San Mateo 26

1Antok ri Jesús ru'e'n chic c'a nojiel re', jaja' xu'ej chica ri ru-discípulos: 2Ixre' ivata'n chi ca'ye' k'ij apa c'o ri namak'ej Pascua. Chupan ri namak'ej re', ri Xtak-pa chicaj chi xalax chi'icajol can xtijach-el chi nib'ajix choch cruz, xcha' chica. 3Y ja huora re' ri principales sacerdotes, ri achi'a' escribas, y ri mama'a' tak achi'a' ri niqui'an gobernar chiquicajol ri vinak, xquimol-qui' chojay, chirachuoch ri sacerdote ri más c'o ruk'ij ri rub'inan Caifás. 4Ijeje' xqui'ej chiquivach ri chica maña xtiquicusaj chi nika ri Jesús pa quik'a' y niquiquimisaj. 5Pero xqui'ej je': Man nakatz'om ta chupan ri namak'ej re', chi quire' man nca'palaj ta pa ri vinak chikij, nca'cha'. 6Y ri Jesús c'o chupan ri aldea Betania, chirachuoch ri Simón ri xc'achoj riq'uin ri yab'il lepra. 7Y xalka jun ixok riq'uin ri Jesús, ruc'amun-pa jun frasco ri b'anun cha alabastro y c'o jun jub'ul ak'uon chupan ri can cara rajal; y xuk'ej pa rujaluon ri Jesús, antok tz'uyul chirij ri mesa. 8Antok ri discípulos xquitz'at ri xu'on ri ixok, xpa quiyoval y xqui'ej: ¿Karruma choj xutix ri jub'ul ak'uon la? 9Ruma ri jub'ul ak'uon re' can cara rajal, xa ta xc'ayix, ri rajal xjach ta chica ri i-puobra, xa'cha'. 10Pero ri Jesús cha'nin xra'xaj ri niqui'ej, rumare' jaja' xu'ej chica: ¿Karruma man nquixtanie' ta ka nquixtzijuon chirij la ixok la? Jaja' can otz ri xu'on chuva. 11Ruma ri i-puobra, can siempre ic'o iviq'uin. Pero inre' man siempre ta xquic'ujie' iviq'uin. 12Ruma ri ixok re' antok xuk'ej chirij ri nu-cuerpo ri jun jub'ul ak'uon re', jaja' xiru'on preparar richin antok xquib'amuk. 13Can ketzij ri ni'ej chiva, chi chica-na lugar xtitzijos-ve ri evangelio, chire' je' xtitzijos-ve ri xu'on va ixok va. Can choch c'a nojiel ri roch-ulief xtitzijos-ve, y man jun b'ay xtimastaj, xcha' ri Jesús. 14Entonces jun chiquivach ri i-doce (cab'alajuj) ru-discípulos ri Jesús, ri discípulo ri rub'inan Judas Iscariote, x'a quiq'uin ri principales sacerdotes. 15Jaja' xb'aru'ej chica: ¿Chica ntiya' chuva, xa inre' nijach ri Jesús pan ik'a'? Y ijeje' xqui'ej chi niquiya' treinta monedas de plata cha. 16Y chupan ri k'ij re', ri Judas Iscariote ja xutz'om c'a rucunuxic chica manera nu'on chi nujach ri Jesús. 17Chupan ri na'ay k'ij richin ri namak'ej antok nic'ux ri simíta ri manak levadura riq'uin, ri discípulos xb'aquic'utuj cha ri Jesús: ¿Pache' navajo' na'an-ve ri va'en chupan ri Pascua, chi quire' nakachojmij nojiel ri nic'atzin? xa'cha'. 18Y jaja' xu'ej chica ri discípulos: Quix'in pa tanamet Jerusalén, pa rachuoch jun ache, y ti'ej cha: Ri Maestro ru'e'n-pa: Ri nu-tiempo xa cierca chic c'o-ve. Pan avachuoch atre' nivajo' ni'an-ve ri va'en richin ri Pascua quiq'uin ri nu-discípulos. Quire' xu'ej-el ri Jesús chica. 19Y ri discípulos can xqui'an inche'l ri e'n-el chica ruma ri Jesús. Y ijeje' can xquichojmij nojiel ri nic'atzin chica richin ri Pascua re'. 20Antok xcok'a-ka, ri Jesús y ri i-doce (cab'alajuj) ru-discípulos xa'tz'uye-apa chirij ri mesa. 21Y antok nca'va', ri Jesús xu'ej: Can ketzij ni'ej chiva, chi jun chivach ixre' ri xtijacho vichin, xcha'. 22Y ri discípulos altíra xa'b'isuon-ka, y chiquijunal xquic'utuj-apa cha: ¿Inre' came ri xquib'ano quire' Ajaf? 23Y ri Jesús xu'ej chica: Ri jun ri xtuya-pa ri ruk'a' viq'uin chupan ri plato, jare' ri xtijacho vichin. 24Can ketzij chi ri Xtak-pa chicaj chi xalax chi'icajol can ni'a. Can xtib'anataj-na-ve inche'l ri tz'ib'an can chupan ri ruch'ab'al ri Dios. ¡Pero juye' roch ri ache ri xtijacho richin! Más otz man ta xalax ri ache re', xcha' ri Jesús. 25Y xch'o-apa ri Judas, ri xtijacho richin ri Jesús; y xu'ej: ¿Inre' came ri xquib'ano quire' Maestro? xcha'. Y ri Jesús xu'ej cha: Atre' xa'e'n. 26Y antok c'a nca'va', ri Jesús xuc'an-apa jun simíta y xuya' tiox b'a' cha ri Dios, y xuper y xuya' chica ri ru-discípulos y xu'ej chica: Titz'ama' y tic'uxu' ri simíta; ruma jare' ri nu-cuerpo. 27Y ri Jesús xuc'an-apa ri copa, y xuya' tiox b'a' cha ri Dios, xuya' c'a chica ri ru-discípulos y xu'ej chica: Tikumu' ixvonojiel ri c'o chupan ri copa re'. 28Ruma jare' ri nuquiq'uiel ri xti'in antok xquiquimisas pa qui-cuenta iq'uiy vinak, chi quire' iq'uiy ri xti'an perdonar ri qui-pecados. Riq'uin ri nuquiq'uiel, ja xtic'achoj ri c'ac'ac' pacto ri rajo'n-pa ri Dios chi nu'on quiq'uin ri vinak. 29Can ni'ej chiva chi man chic xtinkun ta ri ruya'l ri uva, hasta c'a chupan ri k'ij antok xtinkun jun c'ac'ac' ruya'l ri uva iviq'uin chupan ri ru-reino ri Nata', xcha' ri Jesús chica. 30Y antok quib'ixan chic jun b'ix chi niquiya' ruk'ij ri Dios, ri Jesús y ri ru-discípulos xa'iel-el chire' pa jay y xa'a choch ri juyu' Olivos. 31Y antok i-b'anak, ri Jesús xu'ej chica ri ru-discípulos: Ixvonojiel ixre' xtiquiraj-el-ivi' y xquiniya' can nuyuon chupan va ak'a' va. Ruma chupan ri ruch'ab'al ri Dios ri tz'ib'an can nu'ej: Antok inre' xtinya' lugar chi niquimisas ri nichajin quichin ri ovejas, ri ovejas xtiquiquiraj-el-qui'. Quire' ri tz'ib'an can. 32Pero inre' xa xquic'astaj-pa. Y después xquixvoyo'iej Galilea, xcha' ri Jesús. 33Y ri Pedro xch'o-apa cha ri Jesús y xu'ej: Mesque quinojiel xcatquiya' can ayuon, pero inre' man xcanya' ta can, xcha' jaja'. 34Ri Jesús xu'ej cha: Inre' can ketzij ni'ej chava chi chupan va ak'a' va, xa c'a maja' titzirin-pa ri mama', antok atre' oxe' yan mul ta'ej chica ri nca'c'utun chava, chi man avata'n ta noch, xcha' ri Jesús. 35Y ri Pedro xu'ej cha: Mesque nic'atzin chi junan nquicon aviq'uin, pero man xtin'ej ta chi man vata'n ta avach, xcha' ri Pedro. Y quinojiel ri ru-discípulos quire' je' xqui'ej. 36Ri Jesús y ri ru-discípulos xa'lka chupan ri lugar rub'inan Getsemaní. Y ri Jesús xu'ej chica ri ru-discípulos: Quixtz'uye' can vave', inre' xa c'a nqui'a-apa más chila chi nib'ana' orar, xcha' chica. 37Y jaja' jo'c ri Pedro y ri ica'ye' ruc'ajuol ri Zebedeo ri xa'ruc'uaj riq'uin, y chirij jaja' xpa jun nem b'is, ruma xuna' yan ri nem sufrimiento ri xtuk'asaj. 38Rumare' xu'ej chica ri iyoxe' ru-discípulos: Ri vánima altíra nib'isuon; can nquiruquimisaj nina'. Quixc'ujie' can vave' y quixc'asie' viq'uin, xcha' chica. 39Jaja' x'in chic apa jub'a' y chire' xxuquie-ka, y xukasaj-ka ri rujaluon c'a pan ulief chi xu'on orar; y quire' xu'ej: Nata', xa c'o ta che'l chi man ta nik'asaj ri sufrimiento, pero man ta'an ri nivajo' inre', xa ja ri navajo' atre', xcha'. 40Y antok jaja' xtanie' riq'uin ri oración, xpa c'a quiq'uin ri iyoxe' ru-discípulos, y xa'lrila' xa nca'var. Xpa jaja' xu'ej cha ri Pedro: ¿Can man xixtiquir ta xixc'asie' jun huora viq'uin? 41Quixc'asie' y tib'ana' orar richin chi man quixtzak chupan ri tentación. Inre' vata'n chi ri iv-espíritu nrajo' nu'on ri nrajo' ri Dios, pero ri i-cuerpo manak ruchuk'a', xcha' chica. 42Y ri Jesús x'a chic apa jun b'ay chi xirub'ana' orar, y nu'ej: Nata' Dios, xa man jun manera chi inre' man ta nik'asaj ri sufrimiento re', can tib'anataj ri navajo' atre'. Quire' nu'ej chupan ri ru-oración. 43Y antok jaja' xpa chic jun b'ay quiq'uin ri iyoxe' ru-discípulos, xa'lrila' xa nca'var ruma man chic niquicoch' ta quivaran. 44Ri Jesús xa'ruya' chic can jun b'ay y x'a chic chi xirub'ana' orar, chi oxe' mul. Y ja mismo xuc'utuj chupan ri oración. 45Y c'ajare' ri Jesús xpa quiq'uin ri iyoxe' ru-discípulos y xu'ej chica: Vacame quixvar y quixuxlan. Ruma ja xalka ri huora chi ri Xtak-pa chicaj chi xalax chi'icajol can xtijach-el pa quik'a' ri pecadores. 46Quixpalaj. Jo'. Titz'ata', ja patanak ri xtijacho vichin, xcha' ri Jesús. 47Y ri Jesús c'a nitzijuon, antok xalka ri Judas, ri jun chiquivach ri doce (cab'alajuj) discípulos; riq'uin jaja' i-patanak iq'uiy vinak ri quic'amun-pa chie' y espadas. Quinojiel i-takuon-el cuma ri principales sacerdotes y cuma je' ri mama'a' tak achi'a' ri niqui'an gobernar chiquicajol ri israelitas. 48Ri Judas ri nijacho richin ri Jesús, can ru'e'n yan pa chica ri i-patanak riq'uin, ri chica xtu'on chi nuc'ut ri Jesús chiquivach. Jaja' ru'e'n-pa chica: Ja ri jun ri xtintz'ub'aj ruchi', jare' ri Jesús, titz'ama' c'a. 49Y ri Judas can ja xjiel-apa riq'uin ri Jesús y xu'ej: ¡Co k'a' Maestro! xcha' cha. Y ja xutz'ub'aj ruchi'. 50Xpa ri Jesús xu'ej cha ri Judas: Amigo, ¿chica ri navajo' na'an? xcha' cha. Y jare' antok xa'jiel-apa ri vinak riq'uin ri Jesús y xquitz'om. 51Y jun chiquivach ri ic'o riq'uin ri Jesús, xralasaj-el ri ru-espada y xusoc ri ru-esclavo ri sacerdote ri más c'o ruk'ij, y xralasaj-el jun ruxiquin. 52Y ri Jesús xu'ej cha ri xb'ano quire': Tayaca' la av-espada. Ruma ri niquimisan cha espada, can cha espada xtiquimisas. 53¿Acaso atre' na'an pensar chi inre' man nquicovin ta nic'utuj cha ri Nata' Dios chi nca'rutak-pa más de doce (cab'alajuj) legiones (72,000) de ángeles chi nquinquito'? 54¿Pero che'l nu'on cumplir ri i-tz'ib'an can chupan ri ruch'ab'al ri Dios chi nic'atzin chi nib'anataj quire'? xcha' jaja'. 55Y chupan je' ri huora re' ri Jesús xu'ej chica ri vinak: ¿Ixre' ix-patanak inche'l chirij jun alak'uon; mare' ic'amun-pa chie' y espadas chi nquiniltz'ama'? Can k'ij-k'ij xitz'uye' iviq'uin pa templo antok xinc'ut ri ruch'ab'al ri Dios chivach, y man xinitz'om ta. 56Pero nojiel re' nib'anataj, richin nu'on cumplir ri tz'ib'an can chupan ri ruch'ab'al ri Dios cuma ri profetas ri xa'c'ujie' ojier can tiempo. Y quinojiel ri discípulos xquiya' can ruyuon ri Jesús y xa'numaj-el. 57Ri xa'b'atz'amo ri Jesús xquic'uaj c'a riq'uin ri Caifás ri sacerdote ri más c'o ruk'ij, pache' quimaluon-ve-qui' ri achi'a' escribas y ri mama'a' tak achi'a' ri niqui'an gobernar. 58Y ri Pedro b'anak chirij, pero c'a naj c'o can y xuoc je' chirachuoch ri sacerdote ri más c'o ruk'ij, y xc'ujie' chojay. Antok jaja' c'o chic chire', xtz'uye-apa chiquicajol ri alguaciles ri ic'o chire', chi nutz'at-apa chica xtib'anataj. 59Y ri principales sacerdotes y ri mama'a' tak achi'a' ri niqui'an gobernar y quinojiel ri autoridades quichin ri israelitas, niquicanuj manera chi niquitz'ak tzij chirij ri Jesús, chi quire' niquitak chi niquimisas. 60Y mesque can iq'uiy ri xa'lka chi xquitz'ak tzij chirij, xa man jun xquil chirij. Xa c'a pa ruq'uisb'al xa'lka ica'ye' chi niquitz'ak tzij, 61y xqui'ej: Ri ache re' ru'e'n: Inre' nquitiquir nivulij ri ru-templo ri Dios y chi oxe' k'ij nipab'a' chic jun b'ay. Quire' ru'e'n, xa'cha' ri ica'ye' re'. 62Y ri Caifás, ri sacerdote ri más c'o ruk'ij, xpi'ie' y xu'ej cha ri Jesús: ¿Man jun kax na'ej? ¿Ketzij ri xqui'ej chavij? xcha'. 63Pero ri Jesús man jun tzij xu'ej. Y jare' antok ri sacerdote ri más c'o ruk'ij xu'ej cha: Can choch ri c'aslic Dios ta'ej chika xa atre' ri Cristo, ri Ruc'ajuol ri Dios. 64Y ri Jesús xu'ej cha: Atre' xa'ej ri ketzij; y ni'ej je' chiva chi desde vacame can xtitz'at ri Xtak-pa chicaj chi xalax chi'icajol, chi tz'uyul pa ru-derecha ri Dios ri nitiquir nu'on nojiel. Y xtitz'at antok nika-pa chupan mukul ri chicaj. 65Entonces ri sacerdote ri más c'o ruk'ij xurak'ach'ij-ka ri rutziak chirij, y xu'ej: Man chic nic'atzin ta chi nalka jun chic chi nalru'ej chika chi man otz ta ri i-rub'anun. Ixre' xivaxaj ri xu'ej, chi jaja' junan riq'uin ri Dios. ¡Re' can itziel choch ri Dios! 66¿Chica nti'ej ixre' vacame? xcha' jaja'. Y ri nic'aj chic ri quimaluon-apa-qui' chire' xqui'ej: ¡Otz chi tiquimisas! xa'cha'. 67Y xquichub'aj rutzub'al y xquiya' k'a' cha y nic'aj chic xquipaj rutzub'al, 68y niquic'utuj cha: Ta'ej chika, Cristo, ¿chica ri xch'ayo avichin? xa'cha' cha. 69Ri Pedro tz'uyul chojay, y jun xtan aj-chi-ic' richin ri sacerdote ri más c'o ruk'ij xjiel-apa riq'uin y xu'ej cha: Atre' je' at rach'il ri Jesús ri aj-Galilea, xcha' cha. 70Pero ri Pedro man xu'ej ta ri ketzij chiquivach quinojiel, ruma xu'ej: Man vata'n ta chica ri na'ej, xcha' cha. 71Y antok jaja' ya ntiel-el chuchi' ri puerta, c'o chic jun xtan aj-chi-ic' ri xtz'ato richin y xu'ej chica ri ic'o chire': La ache la can rach'il ri Jesús ri aj-Nazaret, xcha' chica. 72Pero ri Pedro jun chic b'ay man xu'ej ta ri ketzij. Jaja' xu'ej: Choch ri Dios ni'ej chi inre' man vata'n ta roch ri jun ache re'. 73C'a jub'a' oc quire' ti'e'x cha, ri quimaluon-qui' chire' xa'jiel-apa riq'uin ri Pedro y xqui'ej cha: Can ketzij chi atre' at jun chiquivach ri ic'o riq'uin ri Jesús, ruma ncach'o' inche'l nca'ch'o' ri aj-Galilea, xa'cha' cha. 74Entonces ri Pedro xu'ej: Inre' man vata'n ta roch ri ache re'. Can choch ri Dios ni'ej chiva chi inre' man vata'n ta roch. Y xa man ketzij ta ri ni'ej, tika ri castigo pano', xcha'. Y jare' antok xtzirin-pa ri mama'. 75Y ri Pedro xalka paro' ri tzij ri ru'e'n ri Jesús cha: Antes c'a maja' titzirin-pa ri mama', antok atre' oxe' yan mul ta'ej chica ri nca'c'utun chava, chi man avata'n ta noch. Y ri Pedro xiel-el juviera y xuok' amargamente.

will be added

X\