San Mateo 23

1Y ri Jesús xch'o' chiquivach ri vinak y chiquivach ri ru-discípulos, jaja' xu'ej c'a: 2Pa ruc'axiel ri Moisés, ic'o can ri achi'a' escribas y ri achi'a' fariseos. 3Rumare', ixre' can tinimaj quitzij y tib'ana' nojiel ri niqui'ej chiva. Pero man ti'an inche'l ri niqui'an ijeje', ruma ijeje' xa man niqui'an ta ri niqui'ej. 4Ijeje' nima'k tak aka'n niquiya' chiquij ri vinak, ri altíra calal y can cuesta nca'c'uax. Ri aka'n re' jo'c chiquij ri vinak niquiya-ve, pero ijeje' man niquisiluoj ta ni xa ta cha jun ruve-quik'a'. 5Nojiel ri niqui'an ijeje', jo'c chi ca'tz'iet y ca'na'ax cuma ri vinak chi ja ri otz ri niqui'an. Y can nika chiquivach nitz'ib'as jujun versículo ri ruch'ab'al ri Dios choch jun tz'un y niquiya' chupan jun chic tz'un, y can nem niqui'an cha y niquic'uaj chirij ri quik'a' y chi'quivach. Y más nima'k niqui'an cha ri ru-fleco ruchi' ri quitziak. 6Can ja ri na'ay tak ch'acat nicajo' pa tak va'en y pa tak sinagogas. 7Can altíra nika chiquivach chi nca'an saludar ri pache' niquimol-ve-qui' q'uiy vinak. Y can altíra nika chiquivach chi ni'e'x chica cuma ri vinak: Rabí, Rabí. 8Pero ixre' man tivajo' chi ni'e'x Rabí chiva, ruma xa jo'c Jun ri otz ni'e'x Maestro cha, y re' ja ri Cristo. Y ixvonojiel ixre' xa hermanos-ivi'. 9Y man c'a ti'ej katata' cha jun vinak ri vave' choch-ulief chi ntiya' ruk'ij. Ruma ri Katata' jo'c Jun, y re' ja ri Katata' ri c'o chicaj. 10Ni man tiya' lugar chi ri vinak niqui'ej maestros chiva. Ruma xa jo'c Jun ri Maestro c'o y re' ja ri Cristo. 11Ruma ri c'o más ruk'ij chi'icajol ixre', nic'atzin chi nquixru'on servir. 12Ruma ri niquina' chi can c'o quik'ij, xa xtikasas quik'ij. Pero ri niquina' chi manak-oc quik'ij, xtiyo'x quik'ij. 13¡Juye' ivach ixre' achi'a' escribas y ixre' achi'a' fariseos, ri xa ca'ye' ipalaj! ruma ik'atuon quib'iey ri vinak chi man nca'uoc ta chupan ri reino ri c'o chicaj. Man nquixuoc ta ixre' y man ntiya' ta je' lugar chica ri vinak. 14¡Juye' ivach ixre' achi'a' escribas y ixre' achi'a' fariseos, ri xa ca'ye' ipalaj! Ruma ixre' can ntimaj nojiel kax quichin ri malca'n-ixoki', y chi tinimax chi ja'al ic'aslien, can nquixlayuj nti'an orar. Y rumare' más nem ri castigo ri xtika pan ive'. 15¡Juye' ivach ixre' achi'a' escribas y ixre' achi'a' fariseos, ri xa ca'ye' ipalaj! Ruma ixre' can nquix'a paro' mar y can nquix'in choch ri roch-ulief chi nqui'canuj vinak chi nca'a chivij, y niquinimaj ri ntinimaj ixre'. Pero antok iviluon chic, man otz ta nti'an chica; ruma ri ntic'ut chiquivach, can nti'an chica chi niquiya' can ri Dios, can nti'an chica chi ca'mul más i-richin ri infierno que chivach ixre'. 16¡Juye' ivach ixre' ri nquix'e'n chi ix uc'uay-b'ay y xa ix muoy! Ixre' ri nquix'e'n: Xa c'o jun ri nu'on jurar pa rub'e' ri templo, mesque man nu'on ta ri ru'e'n, can man jun ruch'o'j. Pero ri nu'on jurar pa rub'e' ri oro ri c'o pa templo, can tub'ana' ri ru'e'n. 17Ixre' can ix-nacanak y ix muoy je', ruma ¿chica ri más c'o ruk'ij? ¿Ja came ri oro ri c'o pa templo o ja ri templo ri nib'ano santificar ri oro ri c'o chire'? 18Ixre' nti'ej je': Ri nu'on jurar pa rub'e' ri altar, mesque man nu'on ta ri ru'e'n, man jun ruch'o'j. Pero ri nu'on jurar pa rub'e' ri sipan can choch ri altar, can tub'ana' ri ru'e'n. 19Can ix-nacanak y can ix muoy, ruma ¿chica ri más c'o ruk'ij? ¿Ja came ri sipan ri c'o choch ri ru-altar ri Dios o ja ri altar ri nib'ano santificar ri sipan? 20Ri nu'on jurar pa rub'e' ri altar, xa man jo'c ta pa rub'e' ri altar nu'on-ve jurar. Xa can pa rub'e' je' ri sipan ri c'o can choch ri altar. 21Ri nu'on jurar pa rub'e' ri templo, xa man jo'c ta pa rub'e' ri templo nu'on-ve jurar, xa can pa rub'e' ri Dios nu'on-ve je'. 22Y ri nu'on jurar pa rub'e' ri rocaj, can nu'on jurar pa rub'e' ri ru-trono ri Dios y pa rub'e' ri Dios, ruma jaja' tz'uyul chire'. 23¡Juye' ivach ixre' achi'a' escribas y ixre' achi'a' fariseos, ri xa ca'ye' ipalaj! Ixre' ntiya' ri diezmo richin ri alvaviena, ri anís y ri comino, pero iyo'n can ri más nic'atzin ri nu'ej chupan ri ley, chi choj tib'ana' quiq'uin ri vinak, tijoyovaj quivach y can ticukub'a' ic'u'x riq'uin ri Dios. Jare' ri más nic'atzin chi nti'an, después tiya' ri i-diezmo. 24Ixre' nquix'e'n chi ix uc'uay-b'ay, pero xa ix muoy, ruma xa ntichayuj can ri us y xa ntib'ak' ri camello. 25¡Can juye' ivach ixre' achi'a' escribas y ixre' achi'a' fariseos, ri xa ca'ye' ipalaj! Ruma ixre' ix inche'l ri vaso y ri plato ri ja'al ch'ajuon quij, pero ri quipan xa tz'il. Ri ivánima xa nojnak riq'uin alak', y xa b'anak chirij ri c'o quiq'uin ri vinak. 26¡Ixre' achi'a' fariseos xa ix muoy! Can tib'ana' cha ri ic'aslien inche'l ri vaso y ri plato ri can sak rij y ri rupan je'. Tich'aja' ri ivánima chi quire' ri ic'aslien xtiel sak. 27¡Juye' ivach ixre' achi'a' escribas y ixre' achi'a' fariseos, ri xa ca'ye' ipalaj! Ruma xa ix junan riq'uin ri panteón ri rij sak-sak, pero ri rupan man quire' ta; xa ruyuon k'aynak c'o chupan, xa ruyuon rub'akil quiminak. 28Can ix quire' ixre'. Ruma ixre' can ntic'ut chi choj ri ic'aslien chiquivach ri vinak, pero ri ivánima xa man quire' ta choch ri Dios. Ri ivánima xa nojnak riq'uin itziel tak kax. Y can ca'ye' je' ipalaj. 29¡Juye' ivach ixre' achi'a' escribas y ixre' achi'a' fariseos, ri xa ca'ye' ipalaj! Ruma nqui'chojmij ri panteones ri pache' i-mukun-ve ri profetas ri xa'c'ujie' ojier can tiempo. Ixre' can ja'al nca'ivak pache' i-mukun-ve ri utzulaj tak vinak ri choj quic'aslien choch ri Dios. 30Y ixre' nti'ej: Xa ta ojre' xojc'ujie' pa qui-tiempo ri kate't-kamama', ojre' man ta xa'kato' antok xa'quiquimisaj ri profetas. 31Pero xa man ketzij ta ri nti'ej, ruma xa iyuon ixre' ntic'ut-ivi' chi ix junan quiq'uin ri ivate't-imama' ri xa'quimisan quichin ri profetas ri xa'c'ujie' ojier can tiempo. 32¡Tiq'uisa' c'a rub'anic ri xquitanab'a' can ri ivate't-imama'! 33¡Ixre' xa ix inche'l cumatz! Can man jun manera nquixtiquir nticol-ivi' choch ri infierno, xa c'a chire' xquixb'aka-ve. 34Rumare' inre' nca'ntak profetas, achi'a' ri altíra quino'j y achi'a' i-maestros. Pero ic'o chiquivach ri xqui'b'ajij choch cruz, y ic'o ri xqui'quimisaj. Ic'o xqui'ch'ey pa tak i-sinagogas; y chica-na tanamet nca'a-ve ijeje', ixre' je' xquixb'aka chire' chi nqui'tarariej. 35Y ruma quire' xti'an, ixre' nquixakan quicamic quinojiel ri choj tak vinak ri i-quimisan; ri xtiquir-pa riq'uin ri rucamic ri choj ache Abel, c'a riq'uin ri rucamic ri Zacarías, ri ruc'ajuol ri ache Berequías. Ri Zacarías ri xquimisas chucajol ri templo y ri altar. 36Ri xin'ej chiva, can ketzij chi nojiel c'a ri camic re' xtika pa quive' ri vinak ri ic'o chupan ri tiempo vacame. 37Ri Jesús xu'ej chiquij ri vinak ri ic'o Jerusalén: Aj-Jerusalén, aj-Jerusalén, ¿karruma nqui'quimisaj ri profetas? ¿Karruma nqui'quimisaj cha ab'aj ri nca'rutak-pa ri Dios chi'icajol? Inche'l jun quitie-ac' nca'rumol ri ch'itak ral chuxie' ri ruxic', inre' q'uiy mul xinvajo' xixmol ta viq'uin, pero ixre' man xivajo' ta. 38Vacame ri ivachuoch xtic'ujie' can abandonado. 39Y ketzij ni'ej chiva chi man xquinitz'at ta chic, hasta c'a chupan ri k'ij antok xti'ej: ¡Bendito ri patanak pa rub'e' ri Ajaf Dios! xcha' ri Jesús.

will be added

X\