San Mateo 24

1Y antok ri Jesús xiel-pa pa templo chi ni'a, ri ru-discípulos xa'jiel-apa riq'uin y xquic'ut choch ri chica quib'anic b'anun chica ri jay richin ri templo. 2Ri Jesús xu'ej chica: ¿Ntitz'at nojiel va? Inre' can ketzij ni'ej chiva, chi xtalka jun k'ij antok nojiel va xca'vulex. Quinojiel ri nima'k tak ab'aj ri i-cusan, can xca'vulex, y man jun ab'aj ri xtic'ujie' can pa ru-lugar, xcha' chica. 3Y antok ri Jesús tz'uyul chic paro' ri juyu' Olivos, ri ru-discípulos xa'jiel-apa riq'uin y xquic'utuj cha: Ta'ej chika, ¿jampe' c'a xtib'anataj ri xa'ej? ¿Y chica señal xtib'anataj chi quire' nina'ax chi atre' ncapa chic jun b'ay, y ri ruq'uisb'al k'ij richin ri tiempo va? xa'cha' cha. 4Y ri Jesús xu'ej chica: Tib'ana' cuenta-ivi' chi man jun tib'ano maña chiva. 5Ruma iq'uiy ri xca'pa y xtiqui'ej: Inre' ri Cristo, xca'cha'. Y iq'uiy ri xca'qui'an maña chica. 6Y xtivaxaj chi nib'anataj guerras y xtivaxaj je' chi c'o guerras ri xca'pa, pero man tixi'ij-ivi', ruma nic'atzin chi nojiel re' xca'b'anataj. Pero man ja ta yan re' ri ruq'uisb'al k'ij richin ri roch-ulief. 7Jun nación xtipalaj chirij jun chic nación y jun reino xtipalaj chirij jun chic reino. Xca'pa yab'il, xtu'on vi'jal y xtu'on je' nima'k tak cub'rakan chica-na lugar. 8Y nojiel re' xa c'a ja oc rutz'ucb'al richin ri sufrimientos ri xca'pa. 9Y ixre' xquixyo'x chupan sufrimiento y ic'o chivach ixre' ri xca'quimisas. Can quinojiel vinak ri ic'o choch-ulief itziel xquixquitz'at ruma iyo'n ivánima viq'uin. 10Iq'uiy xca'tzak pa quic'aslien choch ri Dios, y xtiquisujuj-qui' y ic'o itziel xtiquitz'at-qui'. 11Y iq'uiy falsos profetas xca'palaj-pa y iq'uiy ri xca'ka pa quik'a', ruma xca'qui'an engañar. 12Chupan je' ri tiempo re', ruma altíra chic q'uiynak ri itziel riq'uin cánima, iq'uiy ri man xticajo' ta chic qui', xa itziel xtiquitz'at-qui'. 13Pero ri man xtitzalaj ta chirij y xtucoch' nojiel re' hasta el fin, can xticolotaj. 14Y xtitzijos c'a ri evangelio ri nich'o' chirij ri ru-reino ri Dios, choch nojiel ri roch-ulief, richin chi quinojiel vinak nica'xaj. Y c'ajare' xtalka ri ruq'uisb'al k'ij richin ri tiempo. 15Y antok xtitz'at chi xca'b'anataj ri itziel tak kax chupan ri Lugar Santo, ja xtiq'uis ri lugar re', ri inche'l tz'ib'an can ruma ri profeta Daniel, (ri nib'ano leer, can tub'ana' entender). 16Entonces ri ic'o Judea, ca'numaj-el pa tak juyu'. 17Ri c'o paro' ri rachuoch antok xtalka ri huora re', man tika-pa chi c'o niruma-pa chupan ri rachuoch, 18y ri c'o pan avan, man titzalaj-pa chirachuoch chi nalruma' ri ru-capa. 19¡Can juye' quivach ri ixoki' ri ic'o encinta (embarazada) antok xtalka ri k'ij re', y quire' je' ri ixoki' ri c'a niquiya' quitz'un ri quixulu'! 20Rumare', tib'ana' orar chi antok xquixnumaj, man ta pa ru-tiempo job' o chupan jun k'ij richin uxlanien, 21ruma xtalka jun gran sufrimiento vave' choch-ulief ri man jun b'ay quire' rub'anun xa-jan antok b'anun-pa ri roch-ulief ruma ri Dios, ni xtalka chic jun b'ay ri sufrimiento re'. 22Y xa ta ri Dios man ta nu'on co'l cha ri tiempo richin ri sufrimiento, man jun nicolotaj. Pero cuma ri i-rucho'n chic, can xtu'on co'l cha ri tiempo re'. 23Chupan ri k'ij re', xa ic'o ri xca'e'n chiva: Titz'ata', ja c'o vave' ri Cristo, o xa niqui'ej chiva: Titz'ata', ja c'o chila, man tinimaj. 24Ruma xca'pa falsos cristos y falsos profetas. Ijeje' xca'qui'an nima'k tak señales y milagros chi xtiqui'an maña chica ri vinak. Y ijeje' nicajo' xtiqui'an maña chica hasta ri i-cho'n chic ruma ri Dios. 25Can ja yan xin'ej can chiva ri xca'b'anataj. 26Rumare', xa ni'e'x chiva: Titz'ata', ja c'o chupan jun lugar pache' manak vinak, man c'a quix'a chutz'atic. Y xa ni'e'x chiva: Titz'ata', ja c'o chupan jun jay, man tinimaj. 27Ruma antok ri Xtak-pa chicaj chi xalax chi'icajol xtipa chic jun b'ay, can xtik'alajin-ve ja'al. Can xtib'anataj c'a inche'l nu'on ri yocopa', ri nu'on cala pache' ntiel-pa ri k'ij y c'a k'alaj pache' nika-ka ri k'ij. Quire' xtu'on jaja'. 28Can xtib'anataj inche'l nib'anataj quiq'uin ri c'uch. Ruma ri chicop re' nca'ka pache' c'o-ve jun quiminak. 29Y antok k'axnak chic ri sufrimiento richin ri tiempo re', ri k'ij man chic xtitzu'n ta, y ri ic' man xtuya' ta chic rusakil. Ri estrellas (ch'umil) xca'tzak-pa chicaj. Can nojiel c'a ri ic'o chicaj xca'silos. 30Entonces ri chicaj xtik'alajin ri ru-señal ri Xtak-pa chicaj chi xalax chi'icajol. Y quinojiel vinak ri ic'o choch-ulief xca'uok' antok xtiquitz'at chi jaja' ri nika-pa chupan mukul ri chicaj, riq'uin namalaj poder y namalaj ruk'ij. 31Y ri trompeta xtik'ajan cof, y xca'rutak ri ru-ángeles chi nca'quimol ri i-rucho'n chic. Can xca'quimol quinojiel ri ic'o oriente, ri ic'o occidente, ri ic'o norte y ri ic'o sur. Can xca'quimol quinojiel ri i-rucho'n chic; chica-na lugar ri roch-ulief ic'o-ve. 32Chirij ri víquix tivatamaj ri parábola (c'amb'al-tzij): Antok nca'jotoyin-pa ri ruk'a' y nca'iel-pa ri ruxak, ivata'n chi ri ru-tiempo ri sak'ij ya nalka. 33Y quire' je' antok xtitz'at chi nca'b'anataj nojiel ri xin'ej, tivatamaj c'a chi ya nalka ri k'ij re'. Can cierca chic c'o-ve-pa. 34Can ketzij ni'ej chiva, chi nojiel re' xtib'anataj antok ri vinak richin ri tiempo vacame c'a ic'o ri choch-ulief. 35Ri roch-ulief y ri rocaj can xca'q'uis. Pero ri nuch'ab'al man xtiq'uis ta quire', xa can xtib'anataj ri nu'ej. 36Pero ri k'ij y ri huora antok xtipa chic, man jun ta'mayuon. Ni xa ta ri ángeles ri ic'o chicaj man cata'n ta jampe'. Xa jo'c ri Nata' Dios ta'mayuon re'. 37Can inche'l xb'anataj pa ru-tiempo ri Noé, can quire' je' xtib'anataj antok xtipa chic ri Xtak-pa chicaj chi xalax chi'icajol. 38Ruma pa ru-tiempo ri Noé, antok c'a maja' tika ri diluvio; ri vinak xa b'anak cánima chirij ri chica niquitej y ri chica niquikun, nca'c'ulie' y nca'yo'x chi nca'c'ulie', y c'a quire' niqui'an chupan ri k'ij antok ri Noé xuoc chupan ri arca (ri inche'l jun nem barco). 39Y ri vinak man xi'ka ta pa quive' (man xqui'an ta entender) c'aja' antok xpa c'a ri diluvio, y ri ya' xa'rumuk quinojiel. Y quire' xtib'anataj antok xtipa chic ri Xtak-pa chicaj chi xalax chi'icajol. 40Ri k'ij re', ic'o ica'ye' achi'a' ri junan nca'samaj pan avan, jun xtuc'uax y ri jun chic xtic'ujie' can. 41Ic'o ica'ye' ixoki' ri junan nca'que'n, jun xtuc'uax y ri jun chic xtic'ujie' can. 42Rumare', man timastaj chiva chi ntivoyo'iej-apa, ruma man ivata'n ta ri chica huora xtipa ri Ivajaf. 43Pero tivatamaj c'a, xa ta ri rajaf-jay nuna'iej ri chica huora nalka ri alak'uon pa rachuoch, nic'asie' chi nuchajij ri rachuoch, y man nuya' ta lugar cha ri alak'uon chi ntuoc-oc chi nalak'-el. 44Rumare', ixre' quixc'ujie' preparados, ruma xtipa chic ri Xtak-pa chicaj chi xalax chi'icajol antok xa man ja ta re' nti'an pensar. 45Can xtib'anataj inche'l ri nib'anataj riq'uin jun rajaf-jay, jaja' xuya' can jun siervo ri choj y c'o runo'j pa quive' ri ic'o pa rachuoch, chi nuya' nojiel ri nic'atzin chica chi niquitej antok nalka ri huora. 46Can ja'al tiquicuot ri siervo re' antok nal'ilitaj ruma ri rajaf najin riq'uin ri samaj ri b'e'n can cha. 47Can ketzij ni'ej chiva, chi ri rajaf can xtuya' paro' nojiel ri c'o riq'uin, chi nu'on cuenta. 48Pero xa ta ri siervo re' nu'on-ka itziel, y nu'ej-ka pa ránima: Ri vajaf xa man nipa ta yan, nicha-ka; 49y nutz'om quich'ayic ri nic'aj chic siervos, y ruyuon va'en nu'on y nikumun quiq'uin ri k'ab'arala', 50y jare' nca'ru'on antok ri rajaf xtalka chupan jun k'ij y jun huora antok jaja' man royo'ien ta y man rata'n ta, 51ri rajaf can xtuya' jun nem castigo cha ri siervo re', y xtuya' quiq'uin ri xa ca'ye' quipalaj. Y chire' xa ok'iej xtu'on y can xtuk'ach'ach'iej roray.

will be added

X\