1 Entonces ri Jesús xuc'uax ruma ri Espíritu Santo chupan jun lugar desierto, chi ni'an tentar ruma ri diablo. 2 Ri Jesús cuarenta k'ij y cuarenta ak'a' xu'on ayuno. Después re', xnem-pa rupan. 3 Y jare' antok xalka ri diablo riq'uin y xu'ej cha: Xa ketzij chi atre' ri at Ruc'ajuol ri Dios, tab'ana' chica ri ab'aj la chi nca'uoc simíta. 4 Pero ri Jesús xu'ej cha: Tz'ib'an can chupan ri ruch'ab'al ri Dios, chi ri ache man jo'c ta c'a riq'uin ri simíta nic'asie', xa nic'asie' je' riq'uin ri ruch'ab'al ri Dios. 5 Y ri diablo xuc'uaj ri Jesús c'a chupan ri santa tanamet Jerusalén, y c'a paro' ri más naj jatol chicaj richin ri templo xb'aruya-ve-el. 6 Y chire' xu'ej cha ri Jesús: Xa ketzij chi atre' ri at Ruc'ajuol ri Dios, tac'aka-ka-avi' vave'. Ruma chupan ri ruch'ab'al ri Dios ri tz'ib'an can, nu'ej: Ri Dios xca'rutak-pa ri ru-ángeles aviq'uin, y xcatquili'iej pa quik'a', chi quire' man xtacajij ta avakan choch ab'aj. 7 Pero ri Jesús xu'ej cha ri diablo: Tz'ib'an can je' chupan ri ruch'ab'al ri Dios: Man ta'an tentar ri Avajaf Dios. 8 Y ri diablo xuc'uaj chic jun b'ay ri Jesús, y xb'aruya' paro' jun juyu' ri naj jatol chicaj, y xuc'ut choch nojiel ri naciones richin ri roch-ulief y ri quib'ayomal. 9 Y ri diablo xu'ej cha ri Jesús: Nojiel re' niya' chava, xa atre' ncaxuquie' chinoch chi naya' nuk'ij. 10 Pero ri Jesús xu'ej cha: Ca'in Satanás. Ruma ri tz'ib'an can chupan ri ruch'ab'al ri Dios nu'ej: Xa ja ri Kajaf Dios takaya' ruk'ij, y kab'ana' rusamaj jaja'. 11 Y ri diablo xuya' can ri Jesús. Y jare' antok xa'lka ángeles riq'uin chi xqui'an servir. 12 Y antok ri Jesús xra'xaj chi ri Juan el Bautista c'o pa cárcel, xtzalaj chic Galilea, 13 y xb'aka pa tanamet Nazaret. Después xuya' can y x'a pa tanamet Capernaum y chire' xc'ujie-ve. Ri tanamet re' c'o chuchi' jun mar y c'o chiquicajol ri ca'ye' lugar quib'inan Zabulón y Neftalí. 14 Ri Jesús xb'aka chire', chi quire' nu'on cumplir inche'l rutz'ib'an can ri profeta Isaías. Jaja' rutz'ib'an can: 15 Ri vinak ri ic'o chupan ri ca'ye' lugar rub'inan Zabulón y Neftalí, ri ic'o chuchi' ri jun mar, ri c'o-apa juc'an ri río Jordán. Ri Galilea ri pache' ic'o-ve vinak ri man israelitas ta. 16 Ri vinak ri can k'aku'n rub'anun quic'aslien, xquitz'at jun nem Luz. Ri can c'o chic ri rumuch'uch'il ri camic pa quive', xa'ru'on alumbrar ri Luz. Quire' ri tz'ib'an can. 17 Y jare' antok ri Jesús xutz'om rutzijoxic ri ruch'ab'al ri Dios y nu'ej chica ri vinak: Titzalaj-pa ivánima riq'uin ri Dios y tib'ana' ri nrajo' jaja', ruma xa cierca chic c'o-ve-pa ri ru-reino, xcha' ri Jesús chica. 18 Y jun k'ij antok ri Jesús b'anak chuchi' ri mar Galilea, xa'rutz'at ica'ye' achi'a' ri quichak'-quinimal-qui'; jun ja ri Simón ri ni'e'x je' Pedro cha, y ri jun chic ja ri Andrés; ijeje' i-tz'amoy-car, mare' niquiya-ka ri quiya'l chupan ri ya'. 19 Y xch'o-apa chica ri ica'ye' achi'a' re' y xu'ej chica: Jo' viq'uin, y xtinc'ut chivach che'l nqui'canuj vinak chi nquinquinimaj. 20 Ri ica'ye' achi'a' re', ja xquiya' can ri quiya'l y xa'a riq'uin ri Jesús. 21 Y c'a jub'a' ca'in, ri Jesús xa'rutz'at chic ica'ye' ri quichak'-quinimal-qui' je', ja ri Jacobo y ri Juan, ri i-ruc'ajuol ri Zebedeo. Ijeje' ic'o riq'uin ri quitata' chupan ri barco, y niquic'ajuoj ri quiya'l richin niquitz'om car. Y ri Jesús xa'rayuoj chi nca'a riq'uin. 22 Y ijeje' ja xquiya' can ri quitata' y ri barco y ja xa'a riq'uin ri Jesús. 23 Y ri Jesús nojiel tanamet richin ri Galilea xak'ax, nca'rutijuoj ri vinak pa tak sinagogas, y nutzijuoj chica ri evangelio ri nich'o' chirij ri ru-reino ri Dios, y nca'ru'on je' sanar iq'uiy vinak ri diferente roch yab'il y k'axuon ntuoc chica. 24 Ri rutzijoxic ri Jesús x'a nojiel tanamet richin ri Siria. Y xa'c'amar-pa iq'uiy yava'i' choch, ri diferente roch yab'il ntuoc chica. Ic'o ri altíra nik'axo ri qui-cuerpo. Ic'o ja ri itziel tak espíritus acunak quiq'uin. Ic'o i-ch'u'j y ic'o je' paralíticos. Y quinojiel xa'ru'on sanar ri Jesús. 25 Y chirij ri Jesús can iq'uiy vinak ri xa'a ri aj-chire' Galilea, ri xa'pa ri pa tak tanamet ri ic'o Decápolis, ri xa'pa Jerusalén, ri xa'pa Judea, y ri xa'pa juc'an chic ruchi' ri río Jordán.
