San Mateo 22

1Y ri Jesús xch'o' chic chica ri vinak, y xa'rucusaj nic'aj chic parábolas (c'amb'al-tzij). Jaja' xu'ej: 2Ri reino ri c'o chicaj can junan riq'uin jun namak'ej ri xu'on jun rey antok xc'ulie' ri ruc'ajuol. 3Y xa'rutak-el ri ru-siervos chi xa'b'acayuoj quinojiel ri i-rub'anun invitar richin ri c'ulub'ic. Pero ri i-b'anun invitar xqui'ej-pa chi man nca'pa ta. 4Y ri rey xa'rutak chic el nic'aj ru-siervos y xu'ej-el chica: Ti'ej chica quinojiel ri i-nub'anun invitar, chi nojiel c'o chic listo chi nkuva'. Ri nu-tuora y ri nic'aj chic vavaj ri i-ti'uoj chi nca'c'atzin chupan ri k'ij va, ya xa'quimisas. Can nojiel c'o chic, quixam-pa ri pa c'ulub'ic, quixcha' chica. 5Pero ri i-b'anun invitar, man xa'niman ta chi xa'pa. Ic'o xa'a pan avan, y ic'o xa'b'ac'ayin y xa'b'alak'o'. 6Y ri nic'aj chic, xa xa'quitz'om ri siervos ri i-rutakuon-el ri rey y xa'quiquimisaj; ruma chiquivach ijeje' ri siervos re' xa man jun quikalien. 7Antok xra'xaj ri rey ri xb'anataj, xyacataj royoval. Rumare' xa'rutak ru-soldados chiquij chi xa'ruq'uis ri aj-quimisaniel, y chi xparox je' ri quitanamit. 8C'ajare' ri rey xch'o' chic chica ri ru-siervos y xu'ej: Can ketzij chi nojiel c'o chic chi ni'an ri c'ulub'ic, pero ri xa'n'an invitar man nca'ruc'ul ta chi xa'lka. 9Quix'in pa tak b'ay ri nca'iel-el pa tanamet, qui'ivayuoj-pa quinojiel ri xqui'vil chi nca'pa chupan ri c'ulub'ic va, xcha' chica. 10Y antok ri siervos xa'a pa tak b'ay, xa'cayuoj-pa chica-na vinak, ri otz y ri man otz ta quic'aslien. Y ri jay pache' x'an-ve ri c'ulub'ic, xnuoj. 11Y ri rey xuoc chi xa'rutz'at quinojiel ri xa'rayuoj. Y jaja' xutz'at chi c'o jun ache chire' ri man rucusan ta ri tziak ri nicusas chupan ri c'ulub'ic. 12Ri rey xuc'utuj cha ri ache re': Amigo, ¿che'l xatuoc-pa vave', ruma man ja ta ri tziak ri nicusas chupan ri c'ulub'ic acusan? xcha' ri rey cha. Y ri ache manak kax xu'ej. 13Y jare' antok ri rey xu'ej chica ri ru-siervos: Tixima-el ruk'a-rakan ri jun ache ri man rucusan ta ri tziak richin ri c'ulub'ic, tivalasaj-el y tic'aka' pa k'aku'n. Chire' xa xtituok' y xtuk'ach'ach'iej roray. 14Y mesque iq'uiy ri nca'yox, man quinojiel ta xca'cho'x, xcha' ri Jesús. 15Y ri achi'a' fariseos xa'a; y xqui'ej chiquivach chi chica manera niqui'an cha ri Jesús chi nitzak pa quik'a' riq'uin ri nu'ej. 16Y ijeje' xa'quitak qui-discípulos y nic'aj ruvinak ri rey Herodes riq'uin ri Jesús; y antok xa'b'aka, xqui'ej cha: Maestro, ojre' kata'n chi jo'c ri ketzij ri nika chavach y nac'ut ri ruch'ab'al ri Dios y can ja-ve rub'ixic na'an cha, ruma atre' man naxi'ij ta avi' choch jun vinak mesque altíra ruk'ij. 17Ojre' vacame nakajo' nakaxaj ri chica xta'ej: ¿Otz nakatoj ri impuestos ri nu'ej ri rey César, o xa man otz ta? xa'cha' cha. 18Pero ri Jesús can rata'n ri man otz ta ri niqui'an pensar chirij, rumare' jaja' xu'ej chica: Ixre' xa ca'ye' ipalaj. ¿Karruma nquini'an tentar? 19Tic'utu-pa ri moneda ri nicusas chi nituoj ri impuestos, xcha' chica. Y ijeje' xquic'ut-apa jun denario choch. 20Y jaja' xuc'utuj chica: ¿Choj palaj y choj b'e' ri c'o choch? xcha' chica. 21Y ijeje' xqui'ej cha: Richin ri rey César, xa'cha' cha. Y ri Jesús xu'ej chica: Tiya' c'a cha ri César ri can richin ri César, y tiya' cha ri Dios ri can richin ri Dios, xcha' ri Jesús chica. 22Y antok ri achi'a' re' xca'xaj ri xu'ej ri Jesús, can vor chica xquina'. Y rumare' ijeje' xquiya' can ri Jesús y xa'a. 23Y ri k'ij re' ic'o achi'a' saduceos xa'lka riq'uin ri Jesús. Ri achi'a' re' man niquinimaj ta chi ri quiminaki' can xca'c'astaj-pa, y rumare' ijeje' xquic'utuj cha ri Jesús: 24Maestro, ri Moisés rutz'ib'an can chika: Xa c'o jun ache nicon-el y xa man jun ralc'ual nic'ujie' can, jun ruchak' o runimal tic'ulie' riq'uin ri raxjayil, richin quire' nca'c'ujie' ralc'ual ri quiminak chic el. 25Y ijeje' xqui'ej c'a: Xa'c'ujie' i-siete (ivuku') ri quichak'-quinimal-qui' chikacajol ojre'. Ri na'ay xc'ulie', pero xcon-el y man jun ralc'ual xc'ujie' can. Ri raxjayil xc'ulie' chic riq'uin jun ruchak' ri ache ri xcon-el choch. 26Ri ruca'n, can quire' je' mismo xu'on, jaja' xcon-el y man jun ralc'ual xc'ujie' can. Ri ruox, can quire' je' mismo xu'on. Y quire' xqui'an-el ri i-siete (ivuku') ri quichak'-quinimal-qui'. 27Y antok i-quiminak chic el ri i-siete (ivuku') ri quichak'-quinimal-qui', después xcon je' ri ixok. 28Y ri achi'a' saduceos xquic'utuj cha ri Jesús: Antok xtalka ri k'ij chi xca'c'astaj-pa ri quiminaki', ¿choj axjayil xtuoc ri ixok re'? Ruma ri i-siete (ivuku') ri quichak'-quinimal-qui' xuoc caxjayil, xa'cha' cha. 29Entonces ri Jesús xu'ej chica: Ixre' xa ix-sachnak riq'uin ri xi'ej. Man ivata'n ta ri nu'ej ri ruch'ab'al ri Dios. Y man ivata'n ta je' ri ru-poder ri Dios. 30Ruma antok xtalka ri k'ij chi ri quiminaki' xca'c'astaj-el, man xca'c'ulie' ta chic, ni man xca'yo'x ta chi xca'c'ulie'. Ijeje' xa xca'uoc inche'l ri ru-ángeles ri Dios ri ic'o chicaj. 31Pero riq'uin ri quiminaki' ri xca'c'astaj-pa, ¿man itz'atuon ta c'a ri ruch'ab'al ri Dios ri yo'n can pan ik'a'? Chire' ri Dios nu'ej: 32Inre' in Ru-Dios ri Abraham, in Ru-Dios ri Isaac y in Ru-Dios ri Jacob. Quire' xu'ej ri Dios ojier can. Ri Dios man Qui-Dios ta ri quiminaki', xa Qui-Dios ri ic'as, xcha' ri Jesús. 33Y antok ri vinak caxan chic ri tzij ri xuc'ut ri Jesús, can vor chica xquina', ruma man jun b'ay caxan quire'. 34Y ri achi'a' fariseos can cha'nin xquimol-qui' chi niqui'an pensar ri chica xtiqui'an, ruma xca'xaj chi ri Jesús can xutz'apij quichi' ri achi'a' saduceos riq'uin ri xu'ej. 35Xpa jun chiquivach ri maestros richin ri ley, jo'c chi nu'on tentar ri Jesús, xuc'utuj cha: 36Maestro, ¿chica chiquivach ri mandamientos ri xuya' ri Dios cha ri Moisés, ri más nem? 37Y ri Jesús xu'ej cha: Can tavajo' ri Avajaf Dios, tavajo' riq'uin nojiel avánima, tavajo' riq'uin nojiel ri ac'aslien y tavajo' je' riq'uin nojiel ri ano'j. 38Jare' ri na'ay y más nem mandamiento. 39Y c'o chic jun ruca'n mandamiento ri casi junan riq'uin ri na'ay. Y ri mandamiento re' nu'ej: Can inche'l ri navajo-ka-avi' atre', can quire' je' mismo tavajo' ri a-prójimo. 40Ri ca'ye' mandamientos re' jare' ruc'u'x nojiel ri ley ri xuya' ri Dios cha ri Moisés y nojiel ri qui'e'n can ri profetas ri xa'c'ujie' ojier can tiempo, xcha' ri Jesús. 41Y antok c'a quimaluon-qui' ri achi'a' fariseos, xpa ri Jesús xuc'utuj chica: 42¿Chica nti'an pensar ixre' chirij ri Cristo? ¿Choj ralc'ual jaja'? Y ri achi'a' fariseos xqui'ej: Ralc'ual ri rey David, xa'cha'. 43Y ri Jesús xu'ej chica: ¿Pero karruma ri rey David xu'ej Vajaf cha ri Cristo? Ruma ja ri Espíritu Santo ri x'e'n cha, y rumare' xu'ej: 44Ri Ajaf Dios xu'ej cha ri Vajaf: Catz'uye' pa nu-derecha, hasta c'a xca'nya' ri av-enemigos chuxie' avakan. Quire' xu'ej. 45Y xa ri rey David xu'ej Vajaf cha ri Cristo, ¿karruma ni'e'x chi ri Cristo xa choj jun rumáma can ri rey David? xcha' ri Jesús. 46Y man jun chic c'a x'e'n-apa jun tzij cha ri Jesús chirij ri xuc'utuj chica. Can ja k'ij re' antok man jun chic xutz'om rucovil chi c'o ta ri chica xuc'utuj más cha ri Jesús.

will be added

X\