San Mateo 5

1Y antok ri Jesús xa'rutz'at chi iq'uiy vinak quimaluon-qui', jaja' xjotie-el paro' ri ch'iti juyu', y xtz'uye-ka. Y ri ru-discípulos xquimol-qui' riq'uin cierca. 2Y ri Jesús nca'rutijuoj ri vinak, y nu'ej: 3Can ja'al ca'quicuot ri niquina' chi puobra ri qui-espíritu choch ri Dios, ruma quichin ijeje' ri reino ri c'o chicaj. 4Can ja'al ca'quicuot ri ntuok' cánima choch ri Dios, ruma ri Dios xca'ru'on consolar. 5Can ja'al ca'quicuot ri manak-oc quikalien niquina' pa cánima, ruma xtuoc quichin ri roch-ulief como herencia. 6Can ja'al ca'quicuot ri ninem y nic'at cánima chi niquic'uaj jun utzulaj c'aslien choch ri Dios, ruma ri Dios xtuya' nojiel chica chi ninuoj ri cánima. 7Can ja'al ca'quicuot ri niquijoyovaj quivach nic'aj chic vinak, ruma ri Dios xtujoyovaj je' quivach ijeje'. 8Can ja'al ca'quicuot ri sak cánima, ruma ijeje' xtiquitz'at roch ri Dios. 9Can ja'al ca'quicuot ri niqui'an chi niq'uis ri ayoval, ruma xti'e'x chica chi i-ralc'ual ri Dios. 10Can ja'al ca'quicuot ri quic'uan jun choj c'aslien y rumare' niquik'asaj sufrimiento pa quik'a' nic'aj chic; ruma quichin ijeje' ri reino ri c'o chicaj. 11Can ja'al quixquicuot ixre' ri itziel nquixtz'iet y ni'e'x nojiel clase chi tzij chiva, y nitz'ak tzij chivij vuma inre'. 12Quixtze'n y quixquicuot, ruma nem ri ruc'axiel ri xtiyo'x chiva chicaj. Ruma inche'l ri sufrimiento ri ntik'asaj ixre' vacame, quire' je' xquik'asaj ri profetas ri xa'c'ujie' ojier can tiempo. 13Ixre' ix inche'l atz'an chiquivach ri vinak ri ic'o choch-ulief. Pero xa ri atz'an niq'uis-el ri rutzayal, ¿chica ta c'a niyo'n chic rusavuor? Xa man jun chic nic'atzin, xa nic'ak-el chi niquixak' can ri vinak. 14Ixre' ix inche'l ri luz chiquivach ri vinak ri ic'o choch-ulief y ja'al nquixk'alajin, inche'l nik'alajin-pa jun tanamet ri c'o paro' jun juyu' y manak che'l nravaj-ri'. 15Antok nitzij jun lámpara, man niyo'x ta chuxie' jun cajuon; antok nitzij jun lámpara, chicaj niyo'x-ve chi nuya' sakil pa quive' quinojiel ri ic'o pa jay. 16Quire' tib'ana' ixre' je' chiquivach ri vinak; can tiya' sakil inche'l jun luz chi quire' antok ri vinak niquitz'at chi ixre' otz nti'an, can xtiquiya' ruk'ij ri Itata' ri c'o chicaj. 17Man ti'an pensar chi inre' xipa chi ni'an man jun rakalien cha ri ley richin ri Moisés, y ni'an je' quire' cha ri tz'ib'an can cuma ri profetas ri xa'c'ujie' ojier can tiempo; man ruma ta re' xipa. Inre' xipa chi ni'an cumplir. 18Can ketzij ni'ej chiva chi nojiel ri tz'ib'an chupan ri ley, can xca'b'anataj-na-ve. Ri roch-ulief y ri rocaj can xca'q'uis. Pero ri tz'ib'an can chupan ri ley, man jun letra choj xtak'ax, xa xtu'on cumplir nojiel. 19Xa chica-na vinak ri man nrajo' ta nu'on ri nu'ej chupan ri ley, mesque jun tzij ri man can ta rakalien, y can quire' mismo nuc'ut chiquivach nic'aj chic vinak chi man tiqui'an ri nu'ej ri tzij re', ri nib'ano quire' xti'an ch'ute'n cha chupan ri reino ri c'o chicaj. Pero ri nib'ano nojiel ri nu'ej chupan ri ley y quire' mismo nuc'ut chiquivach nic'aj chic vinak, chi tiquib'ana' ri nu'ej ri ley, can xti'an nem cha chupan ri reino ri c'o chicaj. 20Y mare' ixre' nic'atzin chi más ta choj ri ic'aslien choch ri quic'aslien ri achi'a' escribas y ri achi'a' fariseos. Ruma xa man quire' ta ri ic'aslien, man xquixuoc ta chupan ri reino ri c'o chicaj. 21Ixre' ivaxan ja'al ri x'e'x chica ri vinak ri xa'c'ujie' ojier can tiempo: Man caquimisan; y chica-na ri nuquimisaj jun, can ti'an juzgar. 22Pero inre' ni'ej: Chica-na ri nipa royoval chirij jun chic vinak, can nu'on ruch'o'j, y can ti'an juzgar. Y chica-na je' ri nu'ej cha jun chic: Nacanic, can tuc'uax chiquivach ri autoridades richin ri tanamet chi ti'an juzgar. Y chica-na ri nu'ej cha jun vinak: Tacatic, can ni'a chupan ri infierno, ri k'ak' ri man nichup ta. 23Mare', vi xa atre' atc'o chic apa choch ri altar richin naya' can ri av-ofrenda cha ri Dios y ja nalka pan ave' chi atre' c'o jun kax itziel ab'anun cha jun chic; 24taya' can ri av-ofrenda choch ri altar y ca'in riq'uin ri jun re', y tab'ana' ri paz riq'uin chi quire' manak ayoval chi'icajol. C'ajare' catzalaj chic pa y taya' cha ri Dios ri av-ofrenda. 25Cac'ujie' de acuerdo riq'uin ri nib'ano acusar avichin, otz xa c'a ja at-b'anak pa b'ay. Ruma xa man na'an ta quire', ri nib'ano acusar avichin xcarujach pa ruk'a' ri juez, y ri juez xcarujach-el pa ruk'a' ri ache ri nichajin ri cárcel chi ncarutz'apij pa cárcel. 26Y can ketzij ni'ej, chi man ncatiel ta pa pa cárcel, hasta c'a xtatzoliej ri último centavo ri choj cha ab'anun-ve ac'as. 27Ixre' ivaxan ja'al ri x'e'x ojier can: Ri at-c'ulan, man tavuc'uaj-avi' riq'uin jun chic. 28Pero inre' ni'ej: Xa c'o jun ache nutz'at jun ixok y nurayij roch pa ránima; ya xu'on pecado riq'uin ri ixok re'. 29Mare', xa ri anak'avach derecha nib'ano chava chi ncatzak, más otz tavalasaj-el y tac'aka-el. Ruma más otz manak jun anak'avach que ni'a nojiel ri a-cuerpo chupan ri infierno. 30Y xa ri ak'a' derecha nib'ano chava chi ncatzak, más otz takupij-el y tac'aka-el. Ruma más otz manak jun ak'a' que ni'a nojiel ri a-cuerpo chupan ri infierno. 31Y x'e'x je' ojier can: Ri ache ri man nrajo' ta chic ri raxjayil y nujach-ri' riq'uin, tub'ana' jun carta ri pache' nu'ej-ve chi nujach-ri' riq'uin, y tuya-el cha ri raxjayil. 32Pero inre' ni'ej: Ri ache ri nujach-ri' riq'uin ri raxjayil, pero man ruma ta ri ixok ruc'uan-ri' riq'uin jun chic ache; ri ache re' nu'on chi ri raxjayil nu'on pecado choch ri Dios xa ni'a riq'uin jun chic ache, y ri ache ri nic'ulie' riq'uin ri ixok ri jachuon-el, can nu'on je' pecado choch ri Dios. 33Ixre' ja'al ivaxan je' ri x'e'x chica ri vinak ri xa'c'ujie' ojier can tiempo; chi man tiquic'ax quitzij, xa can tiquib'ana' cumplir ri xqui'ej, ruma choch ri Ajaf Dios xqui'an-ve jurar. 34Pero inre' ni'ej chiva: Man jun b'ay ti'an jurar; ni por ri rocaj, ruma chire' c'o-ve ri ru-trono ri Dios; 35ni por ri roch-ulief, ruma chire' nuya-ve ri rakan ri Dios; ni por ri tanamet Jerusalén, ruma ri tanamet re' richin ri Namalaj Rey; 36ni por ri ijaluon ti'an jurar; ruma ixre' man nquixtiquir ta nti'an sak o xak cha jun ive'. 37Mare' nojiel ri nti'ej, xa ti'ej sí o ti'ej ni; ruma xa nti'an jurar, man otz ta, ruma xa riq'uin ri itziel nipa-ve. 38Ivaxan ja'al ri x'e'x ojier can, chi ri nalasan-el jun nak'aroch jun chic vinak, quire' je' mismo ti'an cha jaja'. Y ri nalasan-el jun roray jun chic vinak, can quire' je' mismo ti'an cha. 39Pero inre' ni'ej chiva: Man ti'an ruc'axiel cha ri nib'ano itziel chiva. Xa c'o jun nuya' jutz'aj k'a' cha ri ak'o'tz derecha, xa taya' chic apa ri jun chic lado choch. 40Y xa c'o jun ri ncaruc'uaj pa juzgado ruma nrajo' numaj-el jun atziak, can taya' cha chi nuc'uaj, y can taya' je' cha ri a-capa ri ak'u'n. 41Y xa c'o jun ri ncaru'on obligar chi navuc'uaj ri raka'n jun kilómetro, xa can tavuc'uaj ri aka'n jun chic kilómetro más. 42Y xa c'o jun c'o nuc'utuj chava, taya' cha ri nrajo'. Y xa c'o jun nuc'utuj jun kax pa kajic chava, can taya-el cha. 43Ivaxan ja'al ri x'e'x ojier can. Ri tzij re' nu'ej: Tavajo' ri a-prójimo y tatz'ata' itziel ri itziel ncarutz'at. 44Pero inre' ni'ej chiva: Qui'ivajo' ri iv-enemigos; tic'utuj cha ri Dios chi ca'rub'ana' bendecir ri vinak ri nquixqui'an maldecir; tib'ana' otz chica ri itziel nquixquitz'at; y tib'ana' orar pa qui-cuenta ri nca'yak'uon ivichin y ri nca'b'ano perseguir ivichin, 45richin quire' nik'alajin chi ixre' ix ralc'ual ri Itata' ri c'o chicaj. Ruma jaja' can otz quiq'uin quinojiel. Nu'on chi ntiel-pa ri k'ij pa quive' ri otz quic'aslien y pa quive' ri itziel quic'aslien, y nuya-pa je' ri job' pa quive' ri choj quic'aslien, y pa quive' ri man choj ta quic'aslien. 46Ruma xa ja ri nca'jo'n ivichin, xa jare' nqui'vajo', ¿c'o came ruc'axiel xtiyo'x chiva? ¿Man quire' ta came niqui'an ri maloy-impuestos? 47Y xa jo'c quiq'uin ri iv-hermanos ja'al nti'an saludar-ivi', ¿chica otz nitz'iet iviq'uin? ¿Man quire' ta came niqui'an ri man cata'n ta roch ri Dios? 48Ixre' can choj tib'ana' riq'uin nojiel ri nti'an, inche'l ri Itata' ri c'o chicaj; jaja' can choj riq'uin nojiel ri nu'on.

will be added

X\