San Mateo 2

1Ri Jesús xalax pa tanamet Belén, ri c'o chupan Judea. Antok xalax ri Jesús, ja ri Herodes ri rey, y jare' antok nic'aj achi'a' ri q'uiy cata'n chiquij ri estrellas (ch'umil) xa'lka Jerusalén. Ri achi'a' re', c'a oriente i-patanak-ve, 2y xquic'utuj c'a: ¿Pache' c'o-ve ri ac'ual ri xalax, ri qui-rey ri israelitas? Ruma ojre' c'a oriente katz'atuon-pa ri ru-estrella (ruch'umil), y xojpa chi nalkaya' ruk'ij. 3Antok ri rey Herodes xra'xaj ri xqui'ej ri achi'a', xsach runo'j. Y quire' je' xqui'an ri vinak aj-Jerusalén. 4Y ri rey Herodes xa'rumol quinojiel ri principales sacerdotes y ri achi'a' escribas chiquicajol ri israelitas, y xuc'utuj chica pache' nalax-ve ri Cristo. 5Ijeje' xqui'ej cha ri rey: Ri Cristo nalax pa tanamet Belén vave' Judea. Ruma ri profeta ri xc'ujie' ojier can tiempo, quire' rutz'ib'an can: 6Y at Belén ri atc'o Judá, man at co'l ta oc chiquicajol ri nima'k tak tanamet chire' Judá, ruma aviq'uin atre' xtitiel-el ri Jun ri xtic'utu ri b'ay, y can xca'ruchajij ri vinak aj-Israel ri nutanamit. Quire' xqui'ej cha ri rey Herodes. 7Y antok ruyuon c'o ri rey Herodes, xa'rayuoj chalak'al ri achi'a' ri q'uiy cata'n chiquij ri estrellas (ch'umil), y xuc'utuj otz chica ri jampe' xquitz'at ri estrella (ch'umil). 8Y c'ajare' xa'rutak-el pa tanamet Belén y xu'ej-el chica: Quix'in c'a y ticanuj ri ac'ual, y antok xtivil, tili'ej chuva, chi quire' inre' je' ni'ya' ruk'ij. 9Y antok ri achi'a' ri q'uiy cata'n chiquij ri estrellas (ch'umil) caxan chic ri tzij ri xu'ej ri rey Herodes chica, xa'a. Y ri estrella (ch'umil) ri quitz'atuon-pa ijeje' c'a oriente, b'anak chiquivach. Y antok xa'b'aka, ri estrella (ch'umil) re' xpi'ie' paro' ri lugar pache' c'o-ve ri ac'ual. 10Y ri achi'a' ri q'uiy cata'n chiquij ri estrellas (ch'umil), antok xquitz'at chi xpi'ie' ri estrella (ch'umil), can altíra xa'quicuot. 11Y antok xa'uoc pa jay, ja xquitz'at ri ac'ual y ri María ri rutie', y ja xa'xuquie' choch ri ac'ual chi xquiya' ruk'ij. Y xa'quijak ri pache' quic'uan-ve ri niquisipaj can cha y xquiya' oro, incienso (puon) y mirra cha. 12Pero chica ri achi'a' re', pa cachic' x'e'x chica chi man chic ca'tzalaj riq'uin ri rey Herodes chi niqui'ej cha. Mare' antok ijeje' xa'tzalaj chupan ri qui-nación, jun-ve chic b'ay ri xquic'uaj. 13Y después antok xa'a ri achi'a' ri q'uiy cata'n chiquij ri estrellas (ch'umil), jun ángel richin ri Ajaf xuc'ut-ri' choch ri José pa rachic'. Y ri ángel re' xu'ej cha: Capalaj, tavuc'uaj ri ac'ual y ri rutie' y quixnumaj c'a chupan ri nación Egipto; quixc'ujie' chire' y inre' xtin'ej chava jampe' otz xquixtzalaj-pa. Ruma ri rey Herodes can xtucanuj ri ac'ual chi nuquimisaj, xcha' ri ángel cha ri José pa rachic'. 14Y ri José xc'astaj, xuc'uaj ri ac'ual y ri rutie'. Can chupan ri mismo ak'a' re' xquitz'om b'ay chi xa'a c'a Egipto. 15Y chire' Egipto xa'c'ujie-ve y xa'tzalaj-pa Israel c'a antok quiminak chic ri rey Herodes; chi quire' nu'on cumplir inche'l ru'e'n ri Ajaf Dios cha ri profeta ri xc'ujie' ojier can tiempo. Ri tz'ib'an can nu'ej: Egipto c'o-ve ri Nuc'ajuol antok xinvayuoj. Quire' ru'e'n ri Dios. 16Y antok ri rey Herodes xuna'iej chi ri achi'a' ri q'uiy cata'n chiquij ri estrellas (ch'umil) xa man xqui'an ta inche'l ri ru'e'n-el chica, jaja' xyacataj altíra royoval y mare' xu'on mandar chi ca'quimisas quinojiel ri xulu'i' alab'o ri c'aja' xa'lax hasta ca'ye' quijuna' ri ic'o chire' pa tanamet Belén y ri ic'o pa tak lugar cierca ri tanamet. Ruma jaja' rata'n can ri tiempo quiq'uin ri achi'a' ri q'uiy cata'n chiquij ri estrellas (ch'umil). 17Vave' nu'on cumplir inche'l ri rutz'ib'an can ri profeta Jeremías: 18Pa tanamet Ramá xc'axataj ok'iej. Can c'o-ve b'is. C'o c'a jun ri nujek' ok'iej y nijilo. Re' ja ri Raquel nca'rok'iej ri ral. Y man xrajo' ta chi x'an consolar ruma xa'con ri ral. Quire' ri tz'ib'an can ruma ri Jeremías. 19Y antok quiminak chic ri rey Herodes, ri ángel richin ri Ajaf xuc'ut chic ri' choch ri José pa rachic' chire' Egipto, 20y xu'ej cha: Capalaj, tavuc'uaj ri ac'ual y ri rutie' y quixtzalaj c'a ri nación Israel. Ruma ri xcajo' xquiquimisaj ri ac'ual chila, ya xa'con. 21Y ri José can xu'on-ve ri x'e'x cha pa rachic' ruma ri ángel. Xuc'am-pa ri ac'ual y ri rutie', y xa'tzalaj-pa ri nación Israel. 22Pero jaja' ruma xra'xaj chi ri nib'ano gobernar Judea, ja ri Arquelao ri ruc'ajuol ri rey Herodes, xuxi'ij-ri' chi ni'a y nic'ujie-ka chire' Judea. Pero cha ri José x'e'x pa rachic' chica nu'on, y mare' jaja' Galilea x'a-ve. 23Y xb'aka c'a pa tanamet rub'inan Nazaret y chire' xc'ujie-ve-ka, chi quire' nu'on cumplir inche'l quitz'ib'an can ri profetas ri xa'c'ujie' ojier can tiempo chi ri Jesús can ni'e'x-na-ve nazareno cha.

will be added

X\