San Mateo 9

1Ri Jesús xuoc chupan jun barco y x'a juc'an chic ruchi' ri mar, y xb'aka pa rutanamit. 2Y jare' antok nic'aj achi'a' xquic'am-pa jun ache ri paralítico ru-cuerpo, li'an-pa choch jun camilla, y xalquiya' choch ri Jesús. Y antok ri Jesús xutz'at chi quicukub'an quic'u'x riq'uin, ja xu'ej cha ri ache ri paralítico ru-cuerpo: Valc'ual, tiquicuot c'a avánima; ri a-pecados xa'an perdonar. 3Y ic'o nic'aj achi'a' escribas ri ic'o-apa chire', xqui'an-ka pensar chirij ri Jesús: Va ache va can nu'on chi jaja' ri Dios. 4Y ri Jesús can rata'n ri niqui'an pensar ri achi'a' re', mare' xu'ej chica: ¿Karruma nti'ej itziel tak kax pan ivánima? 5¿Chica ri más fácil, ni'ej: Ri a-pecados ni'an perdonar, o ni'ej: Capalaj y ca'in? 6Vacame c'a, chi ntivatamaj chi ri Xtak-pa chicaj chi xalax chi'icajol can c'o poder riq'uin chi nu'on perdonar pecados, (jare' antok ri Jesús xu'ej cha ri ache paralítico): Capalaj, tavuc'uaj ri a-camilla y ca'in chavachuoch, xcha' cha. 7Y ri ache ja xpalaj y x'a chirachuoch. 8Y ri vinak ri quimaluon-apa-qui' chire' antok xquitz'at ri xb'anataj, can xa'chapataj. Y xquiya' ruk'ij ri Dios, ruma ruyo'n-pa namalaj poder chica nic'aj achi'a'. 9Y antok ri Jesús nak'ax, xutz'at jun ache rub'inan Mateo. Ri ache re' tz'uyul choch jun ch'acat chi numol ri impuestos ri nca'tuoj can. Y ri Jesús xu'ej cha: Jo' viq'uin. Y jaja' xpalaj-pa ri pache' tz'uyul-ve y x'a riq'uin ri Jesús. 10Y antok ri Jesús tz'uyul chirij ri mesa pa rachuoch ri Mateo, iq'uiy ri maloy-impuestos y nic'aj chic vinak ri ni'e'x aj-b'anoy-pecado chica xa'tz'uye-apa chirij ri mesa, junan riq'uin ri Jesús y ri ru-discípulos. 11Y ri achi'a' fariseos ri xa'tz'ato re', xqui'ej chica ri ru-discípulos ri Jesús: ¿Karruma ri I-Maestro niva' quiq'uin ri maloy-impuestos y quiq'uin ri vinak ri aj-b'anoy-pecado ni'e'x chica? xa'cha'. 12Antok ri Jesús xra'xaj ri niqui'ej ri achi'a' re', xu'ej chica: Ri man nca'yavaj ta man nic'atzin ta jun doctor chica, xa ja ri nca'yavaj. 13Inre' man xipa ta chi nca'nvayuoj ri choj quic'aslien choch ri Dios, xa ja ri c'o qui-pecados, chi niquiya' can ri qui-pecados y niqui'an ri nrajo' ri Dios. Rumare' quix'in y tivatamaj chica ntiel chi tzij: Inre' más nika chinoch chi ntijoyovaj quivach ri vinak, que choch ri chicop ri nqui'quimisaj chi ntiya' chinoch. 14Entonces ri ru-discípulos ri Juan el Bautista xa'lka riq'uin ri Jesús y xqui'ej cha: Ojre' naka'an ayuno q'uiy mul. Y quire' je' niqui'an ri achi'a' fariseos. ¿Karruma ri a-discípulos atre' man quire' ta niqui'an? xa'cha' cha. 15Y ri Jesús xu'ej chica: ¿Acaso otz came chi nca'b'isuon ri i-b'anun invitar pa jun c'ulub'ic antok xa c'a c'o ri ala' ri xc'ulie' chiquicajol? Pero xtalka ri k'ij antok ri ala' re' xtalasas-el chiquicajol, c'ajare' xtiqui'an ayuno. 16Man jun nucusaj jun c'ojob'al c'ac'ac' chi nuc'ojob'iej jun tziak ri xa tzia'k chic. Ruma ri c'ojob'al c'ac'ac' nuc'ol-ri' y nujic' ri tziak y más nik'ach'itaj-ka. 17Y quire' je' man jun nuya-ka c'ac'ac' vino chupan jun tz'un yacb'al-ya' ri xa tzia'k chic. Ruma xa quire' ni'an cha, ri tz'un xa nik'ach'itaj y ja niq'uis-el ri vino chupan. Y ri tz'un je' man jun chic xtic'atzin-ve. Pero chupan jun c'ac'ac' tz'un yacb'al-ya', otz niyaquie' c'ac'ac' vino, ruma ri tz'un re' c'a nuyuk-ri' ja'al y man nik'ach'itaj ta. Ri vino niyaquie' ja'al chupan. Quire' xu'ej ri Jesús. 18Y antok ri Jesús nutzijuoj nojiel re', c'o jun ache principal chiquicajol ri israelitas xb'axuquie' choch y xu'ej: Ri numi'al c'a ja oc nicon-ka, pero catam-pa y taya' ri ak'a' paro', y nic'astaj chic pa, xcha' ri ache. 19Ri Jesús xpalaj y junan quiq'uin ri ru-discípulos xa'a chirij ri ache. 20Y c'o jun ixok ri c'o doce (cab'alajuj) juna' ri ntiel ruquiq'uiel y man nitanie' ta, ruma jun yab'il. Jaja' xjiel-apa chirij ri Jesús y xutz'om-apa ri ruchi-rutziak; 21ruma nu'ej pa ránima: Xa ta riq'uin nitz'om-apa ri rutziak, ja ni'an sanar. 22Pero ri Jesús can xuna' y xtzu'n can chirij y xu'ej cha: Numi'al, xac'achoj ruma xacukub'a' ac'u'x viq'uin. Man chic cab'isuon, xcha' cha. Y ri ixok re' can ja misma huora re' xc'achoj. 23Y antok ri Jesús ntuoc-oc pa rachuoch ri ache ri principal, xutz'at chi ri vinak nca'ch'ujuyan y ic'o chic ri niquixupuj ri flautas. 24Jaja' xu'ej chica: Quixiel-el, ruma ri ch'iti xtan xa man quiminak ta, xa nivar, xcha' chica ri vinak. Pero ijeje' xa xa'tze'n chirij ri Jesús. 25Y antok i-alasan chic el juviera ri vinak, ri Jesús xuoc-oc ri pache' c'o-ve ri ch'iti xtan quiminak chic. Y xutz'om ruk'a' ri ch'iti xtan y ja xc'astaj chic pa. 26Ri xb'anataj chire', x'a rutzijoxic pa tak tanamet ri ic'o chupan ri lugar re'. 27Y antok ri Jesús xiel-pa chire', ic'o ica'ye' muoy xa'a chirij y riq'uin quichuk'a' xa'ch'o' y xqui'ej: ¡Tajoyovaj kavach atre' ri at Rumáma can ri rey David! nca'cha'. 28Antok ri Jesús xb'aka pa jay ri pache' nic'ujie-ve, ri ica'ye' muoy xa'b'aka riq'uin. Y ri Jesús xuc'utuj chica: ¿Can ntinimaj ixre' chi inre' nquicovin ni'an chiva chi nquixtzu'n? xcha' chica. Y ri ica'ye' muoy xqui'ej: Quire' Ajaf, nakanimaj, xa'cha' cha. 29Ri Jesús xutz'om-apa ri quinak'avach y xu'ej chica: Ruma ixre' xicukub'a' ic'u'x viq'uin, can tib'anataj c'a ri inche'l ntivajo', xcha' chica. 30Y ijeje' ja xa'tzu'n. Pero ri Jesús xu'on mandar chica: Ri xb'anataj iviq'uin, man jun ta vinak nina'ien. 31Pero ijeje' can jo'c xa'iel-el chire', can ja xquitz'om rutzijoxic chupan nojiel ri lugar re' ri xu'on ri Jesús chica. 32Y antok xa'iel-pa ri ica'ye' achi'a' re' riq'uin ri Jesús, jare' antok xc'amar-pa jun ache miem; quire' rub'anun ruma c'o jun itziel espíritu riq'uin. 33Y antok ri Jesús xralasaj-el ri itziel espíritu, ri ache miem ja xch'o'. Y ri vinak can xa'chapataj y niqui'ej: Man jun b'ay katz'atuon chi quire' nib'anataj vave' Israel, nca'cha'. 34Pero ri achi'a' fariseos niqui'ej chirij ri Jesús: Ja ri quijaval ri itziel tak espíritus ri nib'ano cha chi nitiquir nca'ralasaj ri itziel tak espíritus. 35Y ri Jesús x'a nojiel tanamet y aldeas, y nca'rutijuoj ri vinak pa tak sinagogas, y nutzijuoj je' chica ri evangelio ri nich'o' chirij ri ru-reino ri Dios. Y nu'on sanar nojiel roch yab'il ri ntuoc chica, y nca'rucol c'a ri vinak choch nojiel k'axomal. 36Y antok xa'rutz'at chi can iq'uiy ri vinak, xujoyovaj quivach, ruma quiyuon ic'o y quiquiran-qui'; can inche'l ri ovejas antok man jun ri nichajin quichin. 37Y ri Jesús xu'ej chica ri ru-discípulos: Can ketzij chi ri samaj can q'uiy, pero ri aj-samajiel xa man iq'uiy ta. 38Rumare' tic'utuj cha ri Rajaf ri samaj chi ca'rutaka-pa más aj-samajiel chupan ri rusamaj.

will be added

X\