-poder, y ja poder re' ri nucusaj chi nic'ujie' nojiel pa ruk'a'.

will be added

X\