San Mateo 21

1Y antok ri Jesús y ri ru-discípulos y ri nic'aj chic vinak ri i-b'anak quiq'uin ya xa'b'aka Betfagé, ri c'o choch ri juyu' Olivos, ri c'o cierca ri tanamet Jerusalén, ri Jesús xa'rutak-el ica'ye' ru-discípulos, 2y xu'ej-el chica: Quix'in chupan la aldea la y xtivil jun alaj burro c'o riq'uin ri rutie' ri ximil. Tiquira-pa ri rutie' y qui'c'ama-pa viq'uin. 3Y xa c'o jun ri c'o chica ri xtu'ej-pa chiva, ti'ej cha: Nic'atzin cha ri Ajaf, pero cha'nin xca'lrujacha' chic, quixcha' can cha, xcha-el ri Jesús chica. 4Riq'uin re' nu'on cumplir inche'l ri tz'ib'an can ruma ri jun profeta ri xc'ujie' ojier can tiempo. Ri rutz'ib'an can jaja', nu'ej: 5Ti'ej chica ri vinak ri ic'o pa tanamet Sion: Ri I-Rey ja patanak iviq'uin. Can manak-oc ruk'ij rub'anun-pa, ch'acol-pa chirij jun alaj burro. Ri alaj burro ral jun chicop richin aka'n. Quire' ri tz'ib'an can. 6Y ri ica'ye' discípulos xa'a, y xqui'an ri e'n-el chica ruma ri Jesús. 7Y xa'quic'am-pa ri burro y ri ral riq'uin ri Jesús, y ri discípulos xquiya-el ri qui-manta chiquij, y xch'oquie-el ri Jesús chirij. 8Y can iq'uiy ri vinak ri niquilic' qui-manta pa rub'iey. Y nic'aj chic vinak xiquima-pa ch'itak ruk'a' chie' chi xquiya' pa rub'iey. 9Y ri vinak ri i-b'anak choch ri Jesús y ri ic'o can chirij, can riq'uin nojiel quichuk'a' niqui'ej: ¡Tiox b'a' chi patanak ri Rumáma can ri rey David! ¡Bendito ri patanak pa rub'e' ri Ajaf Dios! ¡Tiox b'a' cha ri Dios ri c'o chicaj! nca'cha'. 10Y antok ri Jesús xuoc pa tanamet Jerusalén, ri vinak ri ic'o chire' xquimol-qui' cha'nin chi niquitz'at. Y ri vinak re' niqui'ej: ¿Chica c'a ache la? nca'cha'. 11Y ic'o ri xa'e'n: La ja ri Jesús, ri profeta, ri rutanamit Nazaret, ri c'o Galilea, nca'cha'. 12Y ri Jesús xuoc pa ru-templo ri Dios ri c'o pa tanamet Jerusalén. Y xa'rutarariej-el quinojiel ri nca'c'ayin y ri nca'lak'o chire'. Y xupajq'uij can ri qui-mesas ri niquic'ax miera. Y quire' je' xu'on cha ri quich'acat ri niquic'ayij paluomix. 13Ri Jesús xu'ej chica ri vinak re': Chupan ri ruch'ab'al ri Dios ri tz'ib'an can nu'ej: Ri vachuoch, jay richin oración; pero ixre' xa ib'anun cachuoch alak'oma' cha, xcha' ri Jesús chica. 14Y antok ri Jesús c'o pa templo, ic'o muoy y ic'o nca'jacajot xa'lka riq'uin y jaja' xa'ru'on-el sanar. 15Pero ri principales sacerdotes y ri achi'a' escribas xpa quiyoval, ruma ri Jesús q'uiy milagros ri nca'ru'on, y ruma je' ri ac'ola' riq'uin quichuk'a' niqui'ej chire' pa templo: ¡Tiox b'a' chi xalka ri Rumáma can ri rey David! nca'cha'. 16Y xqui'ej cha ri Jesús: ¿Navaxaj ri niqui'ej ri ac'ola'? Y ri Jesús xu'ej chica ri achi'a' re': Niva'xaj. Y ixre', ¿man itz'atuon ta c'a chupan ri ruch'ab'al ri Dios ri nu'ej: Ri can ketzij nca'yo'n ruk'ij ri Dios ja ri ac'ola' y ri c'a nca'tz'uman? Quire' nu'ej ri ruch'ab'al ri Dios, xcha' ri Jesús chica. 17Y ri Jesús xa'ruya' can chire' ri achi'a' re'. Jaja' xiel-el pa tanamet Jerusalén y x'a chupan ri aldea Betania. Chire' x'a-ve chi xuk'asaj ri ak'a' re'. 18Y ri mac'ajan chuca'n k'ij, antok rutz'amuon b'ay chi nitzalaj pa tanamet Jerusalén, ri Jesús xnem-pa rupan. 19Y jaja' xutz'at jun mata víquix cierca ri b'ay. X'a-apa chuxie' chi xirucanuj roch, pero xa man jun roch c'o, xa ruyuon ruxak. Y ri Jesús xu'ej cha ri chie': Man jun chic b'ay xtaya' avach. Y ri víquix re' can cha'nin xchakej-ka. 20Antok ri ru-discípulos xquitz'at chi xchakej-ka ri jun mata víquix, xqui'ej: ¿Che'l xu'on chi cha'nin xchakej-ka ri jun mata víquix re'? xa'cha'. 21Y ri Jesús xu'ej chica: Can ketzij ni'ej chiva chi xa ixre' can nticukub'a' ic'u'x riq'uin ri Dios y man nu'on ta ca'ye' ic'u'x, can xquixtiquir nti'an quire' cha jun mata víquix. Y hasta c'o más ri nquixtiquir nti'an. Nquixtiquir nti'ej cha la juyu' la chi tiel-el y tak'ax chupan ri mar, y can quire' xtib'anataj. 22Y nojiel ri xtic'utuj cha ri Dios chupan iv-oración, xa ntinimaj, can niyo'x chiva. 23Y antok ri Jesús c'o chic pa templo y nuc'ut chic ri ruch'ab'al ri Dios chiquivach ri vinak, ri principales sacerdotes y ri mama'a' tak achi'a' ri niqui'an gobernar chiquicajol ri vinak, xa'jiel-apa riq'uin y xquic'utuj cha: ¿Chica autoridad c'o pan ak'a' chi na'an nojiel re'? ¿Y chica xyo'n autoridad chava? xa'cha' cha. 24Ri Jesús xu'ej chica ri achi'a' re': Inre' c'o je' jun kax ri nivajo' nic'utuj chiva, y xa ixre' xti'ej-pa chuva, inre' je' xtin'ej chiva chica autoridad c'o pa nuk'a' chi ni'an nojiel re'. 25¿Ri Juan xtak-pa ruma ri Dios chi xa'ru'on bautizar ri vinak? ¿O xa achi'a' xa'e'n cha? xcha' ri Jesús. Entonces ri principales sacerdotes y ri mama'a' tak achi'a' ri niqui'an gobernar, xqui'ej-ka chiquivach: Xa naka'ej chi ri Juan ja ri Dios ri takayuon-pa richin, ri Jesús xtu'ej chika: ¿Karruma man xinimaj ta? 26Y xa naka'ej chi ja ri achi'a' xa'e'n cha ri Juan chi tub'ana' quire', man otz ta, ruma ojre' nakaxi'ij-ki' chiquivach ri vinak, ruma quinojiel cata'n chi ri Juan jun profeta, xa'cha-ka chiquivach. 27Y c'ajare' xqui'ej-apa cha ri Jesús: Ojre' man kata'n ta, xa'cha-apa. Y ri Jesús xu'ej je' chica: Inre' je' man xtin'ej ta chiva chica autoridad c'o pa nuk'a' chi nca'n'an quire', xcha' ri Jesús. 28Ri Jesús xu'ej chica ri achi'a' re': Can tib'ana' pensar otz ri xtin'ej chiva. C'o jun ache ic'o ica'ye' ruc'ojola'. Y ri quitata' xu'ej cha ri na'ay: Nuc'ajuol, ca'in vacame y cab'asamaj pache' nuticuon-ve uva, xcha' cha. 29Pero jaja' xu'ej cha ri rutata': Vacame man nivajo' ta nquib'asamaj, xcha'. Pero después xalka paro' chi man otz ta ri xu'ej, y ja x'a pa samaj. 30Y ri quitata' quire' je' xu'ej cha ri jun chic ruc'ajuol, chi tisamaj. Y ri ruc'ajuol re' xu'ej cha: Otz c'a táta, ja nqui'a, xcha'. Pero xa man x'a ta. 31Ri Jesús xuc'utuj: ¿Chica chiquivach ri ica'ye' xb'ano ri xrajo' ri quitata'? Y ri achi'a' re' xqui'ej: Ja ri na'ay, xa'cha'. Y ri Jesús xu'ej chica: Can ketzij ni'ej chiva, chi ja ri maloy-impuestos y ri rameras ri xca'uoc na'ay chivach ixre' chupan ri ru-reino ri Dios. 32Antok ri Juan el Bautista xpa, xuc'ut jun choj b'ay chivach, pero ixre' man xinimaj ta. Jo'c ri maloy-impuestos y ri rameras ri xquinimaj. Pero ixre', mesque xitz'at re', man xtzalaj ta pa ivánima riq'uin ri Dios chi xinimaj. 33Tivaxaj jun chic parábola (c'amb'al-tzij), xcha' ri Jesús chica ri vinak: Xc'ujie' jun ache tata'j; xpa jaja', xutic uva pa rulief, xuc'ajuoj rij, xu'on inche'l jun ch'iti pila chupan ri ulief chi niyitz' ri uva chupan, y xu'on je' jun torre. C'ajare' xuya' can pa kajic chica nic'aj aj-samajiel, y jaja' x'a naj. 34Y antok xalka ri tiempo richin ri cosecha, ri rajaf ri ulief xa'rutak-pa ri rusamajiel quiq'uin ri i-kajayuon ri rulief richin chi nalquima' ri uva kajb'al richin ri ulief. 35Pero ri achi'a' ri i-kajayuon ri rulief xa man xa'quic'ul ta otz ri aj-samajiel ri i-takuon-pa ruma ri rajaf ri ulief. Jun xquich'ey, jun xquic'ak cha ab'aj y jun chic xquiquimisaj. 36Ri rajaf ri ulief xa'rutak-pa nic'aj chic rusamajiel. Can más iq'uiy ri xa'rutak-pa. Pero ri achi'a' ri i-kajayuon ri ulief ja mismo xqui'an chica. 37Y pa ruq'uisb'al, ri rajaf ri ulief xutak-pa ri ruc'ajuol y xu'ej: Ri achi'a' re' can xtiqui'an respetar antok xtiquitz'at chi ja ri nuc'ajuol ri xti'ka quiq'uin, xcha'. 38Pero ri achi'a' re', antok xquitz'at chi ja ri ruc'ajuol ri rajaf ri ulief ri xalka, xqui'ej-ka chiquivach: Jare' ri xtuoc can rajaf nojiel ri ulief ri kakajuon, quixam-pa, kaquimisaj, chi quire' pa kak'a' ojre' nic'ujie' can ri ulief, xa'cha'. 39Y ja xquitz'om, y juviera ri ulief ri ticuon uva choch, xb'aquic'aka' y xquiquimisaj. 40Antok xtipa ri rajaf ri ulief ri ticuon uva choch, ¿chica came xtu'on chica ri achi'a' ri i-kajayuon ri ulief? xcha' ri Jesús. 41Y ri vinak xqui'ej: Ri rajaf ri ulief man xtujoyovaj ta quivach ri itziel tak achi'a' ri i-kajayuon, can xca'ruquimisaj; y ri rulief xtuya' chic pa kajic chica nic'aj chic aj-samajiel ri can xtiquiya' ri uva kajb'al richin ri ulief antok nalka ri tiempo, xa'cha'. 42Ri Jesús xu'ej chica: ¿Can man jun b'ay c'a itz'atuon ri tz'ib'an can chupan ri ruch'ab'al ri Dios? Ri nu'ej: Ri Ab'aj ri man xka ta chiquivach ri achi'a' ri i-b'anoy-jay, xa jare' ri xyo'x ri lugar ri más nic'atzin chi quire' ri jay man nitzak ta. Ja ri Ajaf ri xb'ano quire' cha, y ojre' man jun b'ay katz'atuon chi nib'anataj quire'. Quire' nu'ej ri ruch'ab'al ri Dios. 43Y ruma c'a re' ni'ej chiva chi ri ru-reino ri Dios xa xtalasas pan ik'a'. Xa xtiyo'x chica nic'aj chic vinak ri quic'uan jun utzulaj c'aslien choch ri Dios. 44Chica-na vinak ri xtitzak choch va Ab'aj va, can xtimulumu'. Y chica-na vinak ri xtika va Ab'aj va chirij, can xtuyitz' c'a, xcha' ri Jesús. 45Y antok ri principales sacerdotes y ri achi'a' fariseos caxan chic ri parábolas (c'amb'al-tzij) ri xa'rutzijuoj ri Jesús, can xi'ka pa quive' (xqui'an entender) chi xa chiquij ijeje' xch'o-ve. 46Y jare' antok ijeje' xcajo' ta xquitz'om yan el. Pero man xqui'an ta, ruma niquixi'ij-qui' chiquivach ri vinak; ruma chiquivach ri vinak, ri Jesús can jun profeta.

will be added

X\