San Mateo 25

1Entonces ri reino ri c'o chicaj xtu'on inche'l ri xb'anataj quiq'uin i-diez (lajuj) xtani' ri xquic'uaj qui-lámparas chi xb'aquiyo'iej ri ala' ri nic'ulie'. 2Ivu'uo' c'a chiquivach ri xtani' can c'o quino'j, y ri ivu'uo' chic xa manak quino'j. 3Ri ivu'uo' xtani' ri manak quino'j, man xquic'uaj ta chic más qui-aceite chi niquinojsaj ri qui-lámparas; xa can jo'c ri c'o-el chupan ri qui-lámparas. 4Pero ri ivu'uo' chic xtani' ri can c'o quino'j, xquic'uaj ri qui-lámparas y xquic'uaj qui-frascos quinojsan rupan chi aceite. 5Y ruma ri ala' ri nic'ulie' man nalka ta yan, ri i-diez (lajuj) xtani' ri quiyo'ien xa'yuxcu'r-ka y xa'var-ka. 6Pa nic'aj-ak'a', xc'axax chi c'o ri nisiq'uin y nu'ej: ¡Ja patanak ri ala' ri xtic'ulie'; quixiel-pa chi ntic'ulu'! nicha'. 7Y ri i-diez (lajuj) xtani' re', ri quiyo'ien ri ala' ri xtic'ulie', can cha'nin xa'palaj y xquichojmij ri qui-lámparas. 8Pero ri ivu'uo' xtani' ri manak quino'j xqui'ej chica ri ivu'uo' chic xtani' ri can c'o quino'j: Ri ka-lámparas xa can nca'chup-ka ruma man q'uiy ta chic aceite chiquipan. Tiya' jub'a' ka-aceite, xa'cha' ri xtani' ri manak quino'j. 9Pero ri ivu'uo' chic xtani' ri can c'o quino'j, xqui'ej: Xa nakaya' ri ka-aceite chiva, man xkuru'on ta ojre' ni ixre'. Rumare' más otz quix'in quiq'uin ri nca'c'ayin y tilak'o' ivichin ixre', xa'cha'. 10Y antok ri ivu'uo' xtani' re' c'a ja i-b'anak chulok'ic ri aceite, ja xalka ri ala' ri xtic'ulie'. Ri ivu'uo' xtani' ri can ic'o-apa quiyo'ien ri ala' ri xtic'ulie', xa'uoc riq'uin ri ala' pache' ni'an-ve ri c'ulub'ic. Y xtz'apes can ri puerta. 11Y después xa'lka ri ivu'uo' chic xtani' ri xb'aquilak'o' qui-aceite richin ri qui-lámparas, y ijeje' xqui'ej-apa: ¡Ajaf, ajaf, tajaka' ri puerta chakavach! xa'cha'. 12Y jaja' xu'ej-pa chica ri xtani' re': Inre' can ketzij ni'ej chiva, chi man vata'n ta ivach, xcha-pa chica. 13Ruma c'a re', man timastaj chiva chi ntivoyo'iej-apa, ruma man ivata'n ta ri chica k'ij, ri chica huora antok ri Xtak-pa chicaj chi xalax chi'icajol xtipa chic jun b'ay, xcha'. 14Ruma ri reino ri c'o chicaj, can junan riq'uin ri xu'on jun ache antok x'a naj. Jaja' xa'rayuoj ri rusamajiel y xuya' can ri rub'ayomal pa quik'a'. 15Pa ruk'a' jun xuya' can vu'uo' talentos, pa ruk'a' jun chic xuya' can ca'ye' talentos, y pa ruk'a' jun chic xuya' can jun talento. Jaja' jare' xuya' can chica, ruma xutz'at chi jare' nca'tiquir nca'samaj chirij. Y can jo'c xu'on can quire', ja x'a. 16Y ri xyo'x can vu'uo' talentos pa ruk'a' x'a, xsamaj chirij y xuch'ec chic vu'uo' más chirij. 17Y quire' je' xu'on ri xyo'x can ca'ye' talentos pa ruk'a', jaja' can xuch'ec ca'ye' chic más chirij. 18Pero ri ruox ri jo'c jun talento ri xyo'x can cha, x'a y xb'aruc'ato' jun jul pan ulief y chire' xumuk-ve ri miera. 19Después antok k'axnak chic q'uiy k'ij, xtzalaj-pa ri ache ri cajaf ri samajiel re'. Y jaja' xuc'utuj chica, jane' (jaro') xquich'ec chirij ri miera ri xuya' can chica. 20Antok xalka ri yo'n can ri vu'uo' talentos pa ruk'a', can man jo'c ta re' ri ruc'amun-pa, xa can ruc'amun-pa vu'uo' talentos más y xu'ej: Ajaf, atre' vu'uo' talentos xaya' can pa nuk'a'; ja-va, y c'o chic vu'uo' más ri xinch'ec chirij, xcha'. 21Y ri rajaf xu'ej cha: Otz ri xa'an. At jun utzulaj nusamajiel, can na'an ri ni'e'x chava. Y ruma otz xa'an riq'uin ri jub'a' xinya' can pan ak'a', vacame xcanya' paro' jun samaj más nem. Catuoc-pa y caquicuot je' viq'uin, xuche'x. 22Antok xalka ri yo'n can ri ca'ye' talentos pa ruk'a', xu'ej: Ajaf, atre' ca'ye' talentos xaya' can pa nuk'a'; ja-va, y c'o chic ca'ye' más ri xinch'ec chirij, xcha'. 23Ri rajaf xu'ej cha: Otz ri xa'an. At jun utzulaj nusamajiel, can na'an ri ni'e'x chava. Y ruma can otz xa'an riq'uin ri jub'a' xinya' can pan ak'a', vacame xcanya' paro' jun samaj más nem. Catuoc-pa y caquicuot je' viq'uin, xuche'x. 24Pero antok xalka ri yo'n can ri jun talento pa ruk'a', xu'ej: Ajaf, inre' can vata'n chi at jun ache altíra at ruquiy. Y navajo' na'an cosechar ri xa man atre' ta ri at-tiquiyuon y navajo' nayac ri trigo ri xa man atre' ta ri xab'ano ri samaj. 25Y rumare' inre' xinxi'ij-vi'. Can jo'c xaya' can chuva, xi'a y xinc'ot jun jul pan ulief y chire' xinmuk-ve. Y ja a-miera va, xcha'. 26Y ri rajaf xu'ej cha: Atre' at jun itziel samajiel, y at k'uor, man na'an ta ri ni'e'x chava. Xa can avata'n chi inre' nivajo' ni'an cosechar ri man inre' ta in-tiquiyuon y nivajo' niyac ri trigo ri xa man inre' ta ri xib'ano ri samaj; 27xa avata'n chi in quire', xaya' ta ri nu-miera pa banco y antok xitzalaj-pa, ni'an ta recibir ri nu-miera y ri interés (ralab'al). 28Tic'ama-el ri talento cha, y tiya' cha ri jun ri c'o diez (lajuj) talentos riq'uin. 29Ruma ri can c'o riq'uin, xtiyo'x más cha y can q'uiy xtu'on-ka riq'uin. Pero ri xa man q'uiy ta c'o riq'uin, hasta re' xtalasas-el cha. 30Y ri samajiel ri man jun nic'atzin-ve, ic'aka' pa k'aku'n, ri pache' ruyuon ok'iej xtu'on y xtuk'ach'ach'iej roray. 31Y antok ri Xtak-pa chicaj chi xalax chi'icajol xtipa chic jun b'ay, can c'o chic ruk'ij xtipa; y can quinojiel ri ru-ángeles xca'pa riq'uin. Y xtitz'uye' chupan ri namalaj ru-trono. 32Can xca'muol ri vinak choch, ri ic'o nojiel naciones. Y xtujach quivach quinojiel, inche'l nu'on jun ache ri nca'ruchajij chicop; jaja' juc'an nca'ruya-ve ri ovejas, y juc'an chic nca'ruya-ve ri cabras. 33Ri vinak ri choj chic quic'aslien, jare' ri i-inche'l ovejas, xca'ruya' pa ru-derecha. Pero ri vinak ri man otz ta ri quic'aslien, jare' ri i-inche'l cabras, xca'ruya' pa ru-izquierda. 34Entonces ri Rey xtu'ej chica ri ic'o pa ru-derecha: Can quixam-pa ixre', can c'o chic ri ru-bendición ri Nata' Dios pan ive'. Quixc'ujie' chupan ri reino ri can ivichin ixre' rub'anun preparar antok c'a maja' c'o ri roch-ulief. 35Ruma antok inre' xnem nupan, ixre' c'o xiya' chuva chi xintej. Antok xchakej nuchi', ixre' c'o xiya' chuva chi xinkun. Antok xc'atzin nu-posada, ixre' xiya' chuva. 36Antok manak chic nutziak chuvij, ixre' can xiya' nutziak. Antok xiyavaj, xini'an visitar. Antok xitz'apie' pa cárcel, xixb'aka viq'uin, xticha' ri Rey. 37Y ri choj chic quic'aslien xtiqui'ej: Ajaf, ¿jampe' xatkatz'at chi c'o vi'jal xak'asaj y c'o xkaya' chava chi xatej? ¿Jampe' xatkatz'at chi xchakej achi' y c'o xkaya' chava chi xakun? 38¿Y jampe' xkaya' a-posada ruma xc'atzin chava? ¿Jampe' xkaya' atziak ruma man jun chic nacusaj? 39¿Jampe' xojb'aka aviq'uin antok xayavaj? ¿Y jampe' je' xojb'aka aviq'uin antok atc'o pa cárcel? xca'cha' ijeje'. 40Y ri Rey xtu'ej: Can ketzij c'a ri ni'ej chiva, ruma quire' xi'an riq'uin ri nu-hermano ri can manak-oc ruk'ij, xa chuva inre' xi'an-ve ri favor re', xticha' ri Rey. 41Y xtu'ej je' ri Rey chica ri ic'o pa ru-izquierda: Ixre' malditos, quixiel-el chinoch y quix'in c'a pa k'ak' ri man nichup ta, ri b'anun preparar richin ri diablo y ri ru-ángeles. 42Ruma antok inre' xnem nupan, man jun xiya' chuva chi xintej. Antok xchakej nuchi', ixre' man jun xiya' chuva chi xinkun. 43Antok xc'atzin nu-posada, ixre' xa man xiya' ta chuva. Antok manak chic nutziak chuvij, ixre' man jun xiya' chuva chi xincusaj. Antok xiyavaj, man xini'an ta visitar; y quire' je' antok xitz'apie' pa cárcel, man xixb'aka ta viq'uin, xticha' ri Rey chica. 44Y ijeje' xtiqui'ej je': Ajaf, ¿jampe' xatkatz'at chi xak'asaj vi'jal o xchakej achi', o xavajo' a-posada, o man jun atziak, o xayavaj, o xac'ujie' pa cárcel, y man xka'an ta favor chava? 45Y ri Rey xtu'ej chica: Can ketzij c'a ri ni'ej chiva chi ruma man jun favor xi'an chica ri nu-hermanos ri manak-oc quik'ij, xa man jun je' favor xi'an chuva inre'. 46Y ri vinak re' can xca'a-ve chupan ri castigo ri man xtiq'uis ta. Y ri vinak choj chic ri quic'aslien xtiyo'x chica jun c'aslien ri man xtiq'uis ta. Quire' ri xu'ej ri Jesús.

will be added

X\