Filipenses 1

1Inre' Pablo y ri hermano Timoteo oj ru-siervos ri Jesucristo. Nakatak-el va carta va chiva ixre' santos hermanos ri ixc'o pa tanamet Filipos ri jo'c jun ib'anun riq'uin ri Jesucristo, y chiva je' ixre' ancianos richin ri iglesia y chiva ixre' diáconos. 2Ja ta ri favor y ri paz ri nuya' ri Katata' Dios y ri Ajaf Jesucristo tic'ujie' riq'uin ivánima. 3Antok nquixnataj chuva, niya' tiox b'a' cha ri Dios ivuma. 4Y siempre antok inre' ni'an orar, can nquiquicuot riq'uin nojiel vánima nic'utuj cha ri Dios pan i-cuenta. 5Ruma nalka pano' chi xojsamaj junan chi xkatzijuoj ri evangelio, desde ri na'ay k'ij hasta c'a vacame. 6Ri Dios xutz'om jun utzulaj samaj riq'uin ivánima. Y inre' vata'n chi jaja' can xtuq'uis y man xtuya' ta can rub'anic ri samaj re', hasta c'a xtalka-na ri k'ij chi xtipa chic ri Jesucristo. 7Can ruc'amun chi quire' nina' chivij, ruma can ib'anun favor chuva vave' pa cárcel, can xinito' chi xin'an defender ri evangelio y chi xin'ej chi ketzij. Can junan ruyo'n ri favor ri Dios chika y can ixc'o riq'uin vánima. 8Can rata'n ri Dios chi altíra nquixvajo' chi'ixvonojiel, can inche'l nkojrajo' ri Jesucristo. 9Can nic'utuj antok ni'an orar, chi tivajo-ivi' más y más, y c'o ta más ri xtivatamaj y chi tic'ujie' más ino'j. 10Jare' ri nic'utuj cha ri Dios, ruma nivajo' chi ntitz'at ja'al ri chica más otz nti'an. Chi quire' ixre' siempre ntivuc'uaj jun c'aslien sak y man jun ta itziel kax nilitaj pan ic'aslien ri k'ij antok xtipa chic ri Cristo. 11Y ri Jesucristo can xquixruto', chi quire' xtivuc'uaj jun choj c'aslien y niq'uiy otz ri ic'aslien. Y rumare' ri Dios tiyo'x ruk'ij y ti'an nem cha ri rub'e'. 12Hermanos, inre' nivajo' chi ixre' ntina'iej chi riq'uin ri nuk'asan, man pa'l ta chi nitzijos ri evangelio. Pa ruc'axiel re', xa más b'anak rutzijoxic. 13Quinojiel ri ic'o pa cuartel caxan chic, y cata'n chic je' chi inc'o pa cárcel ruma nitzijuoj rub'e' ri Cristo. Y quinojiel ri vinak caxan je'. 14Rumare' jub'a' ma quinojiel ri hermanos xc'ujie' más quichuk'a' chi niquitzijuoj ri ruch'ab'al ri Dios chica ri vinak; ruma xquitz'at chi ri Dios c'o viq'uin mesque in priexa y man nixi'ij ta vi' nitzijuoj ri ruch'ab'al vave' pa cárcel. Rumare' ijeje' xq'uis-el ri xib'inre'l chiquij y más xquiya' cánima riq'uin ri rusamaj ri Ajaf. 15Y ic'o nic'aj xa itziel nquinquitz'at; ijeje' niquitzijuoj rub'e' ri Cristo pero xa richin chi nicajo' nca'tz'iet chi ijeje' más nca'covin niqui'an ri samaj. Pero ic'o hermanos ri can riq'uin sak cánima niqui'an ri samaj. 16Quinojiel ri itziel nca'tz'ato vichin niquitzijuoj rub'e' ri Cristo, pero jo'c chi niquic'ut-qui' chi nca'covin más chinoch inre' chi niqui'an ri samaj; ijeje' xa man sak ta ri cánima. Xa nicajo' chi inre' nik'axo ta ka vánima vave' pa cárcel. 17Pero ri nic'aj chic can riq'uin nojiel cánima niqui'an ri samaj ruma nquincajo', can nquinquito', ruma cata'n chi ri Dios can in-ruyo'n vave' chi ni'an defender ri evangelio. 18Chinoch inre', ri más nic'atzin ja chi nitzijos rub'e' ri Cristo; y man nic'atzin ta nina'iej xa ca'ye' quipalaj ri nca'tzijuon. Pero xa ja ri rub'e' ri Cristo ri nitzijos, inre' can niquicuot ri vánima, y xtu'on chuva chi más xquiquicuot. 19Inre' vata'n chi ruma nti'an orar pa nu-cuenta, y nquiruto' je' ri Espíritu Santo ri patanak riq'uin ri Jesucristo, chi xquiniel-el pa cárcel. 20Can nirayij niya' ruk'ij ri Cristo, inche'l ri nub'anun-pa. Y cukul nuc'u'x chi man nquiyo'x ta pa q'uix, y chi man xtinxi'ij ta vi'. Can niya' ruk'ij ri Cristo riq'uin ri nuc'aslien o riq'uin ri nucamic. 21Ruma chinoch inre', xa c'a nquic'asie' más choch-ulief, ja ri rusamaj ri Cristo ri ni'an. Y xa nquicon-el, c'o xtinch'ec. 22Xa xquic'asie' más choch-ulief, ri samaj ri xtin'an, xti'in más. Y rumare' inre' vor chica nicha', xa nivajo' nquic'asie' más choch-ulief o xa más otz nquicon. 23Man nivil ta ri chica ni'an, ruma pa nic'aj inc'o-ve. Inre' nirayij niya' can ri roch-ulief chi quire' nquib'ac'ujie' riq'uin ri Cristo, ruma chila chicaj riq'uin jaja' más ja'al. 24Pero vata'n je' chi ivuma ixre', más nic'atzin chi c'a nquic'ujie' choch-ulief. 25Y rumare' cukul nuc'u'x chi c'a maja' xquiniel-el vave' choch-ulief, xa c'a xquic'ujie' iviq'uin chi niq'uiy más ic'aslien choch ri Dios y nquixquicuot ixvonojiel ixre' ruma icukub'an ic'u'x riq'uin jaja'. 26Y chi quire', ixre' xtiya' ruk'ij ri Jesucristo antok xquinitz'at chi xquinalka chic jun b'ay iviq'uin. 27Vacame c'a, ri otz nti'an ixre' ja chi tivuc'uaj jun c'aslien otz ruma iniman chic ri ru-evangelio ri Cristo. Xa xquinalka iviq'uin, quire' ta xtalvila' ri ic'aslien, y xa man xquinalka ta, xtinva'xaj ta chivij chi icukub'an ic'u'x riq'uin ri Cristo, chi junan ta ivánima ib'anun, man ta iyo'n lugar cha nojiel ri man ketzij ta, can ta itijuon ik'ij chi itzijuon ri evangelio, 28y man tixi'ij-ivi' je' chiquivach ri itziel nca'tz'ato ivichin. Ruma riq'uin re' nik'alajin chi ijeje' xa pa k'ak' xca'b'aka-ve, y chi ixre' ya xixcolotaj. Y ja ri Dios ri xtib'ano nojiel re'. 29Ruma ixre' man jo'c ta yo'n chiva chi ntinimaj ri Cristo, xa yo'n je' chiva chi nti'an sufrir ruma ri rub'e' jaja'. 30Ixre' can ik'asan q'uiy sufrimientos inche'l ri itz'atuon ri nuk'asan-pa inre' ruma rub'e' ri Cristo. Y vacame ntivaxaj chi c'a c'o ri sufrimientos ri nik'asaj.

will be added

X\