Filipenses 2

1Ri Cristo nquixru'on consolar, nuya' amor chicajol ruma iniman, y ri Ru-Espíritu c'o iviq'uin y jo'c jun ivánima rub'anun chiva, y riq'uin nojiel ivánima ntivajo-ivi' y ntijoyovaj ivach chib'il-ivi'; 2rumare' ni'ej chiva chi junan ivánima tib'ana' y siempre tivajo-ivi'. Nojiel ri nti'an, riq'uin junan ivánima tib'ana'. Xa quire' xti'an, inre' can xquiquicuot más ivuma ixre'. 3Nojiel ri nti'an, man ti'an ruma ntivajo' chi c'o otz nuc'am-pa jo'c chiva ixre', o ruma ntivajo' chi ni'an nem chiva. Pa ruc'axiel re', xa co'l-oc tib'ana' chiquivach ri nic'aj chic. 4Man jo'c ta ri nika chivach ixre' ri nti'an pensar, xa tib'ana' je' pensar ri nika chiquivach ri nic'aj chic. 5Can tib'ana' inche'l ri xu'on ri Cristo Jesús. 6Jaja' can Dios-ve, pero man xu'on ta chi c'o ruk'ij antok xc'ujie' vave' choch-ulief. 7Xuya' can ri ruk'ij y xal'alax-ka choch-ulief. Can xuoc vinak inche'l ojre'; xu'on inche'l jun esclavo. 8Jaja' xuoc vinak inche'l ojre' y co'l xu'on. Can xunimaj y xu'on nojiel ri xu'ej ri Dios cha; quire' xu'on hasta c'a xquimisas, y choch jun cruz xquimisas-ve. 9Y rumare' ri Dios xu'on cha chi c'o ruk'ij chila chicaj y xuoc Namalaj Ajaf paro' nojiel. Y xuya' jun rub'e' ri más nem chiquivach quinojiel b'i'aj. 10Chi quire' pa rub'e' ri Jesús, quinojiel ca'xuquie' ri ic'o chicaj, ri ic'o choch-ulief y ri ic'o chuxie' ka ri ulief. 11Y quinojiel tiqui'ej chi ri Jesucristo jare' ri Ajaf, chi quire' niquiya' ruk'ij ri Katata' Dios. 12Rumare', ixre' ri altíra nquixvajo', ni'ej chiva chi siempre quixniman inche'l ib'anun-pa antok xic'ujie' iviq'uin. Tib'ana' más vacame, mesque man inc'o ta iviq'uin. Ixre' ya xixcolotaj, rumare' tib'ana' cuenta-ivi' y tixi'ij-ivi' chi nti'an pecado. 13Ri Dios nisamaj riq'uin ivánima, y jaja' nu'on chiva chi ntirayij nti'an ri nika choch jaja'. Y nuya' je' ivuchuk'a' chi nquixtiquir nti'an ri nrajo'. 14Y nojiel ri nti'an, can riq'uin nojiel ivánima tib'ana'. Man ca'ye' ta ic'u'x, ni man ti'an ayoval. 15Can tik'alajin chi otz ri ic'aslien y man jun itziel kax tilitaj chivij. Can tik'alajin chi ix ralc'ual ri Dios y man jun itziel kax pan ic'aslien, mesque ixc'o choch-ulief chiquicajol ri vinak ri man choj ta quic'aslien, ri i-sachnak riq'uin ri quino'j. Pero ixre' ntiya' ri luz chica ri vinak re'. 16Can ntitzijuoj ri ch'ab'al richin c'aslien chica, chi quire' ri vánima can xtiquicuot ivuma ixre' chupan ri k'ij antok xtipa chic ri Cristo, ruma xtik'alajin chi c'o xc'atzin ri samaj ri xin'an iviq'uin. 17Can ni'an sufrir ruma ri ruch'ab'al ri Dios ri nitzijuoj, pero ixre' can xicukub'a' ic'u'x riq'uin ri Dios. Ixre' can xijach ri ic'aslien cha ri Dios y rumare' inre' nquiquicuot. Y mesque nquiquimisas ta, inre' can nquiquicuot junan iviq'uin. 18Y quire' je' tib'ana' ixre', can quixquicuot viq'uin. 19Xa quire' nrajo' ri Ajaf Jesús, ri hermano Timoteo xti'ka iviq'uin. Xtintak-el cha'nin chi nra'xaj-pa ri chica ib'anun. Y quire' xquiquicuot inre'. 20Y man jun chic c'o viq'uin ri junan ta ránima viq'uin, inche'l ri Timoteo, rumare' jaja' nrajo' nuna'iej ri chica ib'anun, y mare' altíra nquixruc'uxlaj. 21Ri nic'aj chic ri ic'o viq'uin, jo'c ri nika chiquivach ijeje' ri niqui'an pensar, y man niqui'an ta pensar ri chica nic'atzin pa rusamaj ri Jesucristo. 22Pero ri hermano Timoteo can otz ruc'aslien. Ivata'n chi jaja' inche'l valc'ual rub'anun, ruma samajnak viq'uin chi nakatzijuoj ri evangelio. 23Inre' nivajo' nitak-el ri Timoteo iviq'uin, pero c'a niva'xaj-na ri chica xtiqui'ej ri achi'a' ri nca'b'ano juzgar vichin, xa nquilasas-el o manak. 24Y cukul nuc'u'x riq'uin ri Ajaf, chi jaja' xtu'on chuva inre' chi cha'nin xquitiquir xquib'aka iviq'uin. 25Pero vacame xin'an pensar chi ri hermano Epafrodito nitak yan el iviq'uin; ixre' xitak-pa jaja' viq'uin chi xiruto' riq'uin ri xc'atzin chuva. Can kach'il c'a ki' y junan katijuon kak'ij riq'uin pa rusamaj ri Dios. 26Ri Epafrodito ya nrajo' nquixrutz'at y altíra nib'isuon, ruma rata'n chi ixre' xivaxaj chi xyavaj. 27Y can ketzij chi jaja' altíra xyavaj y jub'a' ma xcon. Pero ri Dios xujoyovaj roch y xujoyovaj je' noch inre'. Ruma xa ta xcon ri Epafrodito, xpa ta chic jun b'is riq'uin vánima, ruma ya nquib'isuon. 28Rumare' nivajo' chi ya nitak-el iviq'uin, chi niquicuot ri ivánima antok xtitz'at. Y antok c'o chic iviq'uin, inre' man chic xquib'isuon ta más. 29Antok xtib'aka iviq'uin, can quixquicuot y riq'uin nojiel ivánima tib'ana' recibir, ruma junan iniman ri Ajaf riq'uin. Can tiya' quik'ij ri hermanos ri i-inche'l jaja'. 30Ruma ri hermano Epafrodito jub'a' ma xcon ruma rusamaj ri Cristo. Ixre' xitak-pa jaja' pan ic'axiel chi xiruto', y jaja' jub'a' ma xcon ruma xu'on ri samaj.

will be added

X\