San Mateo 7

1Man qui'an juzgar ri vinak, chi quire' man xti'an ta quire' chiva ixre'. 2Ruma xa ixre' nqui'an juzgar ri vinak, quire' xti'an chiva ixre'. Can inche'l ri nti'an ixre' chica ri vinak, quire' xti'an chiva ixre'. 3¿Y karruma ja ri q'uin ri c'o pa roch ri av-hermano ri natz'at cha'nin, y man nana' ta ka-avi' chi atre' xa jun chie' k'apal pan avach? 4¿O karruma na'ej cha ri av-hermano: Taya' chi nivalasaj-el ri q'uin ri k'apal pan avach, y man nana' ta chi atre' xa jun chie' k'apal pan avach? 5¡Atre' xa ca'ye' apalaj! Tavalasaj-el na'ay ri chie' pan avach atre', chi quire' k'alaj xcatzu'n y xcatiquir xtavalasaj-el ri q'uin ri c'o pa roch ri av-hermano. 6Ri can richin ri Dios, man taya' chica ri tz'e'; y ri perlas, man taya' chiquivach ri ak. Ruma ri tz'e' y ri ak, mesque jun kax altíra rakalien, choj nca'k'ax paro' y c'o mul nca'a chirij ri niyo'n re' chica y niquic'ux. 7Tic'utuj cha ri Dios ri nic'atzin chiva y jaja' xtuya-pa chiva. Ticanuj y xtivil ri ntivajo'. Tic'osc'a-apa ri ruchi-jay y xtijak chivach. 8Ruma xa jun nuc'utuj cha ri Dios, jaja' xtuya-pa cha ri nuc'utuj. Xa jun nucanuj, can xtiril ri nucanuj. Y xa jun nuc'osc'a-apa ri ruchi-jay, can xtijak choch. 9¿C'o came jun ache nuya' jun ab'aj pa ruk'a' ri ralc'ual, antok nuc'utuj jun simíta cha? 10¿O nuya' came jun cumatz pa ruk'a', antok xa jun car nuc'utuj cha? 11Mesque ixre' itziel ino'j, pero man jun b'ay ntiya' jun itziel kax chica ri ivalc'ual. Ixre' ja ri utzulaj tak kax ntiya' chica. ¿Cuánto más ri Itata' ri c'o chicaj nuya-pa utzulaj tak kax chica ri nca'c'utun cha? Y nojiel ri nuya-pa, can otz. 12Inche'l ri ntivajo' ixre' chi ri vinak niqui'an chiva, quire' je' tib'ana' quiq'uin ijeje'. Quire' ri tz'ib'an can chupan ri ley ri xuya' ri Dios cha ri Moisés. Quire' je' qui'e'n can ri profetas ri xa'c'ujie' ojier can tiempo. 13Quixuoc chupan ri puerta ri co'l-oc roch. Ruma nem roch ri puerta y ri b'ay ri ni'a richin ri camic, y can iq'uiy vinak ri nca'uoc chire'. 14Pero co'l-oc roch ri puerta y co'l-oc roch ri b'ay ri ni'a richin ri c'aslien, y man iq'uiy ta ri nca'ilo richin. 15Tib'ana' cuenta-ivi' chiquivach ri i-tz'akoy-tzij ri nca'lka iviq'uin y niqui'ej chi i-profetas. Ruma antok nca'lka iviq'uin, can ja'al quic'aslien, inche'l i-ovejas. Pero antok nib'ak'alajin-pa ri itziel tak kax ri c'o pa cánima, xa inche'l i-utif ruma altíra i-itziel. 16Can xtivatamaj quivach ja'al riq'uin ri quic'aslien. ¿Acaso ri q'uix k'ayis nuya' uvas o víquix? 17Jun utzulaj chie' nuya' utzulaj tak roch, pero jun chie' ri man otz ta, man otz ta roch ri nuya'. 18Man jun utzulaj chie' xtuya' ta itziel tak roch, y man jun chie' ri man otz ta, xtuya' ta utzulaj tak roch. 19Y quinojiel chie' ri man otz ta quivach niquiya', nca'kasas y nca'yo'x pa k'ak'. 20Mare', can xtivatamaj quivach ja'al riq'uin ri quic'aslien. 21Man quinojiel ta ri nca'e'n chuva: Ajaf, Ajaf, xca'uoc chupan ri reino ri c'o chicaj. Ri xca'uoc chire', xa ja ri niqui'an riq'uin nojiel cánima ri nrajo' ri Nata' Dios ri c'o chicaj. 22Y chupan ri k'ij antok inre' xca'n'an juzgar ri vinak, iq'uiy ri xtiqui'ej chuva: Ajaf, Ajaf, ojre' pan ab'e' atre' xkatzijuoj ri ruch'ab'al ri Dios, pan ab'e' atre' xa'kalasaj-el itziel tak espíritus y pan ab'e' atre' xa'ka'an q'uiy milagros, xca'cha'. 23Pero inre' xtin'ej chica: Inre' man vata'n ta ivach. Quixiel-el viq'uin, ruma ixre' jo'c itziel tak kax ri nti'an. 24Y chica-na vinak ri nra'xaj ri nutzij y nu'on ri ni'ej inre', can junan riq'uin jun ache ri altíra runo'j; jaja' xu'on ri rachuoch paro' ab'aj. 25Xpa c'a ri job', y xa'pa ríos y cak'iek' chirij ri jay re', pero man xtzak ta, ruma ri ru-cimiento ri jay re' paro' ab'aj xyo'x-ve. 26Pero chica-na ri jo'c nra'xaj ri ni'ej inre' y man nu'on ta ri ni'ej cha, junan riq'uin jun ache nacanic ri xu'on ri rachuoch pa sanaye'. 27Xpa ri job', y xa'pa ríos y cak'iek' chirij ri jay re' y ja xtzak y xvuluvu'. 28Y antok ri Jesús xtanie-ka chi nich'o', ri vinak ri xa'c'axan richin, can xa'chapataj ruma ri tzij ri xca'xaj. 29Ruma antok nca'rutijuoj, can k'alaj chi can c'o autoridad pa ruk'a' y man inche'l ta ri achi'a' escribas.

will be added

X\