San Mateo 20

1Ri reino ri c'o chicaj can junan riq'uin ri xu'on jun ache tata'j. Jaja' cumaj yan x'a chi xa'rucanuj aj-samajiel chi xa'rutak pa rulief ri ruticuon uva choch. 2Antok ri ache re' xa'ril ri aj-samajiel y antok ch'ovinak chic quiq'uin chi niquich'ec jun denario ri k'ij, c'ajare' xa'rutak-el pa rulief ri ruticuon uva choch. 3Y como a las nueve la'k ri mac'ajan re', xiel chic ri ache y xa'rutz'at pa q'uiyi'al chi ic'o ri man quiluon ta quisamaj. 4Jaja' xch'o' chica y xu'ej: Quixb'asamaj je' ixre' pa vulief ri nuticuon uva choch, y inre' xtinya' otz ivajal, xcha' chica. Y ri aj-samajiel re' can xa'a. 5Ri rajaf ri ulief, xiel chic jun b'ay como pa nic'aj-k'ij, y quire' je' xu'on como a las tres ri nakak'ij. Jaja' xa'rutak chic el nic'aj aj-samajiel pa rusamaj, y xu'ej chica chi can xtuya' otz cajal. 6Y como a las cinco ri nakak'ij, jaja' xiel chic el jun b'ay y xa'b'arila' nic'aj chic, y xu'ej chica: ¿Karruma ixre' man iviluon ta isamaj y choj xixc'ujie' jun k'ij vave'? xcha' chica. 7Y ri aj-samajiel re' xqui'ej cha: Man jun xyo'n kasamaj. Y ri rajaf ri ulief xu'ej chica: Quixb'asamaj je' ixre' pa vulief ri nuticuon uva choch, y xtinya' otz ivajal, xcha' chica. 8Antok xka-ka ri k'ij, xpa ri rajaf ri ulief, xu'ej cha ri uc'uay quichin ri samajiel: Ca'vayuoj-pa quinojiel ri aj-samajiel y tatajo-el ri quik'ij. Na'ay ca'tajo' ri aj-samajiel ri xa'lka tarde, y después ca'tajo' ri xa'lka na'ay, xcha'. 9Antok ri aj-samajiel ri xa'uoc pa samaj como a las cinco ri nakak'ij, xa'lka chi nca'tuoj; xa'tuoj jun denario. 10Y antok xa'lka ri aj-samajiel ri xa'uoc pa samaj na'ay chi nca'tuoj; xqui'an pensar chi más q'uiy ri xtiyo'x chica. Pero antok xa'tuoj, xa jun denario oc ri xyo'x chica. 11Antok xquitz'at chi junan ri xyo'x chica, xquich'ojij ri cajal cha ri ache tata'j. 12Ri aj-samajiel re' xqui'ej: Ri samajiel ri xa'uoc pa samaj tarde, xa jun huora-oc xa'samaj, y can junan xa'an chica kiq'uin ojre', y ojre' jun k'ij ri xojsamaj y xojc'ujie' chuxie' ruk'ak'al ri k'ij, xa'cha'. 13Y ri rajaf samaj xu'ej cha jun: Xa junan xa'ntoj ri nic'aj chic samajiel, man jun itziel kax xin'an chava atre'. Ruma quire' xka'ej aviq'uin chi jun denario niya' chava. 14Tavuc'uaj ri avajal y ca'in. Y chica ri samajiel ri xa'uoc pa samaj tarde, can pa vánima inre' xalax-pa chi xinya' ri cajal inche'l ri avajal atre'. 15Ruma nojiel ri c'o viq'uin inre', can pa nuk'a' inre' c'o-ve richin ni'an chica-na ri nivajo' ni'an cha. ¿O itziel nquinatz'at ruma ni'an ri otz? xcha'. 16Quire' c'a ri ic'o nab'ayal xca'c'ujie' c'a pa ruq'uisb'al. Y ri ic'o pa ruq'uisb'al xca'c'ujie' nab'ayal. Y mesque iq'uiy ri nca'yox, pero man quinojiel ta xca'cho'x chi nic'ujie' quik'ij. Quire' xu'ej ri Jesús. 17Ri Jesús y ri i-doce (cab'alajuj) ru-discípulos y ri nic'aj chic vinak ri i-b'anak quiq'uin, quitz'amuon-el b'ay chi nca'a pa tanamet Jerusalén. Y jare' antok ri Jesús xa'ruc'uaj aparte ri ru-discípulos y xu'ej chica: 18Ixre' ivata'n chi c'a pa tanamet Jerusalén nku'a-ve-el, y chire' xtijach-ve ri Xtak-pa chicaj chi xalax chi'icajol pa quik'a' ri principales sacerdotes y pa quik'a' ri achi'a' escribas. Y ijeje' xtiqui'ej chi tiquimisas. 19Y xtiquijach pa quik'a' ri vinak ri man israelitas ta. Y ri vinak re' xca'tze'n chirij, xtiquich'ey y c'ajare' xtiquib'ajij choch cruz. Pero chi oxe' k'ij xtic'astaj-pa chiquicajol ri quiminaki', xcha' chica. 20Y ri quitie' ri ica'ye' discípulos ri i-ruc'ajuol ri Zebedeo, xjiel-apa riq'uin ri Jesús i-rach'il ri ral. Y ri quitie' xxuquie-ka choch ri Jesús chi nuc'utuj jun favor cha. 21Ri Jesús xu'ej cha ri quitie': ¿Chica ri navajo'? xcha' cha. Y ri ixok xu'ej cha ri Jesús: Tab'ana' chi ri ica'ye' val re' xca'tz'uye' ta apa aviq'uin chupan ri a-reino; jun ta nic'ujie' pan a-derecha y jun ta pan av-izquierda. 22Pero ri Jesús xu'ej: Ixre' man ivata'n ta chica ri ntic'utuj. ¿Nticoch' came ixre' inche'l ri xti'an chuva inre'? ¿Y nticoch' came ixre' ri sufrimiento ri xtink'asaj inre'? Y ri ica'ye' discípulos re' xqui'ej: Nakacoch', xa'cha'. 23Y ri Jesús xu'ej chic chica: Can ketzij chi ixre' xticoch' ri inche'l xti'an chuva inre'. Can xticoch' je' ri sufrimiento ri xtink'asaj inre'. Pero ri ntic'utuj ixre', chi jun nitz'uye' pa nu-derecha y ri jun chic pa nu-izquierda, re' man pa nuk'a' ta inre' c'o-ve chi niya' chiva. Ja ri Nata' ri ru'e'n choj chica xtuya-ve chi nca'tz'uye' chire'. 24Y antok ri i-diez (lajuj) chic discípulos xca'xaj ri x'e'x, xpa quiyoval chica ri ica'ye' discípulos ri quichak'-quinimal-qui'. 25Pero ri Jesús xa'rayuoj ri ru-discípulos y xu'ej chica: Ixre' ja'al ivata'n chi vave' ri choch-ulief, ri nca'b'ano gobernar, ruma ic'o ri vinak pa quik'a', rumare' niquina' chi ijeje' ri i-cajaf. Y quire' je' ri principales, nicajo' chi ca'nimax y can ti'an nojiel ri niqui'ej. 26Pero chi'icajol ixre' man quire' ta. Ruma xa c'o jun ri nrajo' nu'on nem chi'icajol ixre', nic'atzin chi nquixru'on servir. 27Xa jun chivach ixre' nrajo' chi jaja' ri na'ay, can quixrub'ana' servir. 28Can tub'ana' inche'l nu'on ri Xtak-pa chicaj chi xalax chi'icajol. Jaja' man xpa ta chi ni'an servir, sino chi nu'on servir, y chi nuya' ruc'aslien chi quire' iq'uiy ri nca'colotaj, xcha' ri Jesús. 29Antok ri Jesús y ri ru-discípulos ja nca'iel-el chupan ri tanamet Jericó, altíra iq'uiy vinak ri xa'a chirij. 30Ic'o ica'ye' muoy i-tz'uyul chuchi' ri b'ay, y antok xca'xaj chi ri Jesús nak'ax chire', ijeje' riq'uin quichuk'a' xa'ch'o' y xqui'ej: ¡Ajaf, ri at Rumáma can ri rey David, tajoyovaj kavach! xa'cha'. 31Y ri vinak xa'quich'olij chi man chic ca'ch'o-pa, pero ijeje' xa riq'uin más quichuk'a' xa'ch'o-pa y xqui'ej: ¡Ajaf, ri at Rumáma can ri rey David, tajoyovaj kavach! xa'cha'. 32Y ri Jesús xa'ra'xaj, rumare' xpi'ie-ka, xa'rayuoj y xu'ej chica: ¿Chica ntivajo' chi ni'an? xcha' chica. 33Ijeje' xqui'ej cha ri Jesús: Ajaf, ojre' nakajo' nkutzu'n, xa'cha'. 34Ri Jesús ruma altíra xujoyovaj quivach ri ica'ye' muoy, ja xutz'om-apa ri quinak'avach. Y ijeje' ja xa'tzu'n, y xa'a chirij ri Jesús.

will be added

X\