San Mateo 3

1Chupan ri tiempo re', ri Juan el Bautista xutz'om rutzijoxic ri ruch'ab'al ri Dios chiquivach ri vinak, chupan jun lugar desierto ri c'o Judea. 2Y jaja' nu'ej chica: Titzalaj-pa ivánima riq'uin ri Dios y tib'ana' ri nrajo' jaja', ruma xa cierca chic c'o-ve-pa ri ru-reino, nicha' chica. 3Can ja chirij ri Juan el Bautista xch'o-ve can ri profeta Isaías. Quire' c'a nu'ej: C'o jun ache ri xtic'ujie' chupan jun lugar desierto, y jaja' xturak c'a ruchi' chi xtu'ej chica ri vinak ri xca'b'aka riq'uin: Tichojmij-apa rub'iey ri Ajaf, y can choj tib'ana' cha. Quire' ri rutz'ib'an can. 4Ri rutziak ri Juan el Bautista b'anun cha ruve' camello, y jutz'it tz'un rucusan chi ruximuon rupan. Y ri ruti', ja ri sac' y ri cab' ri niril pa tak k'ayis. 5Y ri vinak ri nca'b'aka riq'uin ri Juan el Bautista, can iq'uiy. Ic'o ri i-patanak Jerusalén, y ic'o ri i-patanak nic'aj chic tanamet richin ri Judea, y ic'o je' ri i-patanak cierca ri río Jordán, 6y jaja' nca'ru'on bautizar chire' chupan ri río Jordán. Y niqui'ej c'a ri qui-pecados ri i-quib'anun-pa. 7Y antok jaja' xutz'at chi iq'uiy chiquivach ri achi'a' fariseos y chiquivach ri achi'a' saduceos je' nca'lka riq'uin ruma nicajo' nca'an bautizar, xu'ej chica: ¡Ixre' xa ix inche'l cumatz! ¿Chica x'e'n chiva chi nquixcolotaj choch ri castigo ri xtutak-pa ri Dios ri chakavach-apa? 8Ixre' nic'atzin ntic'ut chi can ketzij nitzalaj-pa ivánima riq'uin ri Dios y nti'an ri nrajo' jaja'. 9Y man ti'an-ka pensar ixre' chi ruma ix rumáma can ri Abraham, rumare' nquixcolotaj, man quire' ta. Inre' ni'ej chiva chi ri Dios nicovin nca'ru'on rumáma ri Abraham aún chica ri ab'aj ri ic'o vave'. 10Ri castigo ri nuya' ri Dios ya nipa. Jaja' xtu'on inche'l nu'on jun ache ri c'o chic ri icaj pa ruk'a' chi nca'rukasaj quinojiel ri chie' ri man otz ta quivach niquiya', y xca'ruya' pa k'ak'. 11Inre', ya' ri nicusaj chi nquix'an bautizar antok nitzalaj-pa ivánima riq'uin ri Dios y nti'an ri nrajo' jaja'. Pero c'o Jun ri xtipa chuvij inre' ri ni xa ta nuc'ul chi inre' nivalasaj-el y niya' ri ruxajab' chirakan, ruma jaja' c'o nojiel poder riq'uin que chinoch inre', y jaja' xquixru'on bautizar riq'uin ri Espíritu Santo y riq'uin k'ak'. 12Ri Jun ri xtipa c'o jun inche'l horqueta pa ruk'a' y xtujosk'ij ri ru-trigo pa ru-lugar. Y xtumol ri runak' ri trigo y xtuyac. Y ri q'uin xtuya' pa k'ak' ri man nichup ta. 13Y ri Jesús xalka riq'uin ri Juan chire' chuchi' ri río Jordán. Jaja' c'a Galilea alanak-pa chi ni'an bautizar ruma ri Juan el Bautista. 14Pero ri Juan man nrajo' ta nu'on bautizar ri Jesús, y mare' xu'ej cha: Ja ta inre' ri ruc'amun chi nquina'an bautizar, y vacame xa atre' xatalka viq'uin chi ncan'an-el bautizar, xcha' ri Juan. 15Pero ri Jesús xu'ej cha: Tab'ana', ruma ojre' nic'atzin naka'an nojiel ri nu'ej ri Dios. C'ajare' ri Juan xu'on bautizar ri Jesús. 16Y antok ri Jesús b'anun chic bautizar, xiel-pa pa ya'. Y ri rocaj xjakataj y jaja' xutz'at-el chi ri Ru-Espíritu ri Dios nika-pa inche'l jun paluomix; y choj xka-pa paro' jaja'. 17Y jare' antok c'o Jun ri xch'o-pa chicaj y xu'ej: Jare' ri Nuc'ajuol; altíra nivajo' y niquicuot vánima riq'uin.

will be added

X\