San Mateo 6

1Can tib'ana' cuenta-ivi' ja'al, man ti'an chiquivach ri vinak chi ntito' jun, jo'c chi nquixquitz'at chi ixre' can nti'an ri nrajo' ri Dios. Y xa quire' xti'an, ri Itata' ri c'o chicaj can man jun ruc'axiel xtuya' chiva rumare'. 2Antok ixre' ntito' jun puobra, man tixupuj jun trompeta chi quire' quinojiel vinak nica'xaj, inche'l niqui'an ri ca'ye' quipalaj. Ijeje' quire' niqui'an pa tak sinagogas y pa tak b'ay, ruma nicajo' chi ni'e'x chica chi otz niqui'an. Can ketzij ni'ej chiva chi ri nca'b'ano quire', ya xyo'x ruc'axiel chica nojiel ri xqui'an, ruma xyo'x quik'ij cuma ri vinak. 3Y antok ixre' ntiya' limosna, man ti'an chiquivach ri vinak, 4chi quire' ri ntiya' man jun chic nina'ien. Pero ri Itata' ri c'o chicaj can nutz'at ri otz ri nti'an pan aval, rumare' can xtuya' ruc'axiel chiva. Y can chiquivach ri vinak xtu'on quire'. 5Antok nti'an orar, man ti'an inche'l niqui'an ri vinak ri ca'ye' quipalaj. Ruma ijeje' altíra nika chiquivach nca'pi'ie' pa tak sinagogas, y pa tak xiquína antok niqui'an orar, chi nca'tz'iet cuma ri vinak. Can ketzij ni'ej chiva, chi ri nca'b'ano quire', ya xyo'x ruc'axiel chica nojiel ri xqui'an, ruma xyo'x quik'ij cuma ri vinak. 6Pero antok atre' na'an orar, catuoc pan a-cuarto y tatz'apij ruchi' ri a-cuarto y tab'ana' orar cha ri Atata' ri c'o chicaj; y jaja' nutz'at ri na'an pan aval, y xtuya' ruc'axiel chava, y can chiquivach ri vinak xtu'on quire'. 7Y antok ixre' nti'an orar, man ti'an repetir q'uiy mul ri mismo tzij, inche'l niqui'an ri vinak ri man cata'n ta roch ri Dios. Ruma ijeje' niqui'an pensar chi ri Dios nca'ra'xaj ruma niqui'an repetir q'uiy tzij chupan ri qui-oraciones. 8Antok nti'an orar, man ti'an inche'l niqui'an ri vinak ri man cata'n ta roch ri Dios. Ruma ri Itata' ri c'o chicaj can rata'n chic ri chica nic'atzin chiva, antok c'a maja' tic'utuj cha. 9Antok ixre' xti'an orar, ti'ej cava: Katata' Dios ri atc'o chila chicaj, quinojiel ta ri vinak xtiquiya' ak'ij y nem xtiqui'an cha ri santo ab'e'. 10Y talka c'a ri k'ij antok atre' ri xcab'ano reinar. Y ja ta ri navajo' atre', ja ta re' ri tib'anataj vave' ri choch-ulief, inche'l niqui'an ri ic'o aviq'uin chicaj. 11Y taya' c'a ri ka-simíta ri nic'atzin chika k'ij-k'ij. 12Y tab'ana' perdonar ri ka-pecados ri naka'an chavach, inche'l nca'ka'an perdonar ojre' ri niqui'an itziel chika. 13Y man taya' lugar chi ri itziel nu'on chika chi nkutzak. Can kojacalo' choch, ruma atre' ri atc'o pa kave', c'o a-poder, y c'o ak'ij richin nojiel tiempo. Amén. 14Xa ixre' nti'an perdonar ri vinak ri niqui'an itziel chiva, ri Itata' ri c'o chicaj nquixru'on je' perdonar. 15Y xa man nti'an ta perdonar ri vinak ri itziel niqui'an chiva, ri Itata' ri c'o chicaj man xquixru'on ta je' perdonar. 16Antok ixre' nti'an ayuno, man ti'an inche'l niqui'an ri ca'ye' quipalaj; ruma ijeje' niquic'ut-qui' chi can nca'b'isuon, xa ruma nicajo' chi nca'tz'iet chi niqui'an ayuno. Can ketzij ni'ej chiva, chi ri nca'b'ano quire', ya xyo'x ruc'axiel chica nojiel ri xqui'an, ruma xyo'x quik'ij cuma ri vinak. 17Pero antok ixre' nti'an ayuno, man tic'ut-ivi' chi jare' nti'an, xa can tich'aja' otz ri ipalaj, y tiya' b'a' ak'uon chirij ri ive' y ja'al tijica'; 18chi quire', man k'alaj ta chiquivach ri vinak chi nti'an ayuno. Y ri Itata' ri c'o chicaj can nutz'at ri nti'an pan aval, jaja' can xtuya' chiva ri ruc'axiel, y can chiquivach ri vinak xtu'on quire'. 19Man ti'an b'ayomal vave' choch-ulief, ruma nichocoper y nipuser-ka, y ic'o je' alak'oma' ri niquilak'aj-el. 20Sino tib'ana' ib'ayomal chicaj, chire' man nichocoper ta y man nipuser ta je', y man jun je' alak'oma' nca'lak'an-el y nca'lasan-el. 21Ruma pache' c'o-ve ri ib'ayomal, chire' nic'ujie-ve je' ri ivánima. 22Ri anak'avach jare' ri lámpara richin ri a-cuerpo. Y xa ri anak'avach otz, nojiel ri a-cuerpo c'o pa sakil. 23Pero xa ri anak'avach man otz ta, nojiel ri a-cuerpo c'o pa k'aku'n. Rumare', xa ri sakil ri ruyo'n ri Dios pan ivánima xa xtic'axtaj, can xtik'alajin-pa chi atc'o pa k'aku'n. 24Man jun nicovin nu'on servir ica'ye' rajaf, ruma xa nrajo' ri jun rajaf, itziel nutz'at ri jun chic. Y xa nunimaj rutzij ri jun, man nitiquir ta nu'on quire' riq'uin ri jun chic. Quire' je', manak che'l chi jun nu'on ri nrajo' ri Dios ri xa b'anak ránima chirij ri b'ayomal. 25Rumare' inre' ni'ej chiva: Man tich'ujirisaj-ivi' ruma ri chica nic'atzin chiva k'ij-k'ij, chica ntitej o chica ntikun, ni por ri i-cuerpo chi chica itziak ri nticusaj. ¿Man ja ta came ri ic'aslien más rakalien choch ri ntitej y ri i-cuerpo más rakalien choch ri itziak? 26Qui'itz'ata' ri chicop ri c'o quixic'; man nca'tico ta, y manak niqui'an cosechar, ni manak je' quic'ujay chi niquiyac. Pero ijeje' nca'va', ruma ja ri Itata' ri c'o chicaj nca'tzuku. ¿Man ivakalien ta came ixre' más que chiquivach ijeje'? 27¿C'o came jun chivach ixre' ri nitiquir nu'on chi niq'uiy ta chic nic'aj vara ri rakan, mesque nuch'ujirisaj-ri' chi nu'on? 28¿Y karruma ixre' ntich'ujirisaj-ivi' ruma ri itziak? Qui'itz'ata' ri cotz'e'j lirio ri ic'o pa k'ayis, antok nca'q'uiy: Ijeje' man nca'samaj ta, ni man nca'camuon ta chi niqui'an quitziak ja'al. 29Pero ni'ej c'a chiva, chi ri rey Salomón ri xc'ujie' ojier can, mesque altíra rub'ayomal y ruyuon ja'al tak tziak ri xucusaj, pero man jun b'ay xucusaj ta jun rutziak inche'l nitz'iet jun lirio. 30Mesque ri k'ayis man nilayuj ta, ruma jun k'ij ja'al ranun, y jun chic k'ij nichakej-ka y nic'ak pa k'ak', pero ri Dios can nuvak ja'al. Y xa ri Dios can nuvak ja'al, ¿man came nuya' ta nojiel chiva ixre' mesque man can ta icukub'an ic'u'x riq'uin? 31Mare' man tich'ujirisaj-ivi' nti'ej: ¿Chica nakatej, o chica nakakun, o chica katziak nakacusaj? 32Ruma ri vinak ri man cata'n ta roch ri Dios niquicanuj nojiel re'. Pero ri Itata' ri c'o chicaj can rata'n chic ri chica nic'atzin chiva. 33Mare' can ticanuj na'ay ri ru-reino ri Dios y titija' ik'ij ntivuc'uaj jun choj c'aslien choch, y nojiel ri nic'atzin chiva, xtuya' chiva. 34Ixre' man tich'ujirisaj-ka-ivi' chi chica ruc'amun-pa ri chua'k. Ruma ri chua'k can c'o-ve chica ruc'amun-pa. Basta ri k'ij-k'ij can c'o sufrimientos niquic'am-pa chika.

will be added

X\