San Mateo 28

1Y antok k'axnak chic ri k'ij richin uxlanien, c'a cumaj yan ri na'ay k'ij richin ri semana, ri María Magdalena y ri jun chic ixok rub'inan je' María, xa'a chi niquitz'ata' ri jul pache' yo'n-ve can ri Jesús. 2Y xu'on jun nem cub'rakan; ruma jun ángel richin ri Ajaf xka-pa chicaj chupan ri lugar pache' yo'n-ve can ri Jesús, xralasaj-el ri ab'aj ri choj cha tz'apin can ruchi' ri jul, y xtz'uye' paro'. 3Ri rusakil ri ángel ri tz'uyul paro' ri ab'aj, can junan riq'uin ri sakil ri nuya' ri yocopa'. Y ri rutziak can altíra sak, can inche'l ri hielo ri nika. 4Y ri soldados can altíra xquixi'ij-qui' choch ri ángel, can xa'b'arb'uot, y can inche'l xa'con xa'c'ujie' can. 5Pero ri ángel xch'o-pa chica ri ica'ye' ixoki' y xu'ej chica: Man tixi'ij-ivi'. Ruma inre' vata'n chi ixre' nticanuj ri Jesús ri xquimisas choch ri cruz. 6Jaja' man c'o ta chic vave', ruma ya xc'astaj-el, inche'l ru'e'n can chiva. Quixam-pa; titz'ata' ri lugar pache' xc'ujie-ve ri ru-cuerpo. 7Quix'in cha'nin y ti'ej chica quinojiel ri ru-discípulos, chi jaja' ya xc'astaj-el chiquicajol ri quiminaki'; y vacame ni'a na'ay chivach c'a Galilea; chire' xtitz'at-ve, can inche'l ni'ej-el chiva. 8Y ri ica'ye' ixoki' re' can ja xa'iel-pa chupan ri jul. Y mesque can quixi'in-qui' y altíra je' nca'quicuot, ijeje' cha'nin xa'a chi niqui'ej ri xquitz'at y ri xca'xaj chica ri ru-discípulos ri Jesús. Y antok i-b'anak chi niqui'ej, 9jare' antok ri Jesús xb'a'iel-pa chiquivach y xa'ru'on saludar. Y ri ica'ye' ixoki' re' xa'xuquie-ka choch ri Jesús, xquik'atiej ri rakan y can xquiya' ruk'ij. 10Y ri Jesús xu'ej chica ri ixoki': Man tixi'ij-ivi'. Quix'in y ti'ej chica ri nu-hermanos ri xitz'at y xivaxaj, richin chi ca'a Galilea y chila xquinquitz'at-ve, xcha' chica. 11Y antok ri ixoki' quitz'amuon b'ay, ic'o nic'aj chiquivach ri soldados ri niquichajij ri jul xa'a pa tanamet Jerusalén y xb'aqui'ej chica ri principales sacerdotes nojiel ri xb'anataj ri pache' xmuk-ve ri Jesús. 12Ri principales sacerdotes xquimol-qui' quiq'uin ri mama'a' tak achi'a' ri niqui'an gobernar, y antok qui'e'n chic chiquivach, xquiya' q'uiy miera chica ri soldados. 13Ijeje' xqui'ej chica: Ixre' ti'ej chi xixvar-ka ri chak'a', y antok nquixvar, xa'lka ri ru-discípulos ri Jesús y xquilak'aj-el ri ru-cuerpo. 14Y xa ri gobernador nuna'iej chi ixre' xa xixvar-ka y man xichajij ta inche'l ri x'e'x chiva, ojre' xkojb'ach'o' riq'uin y xkojrunimaj, y quire' nquixkacol pa ruk'a', xa'cha' chica. 15Ri soldados xquic'an ri miera, y can inche'l x'e'x chica, can quire' xqui'an: Can xquitzijuoj inche'l ri x'e'x chica chiquicajol ri israelitas y c'a niquinimaj chupan ri tiempo vacame. 16Ri once (julajuj) ru-discípulos ri Jesús xa'a Galilea. Y xa'jotie' paro' ri ch'iti juyu' pache' b'e'n can chica ruma ri Jesús. 17Y antok ijeje' xquitz'at ri Jesús, can xquiya' ruk'ij. Pero ic'o nic'aj ri man can ta niquinimaj chi ja ri Jesús. 18Y ri Jesús xjiel-apa quiq'uin y xu'ej chica: Can nojiel poder xjach pa nuk'a'; ri c'o chicaj y ri c'o vave' choch-ulief. 19Mare' ni'ej can chiva: Quix'in c'a nojiel naciones chi ntic'ut chiquivach ri vinak chi nca'uoc nu-discípulos; qui'b'ana' bautizar pa rub'e' ri Katata' Dios, pa nub'e' inre' ri in Ruc'ajuol ri Dios y pa rub'e' ri Espíritu Santo. 20Y tic'utu' chiquivach chi tiquib'ana' nojiel ri nu'e'n chiva. Y inre' xquic'ujie' iviq'uin nojiel k'ij hasta c'a antok xtalka ri ruq'uisb'al k'ij richin ri roch-ulief. Amén.

will be added

X\